হৰ্ছ ট্ৰেডিঙ আচলতে কি ?

উনৈশ  শতিকাৰ আৰম্ভণিত কেমব্ৰিজ অভিধানত অন্তৰ্ভুক্ত হৈছিল এটা শব্দ ৷ হৰ্ছ ট্ৰেডিঙ ৷ ঘোৰাৰ বেচা কিনা সংক্ৰান্ততে এই শব্দটো ব্যৱহাৰ কৰা হৈছিল ৷ কিন্তু লাহে লাহে হৰ্ছ ট্ৰেডিঙ হৈ পৰিল এটা ৰাজনৈতিক শব্দ ৷ উনৈশ শতিকাৰ আৰম্ভণিৰ দিনবোৰত ভাল প্ৰজাতিৰ ঘোৰা ক্ৰয় কৰিবলৈ ব্যৱসায়ীসকলে যি কৌশল লৈছিল , তাকেই কোৱা হৈছিল হৰ্ছ ট্রেডিঙ বুলি ৷ কোৱা হয় যে ঘোৰা ব্যৱসায়ীসকলে নিজৰ ঘোৰাসমূহ কৰবাত লুকুৱাই ৰাখিছিল , কৰবাত বান্ধি ৰাখিছিল নাইবা আন কোনো অস্তাবললৈ লৈ গৈছিল ৷ তাৰ পাছত নিজৰ চালাকি , ধনৰ লেন দেনেৰে  ঘোৰাৰ দৰ দাম কৰিছিল ৷ ঘোৰা ব্যৱসায়ক লৈ ভাৰতৰো কেতবোৰ আকৰ্ষণীয় কাহিনী আছে ৷  ভাৰতৰ ব্যৱসায়ীসকলে নিজৰ বিশ্বস্ত কৰ্মচাৰীক আৰবলৈ ঘোৰা কিনিবলৈ প্ৰেৰণ কৰিছিল ৷ ঘোৰা কিনি উভতি অহা সময়ত পথতে কিছুমান ঘোৰাৰ মৃত্যু হৈছিল ৷ নিজৰ মালিকক আশ্বস্ত কৰিবলৈ কৰ্মচাৰীকেইজনে  মৃত ঘোৰাকেইটাৰ নেজ  লগত লৈ আহিছিল ৷ এই নেজ দেখুৱাই তেওলোকে কিমান ঘোৰা প্ৰকৃততে ক্ৰয় কৰিছিল সেই হিচাপ মালিকৰ আগত দাঙি ধৰিছিল ৷ যদি ১০০ টা ঘোৰা ক্ৰয় কৰিছিল , তেনেহ’লে ৯০ টা ঘোৰাহে মালিকৰ ওচৰত হাজিৰ কৰাইছিল ৷ বাকী ১০ টা মৃত ঘোৰাৰ নেজ মালিকক দেখুৱাই কৈছিল যে এই ঘোৰাকেইটা বাটতে মৰিল  ৷ মালিকেও সেই কথাত বিশ্বাস কৰি লৈছিল ৷ কিন্তু পাছলৈ আৰবলৈ ঘোৰা কিনিবলৈ যোৱা কৰ্মচাৰীসকলে মালিকক ফাঁকি দি মুনাফা আদায় কৰিবলৈ আৰম্ভ কৰে ৷ তেওলোকে ১০০ টা ঘোৰা কিনাৰ পইচা লৈ যায় যদিও ৯০ টাহে প্ৰকৃততে ক্ৰয় কৰে ৷ বাকীকেইটা ঘোৰাৰ নেজ দেখুৱাই মালিকক ফাঁকি দিয়ে ৷ এইদৰে ১০ টা ঘোৰাৰ দাম তেওলোকে হৰলুকি কৰে ৷ হৰ্ছ ট্ৰেডিঙৰ লগত জড়িত অনেক কাহিনীৰ মাজত এয়াও এটা কাহিনী ৷ কিন্তু শেহতীয়াকৈ আমাৰ দেশৰ বিধায়ক , সাংসদবোৰ হৈ পৰিছে তেনে একো একোটা ঘোৰা ৷ যাক লুকুৱাব পাৰি , যাৰ নেজ দেখুৱাই মালিকক বুৰ্বক বনাব পাৰি ৷ ৰাজ্যসভা নিৰ্বাচনক কেন্দ্ৰ কৰি অসমো হৈ পৰিছে এক সাম্ভাব্য হৰ্ছ ট্ৰেডিঙৰ অভিকেন্দ্ৰ ৷

