Investigative reporting with dedication.
কাবুলত প্ৰৱেশ কৰাৰ পাছতে প্ৰধান কাৰাগাৰৰ দুৱাৰ মুকলি কৰি দিলে তালিবানে ৷জেলৰ পৰা বন্দী তালিবানৰ সদস্যসকলক মুক্তি দিয়া হৈছে ৷একেসময়তে কাবুলৰ প্ৰায় সকলো চৰকাৰী ভৱনত এতিয়া উৰিছে তালিবানৰ পতাকা ৷
ইয়াৰ পূৰ্বে বগৰম বিমানবন্দৰত থকা বগৰম কাৰাগাৰ আছিল আমেৰিকাৰ সেনাবাহিনীৰ হাতত ৷ কিন্তু আফগানিস্তানৰ পৰা আমেৰিকাই নিজৰ সেনা প্ৰত্যাহাৰ কৰাৰ পাছত কাৰাগাৰটোৰ দায়িত্ব দিয়া হয় আফগান সেনাক ৷কেৱল বগৰম কাৰাগাৰেই নহয় , যিসমূহ প্ৰদেশ তালিবানে দখল কৰিছে , তাৰ কাৰাগাৰসমূহৰ বন্দীসকলক ইতিমধ্যেই মুকলি কৰি দিয়া হৈছে ৷
তালিবানে দেওবাৰে কাবুল প্ৰায় দখল কৰাৰ পাছত চৰকাৰী ভৱনসমূহ প্ৰায় খালী হৈ পৰিছে ৷ তাত এতিয়া উৰিছে তালিবানৰ পতাকা ৷সমগ্ৰ চহৰজুৰি ক্ষমতা সলনি হোৱাৰ ছবি প্ৰায় স্পষ্ট হৈ পৰিছে ৷ৰাজপথসমূহো এতিয়া তালিবানৰ দখলত ৷ সৃষ্টি হৈছে ব্যাপক যানজটৰ ৷
তালিবানৰ প্ৰধান মোল্লা আব্দুল গণি বৰাদৰে আফগানিস্তানৰ ৰাষ্ট্ৰপতি আশ্ৰফ ঘানীৰ বাসভৱনলৈ গৈ ক্ষমতা হস্তান্তৰ সম্পৰ্কে আলোচনাত মিলিত হৈছে ৷ তেৱেই আফগানিস্তানৰ পৰৱৰ্তী ৰাষ্ট্ৰপতি হ’ব বুলি চৰ্চা চলিছে ৷
