Investigative reporting with dedication.
অস্তিত্বৰ সংকট আতৰা নাই কংগ্ৰেছ শিবিৰৰ পৰা ৷ এইবাৰ খোদ দলটোৰ সভাপতিসহ ৭ গৰাকী বিধায়কে যোগ দিবলৈ ওলাইছে বিজেপি দলত ৷ এই ঘটনা মণিপুৰৰ ৷ ৰাজ্যখনত কংগ্ৰেছৰ আভ্যন্তৰীণ সংকটে গুৰুতৰ ৰূপ ধাৰণ কৰাৰ পাছত কালি আন এক সংকটৰ সন্মুখীন হয় দলটো ৷ মঙলবাৰে মণিপুৰ কংগ্ৰেছৰ সভাপতি গোবোন্দদাস কোন্থাজমে নিজৰ পদৰ পৰা ইস্তাফা দিয়ে ৷ তেওৰ লগতে কংগ্ৰেছৰ আন ৭ গৰাকী বিধায়কে বিজেপিত যোগ দিব বুলি এতিয়া সৰৱ চৰ্চা চলিছে ৷ উল্লেখ্য যে , ৬০ জনীয়া মণিপুৰ বিধানসভাৰ শেহতীয়া নিৰ্বাচনত কংগ্ৰেছ দলে লাভ কৰিছিল ২৮ খন আসন ৷ কিন্তু ২১ খন আসন লাভ কৰিও সেই সময়ত বিজেপিয়ে আন সহযোগী দলৰ সহায়ত চৰকাৰ গঠন কৰিবলগীয়া হয় ৷ পৰৱৰ্তী সময়ত ৭ গৰাকী কংগ্ৰেছ বিধায়কে বিজেপিত যোগ দিয়ে যদিও দলত্যাগবিৰোধী আইনৰ বাবে তেওলোকে বিধায়ক পদ হেৰুৱাবলগীয়া হয় ৷ পৰিস্থিতিৰ সুযোগ লৈ যোৱা আগষ্ট মাহত কংগ্ৰেছে বিজেপি চৰকাৰৰ পতন ঘটাব বিচাৰিছিল যদিও সফল নহ’ল ৷ তাৰ পাছতে গোবিন্দদাস কোন্থাজমক মণিপুৰ কংগ্ৰেছৰ সভাপতিৰ দায়িত্ব দিয়া হয় ৷ কিন্তু এতিয়া খোদ সভাপতিজনেই ৭ গৰাকী বিধায়কক লগত লৈ বিজেপিত যোগ দিব বুলি খবৰ ওলাইছে ৷ স্বাভাৱিকতে ৰাজ্যখনত দলটোৰ বাবে এয়া অশনি সংকেত হিচাপে বিবেচিত হৈছে ৷
