Investigative reporting with dedication.
পাকিস্তানৰ শাসক দলৰ এগৰাকী নেত্ৰীৰ দাবী – আফগানিস্তান দখল কৰাত তালিবানক সহায় কৰিছে ইছলামাবাদে ৷ বিনিময়ত তালিবানে এইবাৰ কাশ্মীৰ দখল কৰি পাকিস্তানৰ হাতত তুলি দিব ৷
পাকিস্তানৰ প্ৰধানমন্ত্ৰী ইমৰান খানৰ দল তেহৰিক –ই – ইনছাফৰ নেত্ৰী নীলম ইৰছাদ শেখে এই মন্তব্য কৰাৰ পাছতে পাকিস্তানত নতুন ৰাজনৈতিক বিতৰ্ক সৃষ্টি হৈছে ৷
মঙলবাৰে পাকিস্তানৰ এটা টেলিভিছন বিতৰ্কত অংশ লৈ নীলমে কয়- ‘তালিবানে কৈছে যে তেওলোক আমাৰ লগত আছে আৰু কাশ্মীৰৰ মুক্তিৰ যুদ্ধত আমাক সহায় কৰিব ৷’
লগে লগে অনুষ্ঠানটোৰ পৰিচালকে নীলমক সুধিলে – ‘অপোনাৰ কোনোবা তালিবানৰ নেতাৰ লগত কথা হৈছে নেকি ? আপোনাৰ এই মন্তব্যৰ পাছতে ভাৰতীয় সংবাদ মাধ্যম সৰৱ হৈ উঠিব ৷ বিশ্বজুৰি এই অনুষ্ঠান সম্প্ৰচাৰ হৈ আছে ৷’
নীলমে তেতিয়াও নিৰ্বিকাৰ হৈ ক’লে –‘তালিবানে জনাইছে যে ভাৰতে কাশ্মীৰৰ লগত বেয়া ব্যৱহাৰ কৰিছে ৷সেইবাবে ভাৰতৰ হাতৰ পৰা কাশ্মীৰক মুক্ত কৰাৰ যুঁজত তালিবান সদায় পাকিস্তানৰ লগত থাকিব ৷’
আফগানিস্তানত তালিবানক পাকিস্তানে সহায় কৰিলেও সেয়া মুকলিভাৱে এতিয়াও স্বীকাৰ কৰা নাই ৷ আনকি তালিবানে ক্ষমতা দখল কৰাৰ পাছতো ইমৰান খানে কেৱল কৈছিল-‘দাসত্বৰ শৃংখল ভাঙিলে আফগান জনতাই ৷’তেও তালিবানৰ নাম পৰ্যন্ত লোৱা নাই ৷এনে পৰিস্থিতিত নীলমৰ মন্তব্যই অস্বস্তিত পেলাইছে পাকিস্তান চৰকাৰক ৷
