সত্যৰ সন্ধানত প্ৰতিদিন, প্ৰতিপল

‘দৈনিক ভাস্কৰ’ৰ কাৰ্যালয়ত আয়কৰৰ তালাচী : সত্যৰ মুখামুখি হ’বলৈ চৰকাৰৰ ভয় কিয় ?

কোভিডৰ দ্বিতীয় ঢৌৰ সময়ত গংগাৰ পাৰৰ শাৰী শাৰী শৱদেহৰ দৃশ্য আপুনি নিশ্চয় দেখিছে ৷ উত্তৰ প্ৰদেশৰ যোগী আদিত্যনাথ নেতৃত্বাধীন চৰকাৰে কোভিড মৃতকৰ সংখ্যা ইচ্ছাকৃতভাবে কমকৈ দেখুৱাইছিল ৷ অথচ কোভিড মহামাৰীয়ে ৰাজ্যখনত এক প্ৰকাৰ নৰসংহাৰ চলাইছিল ৷ এই ঘটনাক যিমান পাৰি সিমান লুকুৱাই ৰাখিবলৈ চেষ্টা চলাইছিল উত্তৰ প্ৰদেশৰ বিজেপি চৰকাৰে ৷ কিন্তু ৰাষ্ট্ৰীয় হিন্দী কাকত  “দৈনিক ভাস্কৰ”য়ে এক দু:সাহসিক অভিযান চলালে ৷ কাকতখনৰ ৩০ গৰাকী সাংবাদিকক প্ৰেৰণ কৰা হ’ল গংগাৰ পাৰত থকা ২৭ খন জিলালৈ ৷ সাংবাদিকসকলে গংগাৰ পাৰে পাৰে চৰজমিন অনুসন্ধান চলাই যি বাতৰি আৰু ফটো প্ৰকাশ কৰিলে , সেয়া দেখি স্তম্ভিত হৈ পৰিল সমগ্ৰ বিশ্ব ৷ কাৰণ , গংগাৰ পাৰত কোনো হিচাপ নৰখাকৈ সমাধিস্থ কৰা হৈছিল প্ৰায় ২ হাজাৰ শৱদেহ ৷ ইয়াৰ বাহিৰেও ভেকচিন প্ৰদানত ব্যৰ্থতা , অক্সিজেনৰ অভাৱ আদিৰ বাতৰি ধাৰাবাহিকভাবে কাকতখনে প্ৰকাশ কৰি গ’ল ৷ যাৰ বাবে উত্তৰ প্ৰদেশত বিজেপিৰ বিৰুদ্ধে আৰম্ভ হ’ল প্ৰতিষ্ঠানবিৰোধী ঢৌ ৷ যোগী আদিত্যনাথ নিজেই সংকটত পৰিল ৷ কিয়নো ক’ভিড নিয়ন্ত্ৰণত যোগীৰ ব্যৰ্থতাৰ কাহিনী ইতিমধ্যে দেশে – বিদেশে বিয়পি পৰিছিল ৷ এই সত্য প্ৰথমতে পোহৰলৈ আনিছিল “দৈনিক ভাস্কৰ ” কাকতে ৷ ইয়াৰ পাছতে আৰম্ভ হ’ল প্ৰতিশোধৰ পৰিকল্পনা ৷ এই পৰিকল্পনাই বাস্তৱ ৰূপ পালে বৃহস্পতিবাৰৰ দিনটোত ৷

বৃহস্পতিবাৰে দেশৰ বিভিন্ন প্ৰান্তত থকা “দৈনিক ভাস্কৰ”ৰ ৩৫ টা কাৰ্যালয়ত চলিল আয়কৰ বিভাগৰ তালাচী ৷ কাকতখনৰ দিল্লী , মধ্যপ্ৰদেশ , ৰাজস্থান , গুজৰাট আৰু মহাৰাষ্ট্ৰত থকা কাৰ্যালয়ত বৃহস্পতিবাৰে পুৱা প্ৰায় ৪ বজাৰ পৰা বিয়লি ৪.৩০ বজালৈ আয়কৰৰ তালাচী চলিল ৷ এই সময়ছোৱাত কাকতখনৰ মালিকৰ লগতে কেবাগৰাকীও কৰ্মচাৰীৰ ঘৰতো আয়কৰ বিভাগে তালাচী চলায় ৷