এটা দিন আছিল , যেতিয়া অসমত কংগ্ৰেছৰ ক্ষমতাশালী চৰকাৰ আছিল ৷ কংগ্ৰেছ দলৰ মন্ত্ৰীবোৰ ক্ষমতাশালী আছিল ৷ তেওলোকে কৰিব নোৱাৰা একো কাম নাছিল ৷ ২০১০ চনৰ ৰাজ্যসভাৰ নিৰ্বাচনত কংগ্ৰেছ দলৰে দুজন ক্ষমতাশালী মন্ত্ৰী হিমন্ত বিশ্ব শৰ্মা আৰু ৰকিবুল হুছেইনে এক অভাবনীয় ঘটনা সংঘটিত কৰিলে ৷ সেইবাৰ ৰাজ্যসভাৰ নিৰ্বাচনত বিৰোধীৰ উমৈহতীয়া প্ৰাৰ্থী আছিল জয়ন্ত বৰুৱা ৷ এই আসনখনত বিজয়ৰ বাবে কংগ্ৰেছৰ ওচৰত প্ৰয়োজনীয় বিধায়ক নাছিল ৷ কিন্তু সকলোকে আচৰিত কৰি তেতিয়াৰ বিজেপিৰ বিধায়ক ৰুমী নাথ , কাৰ্তিক সিনহা , অভিজিত হাজৰিকা আৰু শম্ভুসিঙ মাল্লাক গাড়ীত বহুৱাই বিধানসভা চৌহদত উপস্থিত হ’ল হিমন্ত বিশ্ব শৰ্মা আৰু ৰকিবুল হুছেইন ৷ গাড়ীৰ চালকৰ আসনত খোদ হিমন্ত বিশ্ব শৰ্মা ৷  সেয়াই আছিল অসমত বিধায়ক বেচা কিনাৰ প্ৰথম প্ৰকাশ্য দৃশ্য ৷ তাৰেই পুণৰাবৃত্তি ঘটিল ২০১২ চনত ৷ বিৰোধীৰ উমৈহতীয়া প্ৰাৰ্থী হাইদৰ হুছেইনৰ বিজয়ৰ বাবে প্ৰয়োজনীয় ভোট বিৰোধী শিবিৰৰ আছিল ৷ কিন্তু কেবাজনো বিৰোধী বিধায়কৰ ভোট নাকচ হোৱাত পৰাজিত হ’ল হাইদৰ হুছেইন ৷ কাৰ ভোট নাকচ হৈছিল সেয়া সকলোৱে জনা কথা ৷ তেতিয়া বিৰোধী শিবিৰত থকা আৰু এতিয়া শাসকীয় দলৰ এগৰাকী মন্ত্ৰী আৰু এগৰাকী বিধায়কৰ ভোট নাকচ হৈছিল সেইবাৰ ৷ নাকচ কোনে কৰাইছিল , সেয়াও সকলোৱে জনা কথা ৷ ২০১০ আৰু ২০১২ চনত যিয়ে কংগ্ৰেছৰ হৈ  বিজেপি   বিধায়ক ক্ৰয়ৰ নেতৃত্ব দিছিল , তেৱেই আজি বিজেপি প্ৰাৰ্থীৰ হৈ কংগ্ৰেছৰ ভোট ভিক্ষা কৰি আছে ৷ ভোটৰ ভিক্ষাৰ প্ৰতিদান কি হ’ব পাৰে , তাৰো উল্লেখ নিষ্প্ৰয়োজন ৷ কিন্তু ২০১০ আৰু ২০১২ চনত আৰম্ভ হোৱা অশুভ পৰম্পৰাই আজি অমানিশাৰ দৰে গ্ৰাস কৰিছে অসমৰ ৰাজনীতি ৷ যিটো দলৰ পৰা একোজন বিধায়ক নিৰ্বাচিত হয় , তেৱেই কিছুদিন পাছত দলত্যাগ কৰি আকৌ উপ নিৰ্বাচনত অৱতীৰ্ণ হয় ৷ সেয়াই নহয় , বিৰোধী শিবিৰত থাকিও সদনত শাসক দলক সহযোগ কৰিম বুলি ঘোষণা কৰিলে ৰহাৰ বিধায়ক শশীকান্ত দাসে ৷ শশীকান্ত দাসৰ বাসগৃহত উপস্থিত হৈ মুখ্যমন্ত্ৰীয়েও মুকলিকৈ ঘোষণা কৰিলে যে শশীকান্ত দাসে বিজেপি প্ৰাৰ্থীক ভোট দিব ৷ প্ৰত্যুত্তৰত তাহানি বিৰোধী বিধায়ক ক্ৰয় কৰিবলৈ যোৱা ৰকিবুল হুছেইনে ক’বলগীয়া হ’ল যে  ৰহাৰজন ঘোৰা আছিল ৷  সঁচা অৰ্থত এয়াই হৈছে সংসদীয় ৰাজনীতি আৰু গণতন্ত্ৰত প্ৰকৃত স্বৰূপ ৷ বিধায়ক যেতিয়া ঘোৰা হৈ পৰে আৰু ঘোৰাৰ ৰূপত যেতিয়া দৰ দাম চলে , তেতিয়া এনেকৈয়ে জনতাৰ ভোটবোৰ মূল্যহীন হৈ পৰে ৷ কিন্তু তাক লৈ আফচোচ কৰি লাভ নাই ৷ বিধায়ক বেচা কিনা এতিয়া অসমৰ ৰাজনীতিত সাধাৰণ কথা হৈ পৰিছে ৷ একেসকল মানুহেই বিগত এটা দশক ধৰি এই অশুভ পৰম্পৰাৰ নেতৃত্ব দি আহিছে ৷ হয়তো তেওলোকৰ শিবিৰ বা মালিক সলনি হৈছে ৷ কিন্তু ঘোৰা বেচা কিনাৰ দায়িত্ব আজিও নিয়াৰিকৈ পালন কৰি আছে ৷ গণতন্ত্ৰৰ নিধন যজ্ঞ চকুৰ সন্মুখত চলি থাকিলেও জনগণৰ হাতত কৰিবলগীয়া একো নাথাকে ৷ কৰিব পাৰে কেৱল আইন আৰু আদালতে ৷ ভাৰতত প্ৰযোজ্য হৈ থকা দলত্যাগবিৰোধী আইনত অতি স্পষ্টভাৱে উল্লেখ আছে যে কেবাটাও কাৰণত এগৰাকী জনপ্ৰতিনিধি অযোগ্য বিবেচিত হ’ব পাৰে ৷ যদি কোনো বিধায়কে নিজে দলৰ সদস্য পদ ত্যাগ কৰে , যদি দলৰ হুইপ নামানি তাৰ বিৰুদ্ধে ভোটদান কৰে , তেনেহ’লে  বিধায়ক গৰাকীৰ সদস্যপদ খাৰিজ হোৱাটো নিশ্চিত ৷ কিন্তু এনে স্পষ্ট আইন থকাৰ পাছতো মুখ্যমন্ত্ৰীয়ে কংগ্ৰেছ বিধায়কক বিজেপি প্ৰাৰ্থীক ভোট দিবলৈ আহ্বান জনোৱা ঘটনা দেশৰ আইন ব্যৱস্থাৰ প্ৰতি চূড়ান্ত অপমান নহয়নে ? বিধায়ক কিনিব পাৰিব , কিন্তু আইনক লৈও হেতালি খেলা আৰম্ভ হয় , তেনেহ’লে এয়া কেৱল নিৰ্বাচন ব্যৱস্থাৰ প্ৰতিয়ে নহয় , সামগ্ৰিকভাৱে গণতন্ত্ৰ, ন্যায় আৰু ৰাষ্ট্ৰব্যৱস্থাৰ প্ৰতিয়ে ভাবুকি হৈ উঠিব ৷