চৰকাৰৰ ১০০ দিন : কোন তিনিগৰাকী মন্ত্ৰীৰ বাবে অস্বস্তিত পৰিল মুখ্যমন্ত্ৰী ড: হিমন্ত বিশ্ব শৰ্মা  ?

ড: হিমন্ত বিশ্ব শৰ্মাৰ চৰকাৰে সম্পূৰ্ণ কৰিলে ১০০ টা দিন ৷ এশটা দিনৰ কাম কাজক লৈ সফলতাৰ খতিয়ান দাঙি ধৰিছে মুখ্যমন্ত্ৰীগৰাকীয়ে ৷ কিন্তু এই এশটা দিনত তিনিগৰাকী মন্ত্ৰীৰ কাম কাজে বেকফুটলৈ ঠেলি দিলে চৰকাৰখনক ৷অস্বস্তিত পৰিল মুখ্যমন্ত্ৰী ৷ কোন এই তিনিগৰাকী মন্ত্ৰী ?

শিক্ষামন্ত্ৰী ডা: ৰণোজ পেগু

শিক্ষামন্ত্ৰীৰ দায়িত্ব গ্ৰহণ কৰিয়েই ডা: ৰণোজ পেগুয়ে ঘোষণা কৰিছিল যে এইবাৰ হাইস্কুল শিক্ষান্ত পৰীক্ষা অনুষ্ঠিত হ’বই ৷ ইয়াৰ বাবে ছাত্ৰ – ছাত্ৰীসকলক সাজু হ’বলৈও তেও পৰামৰ্শ দিলে ৷ কিন্তু মুখ্যমন্ত্ৰী ড: হিমন্ত বিশ্ব শৰ্মাই শিক্ষামন্ত্ৰীৰ এই ঘোষণাক নস্যাৎ কৰিলে ৷ অৱশেষত বাতিল হ’ল হাইস্কুল শিক্ষান্ত পৰীক্ষা ৷ তাৰ পাছত বিকল্প মূল্যায়ণ পদ্ধতিৰে ফলাফল ঘোষণাৰ সিদ্ধান্ত হ’ল ৷তাতো কেণা লাগিল ৷ শিক্ষামন্ত্ৰীয়ে সংবাদমেল পাতি ঘোষণা কৰিলে যে বিকল্প মূল্যায়নৰ মাৰ্কশ্বীট চাকৰিৰ ক্ষেত্ৰত প্ৰযোজ্য নহ’ব ৷ ইয়াকে লৈ ৰাজ্যত তীব্ৰ প্ৰতিক্ৰিয়াৰ সৃষ্টি হোৱাত অৱশেষত শিক্ষা বিভাগে এই সিদ্ধান্ত বাতিল কৰিবলগীয়া হ’ল ৷

পঞ্চায়ত আৰু গ্ৰামোন্নয়ন মন্ত্ৰী ৰঞ্জিত কুমাৰ দাস

ৰঞ্জিত কুমাৰ দাসে সংবাদমেল পাতি মুকলি কৰিলে আদৰ্শ নাগৰিক চনত ৷ এই চনদ মুকলি হোৱাৰ লগে লগে ৰাজ্যজুৰি বিৰূপ প্ৰতিক্ৰিয়াৰ সৃষ্টি হ’ল ৷ কিয়নো আদৰ্শ নাগৰিক চনদ অনুসৰি , গাঁৱত ঘৰ বান্ধিলে , ক্ষুদ্ৰ উদ্যোগ স্থাপন কৰিলে পঞ্চায়তৰ অনুমতি লোৱাটো বাধ্যতামূলক কৰাৰ লগতে কৰ দিয়াৰ পোষকতা কৰা হৈছিল ৷ কোভিড আৰু লকডাউনে ৰাজ্যবাসীক জুৰুলা কৰাৰ সময়ত নতুন কৰ ঘোষণাৰ লগে লগে সমালোচনাৰ জোৱাৰ উঠিল ৷ এক অস্বস্তিকৰ পৰিস্থিতিত মুখ্যমন্ত্ৰীৰ কাৰ্যালয়ে স্পষ্টীকৰণ দিবলগীয়া হ’ল যে গাঁৱত ঘৰ বান্ধিলে কৰ লোৱাৰ প্ৰশ্নই নুঠে ৷

পৰিবহণ মন্ত্ৰী চন্দ্ৰমোহন পাটোৱাৰী

ৰাষ্ট্ৰীয় ঘাইপথত ৪০ কিলোমিটাৰতকৈ অধিক বেগত যান বাহন চলালে ২০০০ টকাৰ জৰিমনা বিহাৰ নিয়ম প্ৰৱৰ্তন কৰিলে ৰাজ্যৰ পৰিবহণ বিভাগে ৷ কোনো আগতীয়া বিজ্ঞাপন , প্ৰচাৰ নোহোৱাকৈ পৰিবহণ বিভাগে ইন্টাৰচেপ্তৰৰ গতিবেগ নীৰিক্ষণৰ কাম আৰম্ভ কৰিলে আৰু বহু ব্যক্তিৰ ফোনলৈ প্ৰেৰণ কৰা হ’ল জৰিমনাৰ চালান ৷ লগে লগে প্ৰতিক্ৰিয়াৰ জোৱাৰ উঠিল ৷ এফালে টোলকৰ লগোৱা ঘাইপথত ৪০ কিলোমিটাৰ গতিবেগ , আনফালে ২ হাজাৰ টকাৰ জৰিমনা – ৰাজ্যবাসী জাঙুৰ খাই উঠিল ৷ চন্দ্ৰমোহন পাটোৱাৰীয়ে আত্মপক্ষ সমৰ্থন কৰি ক’লে যে দুৰ্ঘটনা ৰোধ কৰি ৰাজ্যবাসীৰ জীৱন বচাবলৈহে এই পদক্ষেপ লোৱা হৈছে ৷ কিন্তু এই পদক্ষেপক লৈ চাৰিওফালৰ পৰা চৰকাৰৰ ওপৰত তীব্ৰ আক্ৰমণ আৰম্ভ হ’ল ৷পৰিস্থিতি হিতে বিপৰীত হোৱা দেখি মুখ্যমন্ত্ৰী ড: হিমন্ত বিশ্ব শৰ্মাই নিজে হস্তক্ষেপ কৰিলে আৰু ৰাষ্ট্ৰীয় ঘাইপথৰ জৰিমনা সংগ্ৰহ সাময়িকভাৱে বন্ধ ৰাখিলে ৷

এইদৰেই তিনিগৰাকী মন্ত্ৰীৰ কাম- কাজৰ বাবে ১০০ টা দিনৰ কাৰ্যকালত অস্বস্তিৰ সন্মুখীন হ’ল হিমন্ত বিশ্ব শৰ্মাৰ চৰকাৰ ৷