“দৈনিক ভাস্কৰ”ৰ কাৰ্যালয়ত চলা  আয়কৰৰ তালাচীয়ে দেশবাসীৰ সন্মুখত উন্মুক্ত কৰি তুলিছে কেন্দ্ৰীয় চৰকাৰৰ প্ৰতিশোধপৰায়ণ মনোবৃত্তি ৷ ইয়াৰ আগলৈকে নিৰ্বাচনৰ সময়ত বিৰোধী নেতাৰ ঘৰত চি বি আই , আয়কৰৰ দৰে কেন্দ্ৰীয় সংস্থাৰ তালাচীৰ বাতৰি পোৱা গৈছিল ৷ যাৰ পৰা প্ৰমান হৈ গৈছে যে এই সংস্থাসমূহ আচলতে শাসকীয় দলটোৰ ৰাজনৈতিক অভিপ্সা পূৰণৰ একপ্ৰকাৰ হাথিয়াৰত পৰিণত হৈছে ৷ সকলো সীমা চেৰাই এইবাৰ সংবাদমাধ্যমৰ কণ্ঠৰোধ কৰিবলৈ ব্যৱহাৰ কৰা হ’ল আয়কৰৰ দৰে সংস্থাক ৷ চৰকাৰে গতানুগতিকভাৱে কৈছে যে আয়কৰে নিজৰ দায়িত্ব নিজে পালন কৰি গৈছে ৷ চৰকাৰৰ কোনো সম্পৰ্ক ইয়াৰ লগত নাই ৷ কিন্তু কিয় উত্তৰ প্ৰদেশৰ নিৰ্বাচনৰ আগে আগে ‘দৈনিক ভাস্কৰ’ক লক্ষ্য কৰি লোৱা হ’ল তাৰ উত্তৰ জনতাক পৃথককৈ দিয়া প্ৰয়োজন নাই ৷ সুৰাপান কৰিলে যিদৰে মুখ গোন্ধাবই ,তাৰ কোনো পৃথক প্ৰমানৰ দৰকাৰ নাই , সেইদৰে সংবাদ মাধ্যমৰ কাৰ্যালয়ত আয়কৰৰ এই ‘ হঠাৎ তৎপৰতা’ই চৰকাৰৰ সকলো অভিসন্ধি পোহৰৰ দৰে উন্মুক্ত কৰি তুলিছে ৷ ইয়াক লৈ আৰু সন্দেহৰ কোনো অৱকাশ নাই ৷ এয়া সংবাদ মাধ্যমলৈ চৰকাৰৰ প্ৰত্যক্ষ ভাবুকি ৷ “দৈনিক ভাস্কৰ”ৰ লগতে উত্তৰ প্ৰদেশৰ আন এটা টেলিভিছন চেনেল ভাৰত সমাচাৰৰ কাৰ্যালয়তো একেদিনাই আয়কৰৰ তালাচী চলিল ৷ এই চেনেলটোৱেও  যোগী চৰকাৰৰ ব্যৰ্থতাক ধাৰাবাহিকভাবে উন্মোচন কৰি আহিছিল ৷ চৰকাৰৰ ব্যৰ্থতাৰ দিনলিপি লিখি অহা বাবেই দুটা সংবাদ গোষ্ঠীক বাচি বাচি লক্ষ্য কৰি লোৱা হ’ল আৰু চৰকাৰৰ ‘চৰিত গাথা’ লিখি অহা সংবাদ গোষ্ঠীসমূহক অতিৰিক্ত বিজ্ঞাপন দি পুৰষ্কৃত কৰা হ’ল ৷ এই ঘটনাক একেমুখে নিন্দা কৰিছে বিৰোধী দলসমূহে ৷সকলোৱে সুধিছে – সত্যৰ মুখামুখি হ’বলৈ চৰকাৰৰ ইমান ভয় কিয় ?

 

 

Leave A Reply

Your email address will not be published.