সত্যৰ সন্ধানত প্ৰতিদিন, প্ৰতিপল

অখিল গগৈৰ প্ৰতি কিমান সহমৰ্মী ডা: নোমল মমিন ? ক’লে অখিলৰ ঘণিষ্ঠ কমলে

সোমবাৰে বিধানসভাত শিৱসাগৰৰ বিধায়ক অখিল গগৈয়ে বাজেট বিতৰ্কত অংশগ্ৰহণ কৰি নিজৰ ভাষণ আগবঢ়াই আছিল ৷ সেই সময়ত বিধানসভাৰ অধ্যক্ষৰ আসনত আছিল উপাধ্যক্ষ ডা: নোমল মমিন ৷ অখিল গগৈৰ বাবে নিৰ্ধাৰিত সময় আছিল ৪ মিনিট ৷ কিন্তু তেও প্ৰায় ৭ মিনিট ধৰি নিজৰ ভাষণ ৰাখে ৷ অধ্যক্ষৰ আসনত থকা ডা: মমিনে মৃদু আপত্তি কৰিলেও তেওক বক্তৃতা সম্পূৰ্ণ কৰিবলৈ সুযোগ দিয়ে ৷ যিটো বিধানসভাত উপস্থিত সাংবাদিকসকলে এক ব্যতিক্ৰম দৃশ্য বুলিয়েই অভিহিত কৰিছে ৷ তেনেসময়তে অখিল গগৈৰ ঘণিষ্ঠ তথা ৰাইজৰ দলৰ সাধাৰণ সম্পাদক কমল কুমাৰ মেধিয়ে পোহৰলৈ আনিছে আন এক অপ্ৰকাশিত তথ্য ৷ এক ফেচবুক পোষ্টৰ জড়িয়তে তেও প্ৰকাশ কৰিছে যে  এসময়ত ডা: নোমল মমিন  কেনেদৰে অখিল গগৈৰ স্বাস্থ্যক লৈ চিন্তিত হৈ পৰিছিল ৷ কেনেকৈ তেও গাড়ীত বহি থাকি অখিল গগৈৰ স্বাস্থ্যৰ খেয়াল ৰাখিছিল ৷ আজি ৰাজনীতিৰ পথাৰত দুয়োজনৰ অৱস্থান সুমেৰু – কুমেৰুত ৷ কিন্তু এসময়ত ডা: নোমল মমিন ৰাইজৰ দলৰ আজিৰ সভাপতি অখিল গগৈৰ প্ৰতি কিমান সহমৰ্মী আছিল , সেয়া প্ৰকাশ কৰিছে কমল কুমাৰ মেধিয়ে ৷ কমল কুমাৰ মেধিৰ ফেচবুক পোষ্টৰ পূৰ্ণপাঠ তলত আগবঢ়োৱা হ’ল –

“২০১১ চনৰ মে’ মাহৰ কথা ৷
বৃহৎ নদীবান্ধ বিষয়ক লৈ অখিল গগৈৰ আমৰণ অনশন কাৰ্যসূচী চলি আছে দীঘলীপুখুৰীৰ পাৰৰ লক্ষীধৰ বৰা ক্ষেত্ৰত ৷ তেতিয়ালৈকে অনশনৰ চাৰি-পাঁচটা দিন অতিক্ৰম হৈ গৈছে ৷ পানী এটুপিও মুখত নিদিয়া কঠোৰ অনশন কাৰ্যসূচীয়ে অখিলদাৰ স্বাস্থ্যৰ দ্ৰুত অৱনতি ঘটাইছে ৷ মিডিয়াত এই অনশন কাৰ্যসূচীৰ সংবাদ অবিৰতভাবে চলি আছে ৷
অখিলদাৰ স্বাস্থ্যৰ বুজ ল’বলৈ চৰকাৰে GMCHৰ দুগৰাকী অধ্যাপক-চিকিৎসকৰ তত্ত্বাৱধানত এটা মেডিকেল টীম অনশনথলীলৈ পঠিয়াই দিছে ৷ তেওঁলোকে অখিলদাৰ স্বাস্থ্যৰ অৱস্থাটো চাই ক’লে যে তেওঁক জৰুৰীভাৱে হস্পিতালত ভৰ্ত্তি কৰাব লাগিব ৷ কিন্তু অখিলদা কোনোপধ্যেই হস্পিতালত ভৰ্ত্তি হ’বলৈ ৰাজী নহয় ৷ দুয়োগৰাকী চিকিৎসকে বহুত বুজনি দিয়াৰ পিছতো অখিলদা নিজৰ স্থিতিত অটল ৷ চিকিৎসক দুগৰাকীৰ অসহায় অৱস্থা !
কাৰণ, তেওঁলোক চৰকাৰী দায়িত্বত আহিছে যেতিয়া তেনে অৱস্থাত অখিল গগৈক এৰি থৈ যাব নোৱাৰে ৷ তাৰে এগৰাকী চিকিৎসক মোৰ পুৰণি চিনাকি ৷ তেখেতে মোক মাতিলে ৷ লগৰ ইগৰাকী চিকিৎসকক চিনাকি কৰাই দি ক’লে যে অখিলদাক মই ভালদৰে কথাটো বুজাই দিব লাগে ৷ মই ক’লোঁ যে চৰকাৰে বিষয়টোক লৈ আলোচনা নকৰালৈকে অখিলদাই অনশন নাভাঙে আৰু হস্পিতালত ভৰ্ত্তি নহয় বুলি স্পষ্ট কৰি দিছে ৷ উপায়অন্তৰ দুয়োগৰাকী চিকিৎসকে গাড়ীৰ ভিতৰতে ঘণ্টাৰ পিছত ঘণ্টা বহি থাকিল ৷ মাজে মাজে মই গৈ তেওঁলোকৰ লগত সৌজন্যতাৰ খাটিৰত দুই- এষাৰ কথা পাতি থাকিলোঁ ৷
এই কথাখিনি হঠাতে মোৰ মনলৈ কিয় আহিল- জানেনে?
মনলৈ আহিল কালিৰ বিধানসভাৰ অধিবেশন চাই !
কালি বিধানসভাত বাজেটক লৈ বিধায়ক অখিল গগৈয়ে ভাষণ দি থাকোঁতে অধ্যক্ষৰ আসনত আছিল তাৰেই এগৰাকী চিকিৎসক ৷ তেখেত ডাঃ নোমল মমিন ৷
Leave A Reply

Your email address will not be published.