মেঘালয়ৰ ৰাজ্যপাল সত্যপাল মালিকে প্ৰধানমন্ত্ৰী নৰেন্দ্ৰ মোদীক যিমান আক্ৰমণ কৰিছে , আন কোনো বিৰোধী নেতাইও কৰা নাই ৷ কৃষক আন্দোলনক লৈ প্ৰধানমন্ত্ৰীয়ে গ্ৰহণ কৰা স্থিতিক লৈ সদায় সোচ্চাৰ হৈ আহিছে সত্যপাল মালিক ৷ বিষয়টো লৈ তেও আনকি নিজে প্ৰধানমন্ত্ৰী মোদীক সাক্ষাতো কৰিছে ৷ এই সাক্ষাতকালত প্ৰধানমন্ত্ৰী মোদীয়ে দেখুওৱা ঔদ্ধত্যক তেও অতি মুকলিকৈ আৰু কঠোৰ ভাষাৰে সমালোচনা কৰিছে ৷ স্বাভাৱিকতে সত্যপাল মালিকৰ বক্তব্যই সময়ে সময়ে শলঠেকত পেলাই আহিছে বিজেপি নেতৃত্বক ৷ কিন্তু প্ৰশ্ন হয় , মুকলিকৈ প্ৰধানমন্ত্ৰী মোদীক আক্ৰমণ কৰাৰ পাছতো মালিকৰ বিৰুদ্ধে কিয় ব্যৱস্থা লোৱাৰ সাহস গোটাব পৰা নাই বিজেপি নেতৃত্বই ?
প্ৰশ্নৰ উত্তৰ এটাই ৷ সেয়া হ’ল নিৰ্বাচন ৷ সন্মুখত নিৰ্বাচন থকা বাবেই প্ৰধানমন্ত্ৰী মোদীয়ে তিনিখন কৃষি আইন প্ৰত্যাহাৰ কৰিবলৈ বাধ্য হ’ল ৷ সেই একেটা কাৰণতে তেও সত্যপাল মালিকৰ বিৰুদ্ধে ব্যৱস্থা গ্ৰহণৰ পৰা বিৰত আছে ৷ সত্যপাল মালিক জাত সম্প্ৰদায়ৰ ব্যক্তি ৷ উত্তৰ প্ৰদেশৰ ২২ খন জিলাত জাতৰ জনসংখ্যা হ’ল ১৪ শতাংশ৷ বিগত কেবাটাও নিৰ্বাচনত জাতসকলে বিজেপিৰ পক্ষত একপক্ষীয়ভাৱে ভোটদান কৰি আহিছে ৷ চি এছ ডি এছৰ সমীক্ষা অনুসৰি ২০১৭ চনৰ বিধানসভা নিৰ্বাচনত ৩৯ শতাংশ জাতে বিজেপিক ভোট দিছিল ৷ ২০১৪ ৰ লোকসভা নিৰ্বাচনত ৭৭ শতাংশ আৰু ২০১৯ চনৰ নিৰ্বাচনত ৯১ শতাংশ জাত ভোটাৰৰ সমৰ্থন লাভ কৰিছিল বিজেপি দলে ৷
এইবাৰ পৰিস্থিতি কিছু সুকীয়া হৈ পৰিছে ৷ এবছৰযোৰা কৃষক আন্দোলনৰ পৰিপ্ৰেক্ষিতত জাতসকল বিজেপি আৰু প্ৰধানমন্ত্ৰী নৰেন্দ্ৰ মোদীৰ ওপৰত ক্ষুণ্ণ হৈ আছে ৷ এনে পৰিস্থিতিত এজন জাত নেতা সত্যপাল মালিকৰ বিৰুদ্ধে ব্যৱস্থা গ্ৰহণ কৰি অৱশিষ্ট সমৰ্থনখিনি নৰেন্দ্ৰ মোদী বা বিজেপিয়ে নিশ্চয় হেৰুৱাব নিবিচাৰিব ৷
