নাগপুৰত ১১ বছৰে কি কৰিছিল তালিবান যোদ্ধাই ?

১১ বছৰ ধৰি নাগপুৰত অবৈধভাৱে বসবাস কৰিছিল এজন তালিবান যোদ্ধাই ৷ এই তালিবান যোদ্ধাৰ ফটো শেহতীয়াকৈ পোহৰলৈ অহাৰ পাছত হতচকিত হৈ পৰিছে দেশৰ নিৰাপত্তা সংস্থাসমূহ

অফগানিস্তানত তালিবান শাসনলৈ অহাৰ পাছতে বহু তালিবান যোদ্ধাৰ ফটো প্ৰকাশ পাইছে ৷ তাৰ মাজৰ এজন হ’ল ৩০ বছৰীয়া নুৰ মহম্মদ আজিজ মহম্মদ ৷ হাতত ৰাইফল লৈ তহল দিছে কাবুলৰ ৰাজপথত ৷এই ফটোখন দেখি হতবাক হৈ পৰে নাগপুৰৰ আৰক্ষী ৷ কিয়নো এইজন নুৰ মহম্মদে দীৰ্ঘদিন ধৰি নাগপুৰত বসবাস কৰিছিল ৷দিঘোৰি অঞ্চলৰ এটা ভাৰাঘৰত বসবাস কৰা নুৰৰ গতিবিধিৰ ওপৰত সন্দেহ হোৱাত আৰক্ষীয়ে নজৰ ৰাখিবলৈ আৰম্ভ কৰে ৷ নুৰ ক’লৈ যায় , কাক অনুসৰণ কৰে ,নেট মাধ্যমত কি চায় , এই সকলোবোৰ নীৰিক্ষণ কৰাৰ পাছত এদিন নাগপুৰ আৰক্ষীয়ে তেওক গ্ৰেপ্তাৰ কৰে ৷ যোৱা ২৩ জুনত নুৰ মহম্মদক আফগানিস্তানলৈ ঘূৰাই পঠিওৱা হয় ৷

নাগপুৰত ১১ বছৰ কাল কটোৱাৰ পাছত নুৰে দেশলৈ উভতি গৈয়েই তালিবানত ভৰ্তি হোৱাৰ সন্দেহ কৰা হৈছে ৷

২০১০ চনত ৬ মাহৰ এখন পৰ্যতক ভিছা লৈ ভাৰতত প্ৰৱেশ কৰিছিল নুৰ মহম্মদ ৷ ভাৰতত শৰনাৰ্থীৰ মৰ্যদা দিবলৈ ৰাষ্ট্ৰসংঘৰ মানৱ অধিকাৰ আয়োগৰ ওচৰত আবেদনো জনাইছিল ৷ কিন্তু সেই আবেদন খাৰিজ হয় ৷ তাৰ পাছৰে পৰা তেও নাগপুৰত অবৈধভাৱে থাকিবলৈ লয় ৷

কিন্তু প্ৰশ্ন হয় – ভাৰতত এই দীঘলীয়া সময়ছোৱা কি কৰি আছিল নুৰ মহম্মদে ? এই সন্দৰ্ভত আৰক্ষীয়ে সদৰী কৰিছে আন কেতবোৰ ভয়ানক তথ্য ৷আৰক্ষীৰ মতে নুৰৰ আচল নাম হ’ল আব্দুল হক ৷ ভাৰতত কম্বল বিক্ৰীৰ ব্যৱসায় কৰিছিল ৷ বিয়া বাৰু কৰোৱা নাছিল ৷ নুৰ ভাৰতত থকাৰ সময়ৰ পৰাই আফগানিস্তানত থকা ভায়েক জড়িত হৈ পৰিছিল তালিবানৰ সৈতে ৷ আনকি হাতত ধৰাল অস্ত্ৰ লৈ থকা নুৰৰ এটা ভিডিও ভাইৰেল হৈ পৰিছিল নেট মাধ্যমত ৷ ইয়াৰ পাছতে আৰক্ষীয়ে নুৰক অনুসৰণ কৰি গ্ৰেপ্তাৰ কৰে ৷ গ্ৰেপ্তাৰৰ পাছত নুৰৰ শৰীৰত পোৱা গৈছিল গুলীৰ আঘাতৰ দাগ ৷ সামাজিক মাধ্যমৰ একাউন্টত দেখা ঘ’ল যে সন্ত্ৰাসবাদীৰ ভিডিও তেও নিয়মীয়াকৈ অনুসৰণ কৰে ৷ আনকি নিজৰ প্ৰ’ফাইলো ভৰি আছে তেনে ভিডিওৰে ৷ আৰক্ষীয়ে নুৰৰ ভাৰাঘৰতো তালাচী চলায় যদিও আপত্তিজনক একো সামগ্ৰী লাভ নকৰিলে ৷

তাৰ পাছত প্ৰত্যৰ্পন নিয়ম অনুসৰি নুৰক আফগানিস্তানলৈ ওভতাই পঠিওৱা হয় ৷ কিন্তু তালিবান যোদ্ধাৰ ৰূপত নুৰৰ ফটো দেখাৰ পাছত নাগপুৰ আৰক্ষীকে ধৰি ভাৰতীয় সংস্থাসমূহ হতবাক হৈ পৰিছে৷ এতিয়া আৰক্ষীয়ে ভাৰতত থকা সময়ছোৱাত নুৰে কাৰ কাৰ লগত টেলিফোনত যোগাযোগ কৰিছিল তাৰ অনুসন্ধান আৰম্ভ কৰিছে ৷ সন্দেহ কৰা হৈছে যে ভাৰতৰ আন ঠাইতো ছদ্মৱেশত থকা তালিবানৰ নেটৱৰ্ক বিয়পি আছে ৷