কাবুলত আত্মঘাটী আক্ৰমণ কৰা আইছিছ খুৰাছান কি ?

আফগানিস্তানৰ কাবুল বিমান বন্দৰৰ সমীপত সংঘটিত আত্মঘাটী বোমা বিস্ফোৰণৰ বাবে বিশ্বত্ৰাস সন্ত্ৰাসবাদী সংগঠন আইছিছৰ খুৰাছান গোটক জগৰীয়া কৰা হৈছে ৷ আফগানিস্তানত সক্ৰিয় হৈ থকা চৰমপন্থী সংগঠনসমূহৰ ভিতৰত আইছিছৰ খুৰাছান গোটেই হ’ল আটাইতকৈ ভয়ানক ৷

২০১৫ চনত ইৰাক আৰু ছিৰিয়াত ‘ইছলামিক ষ্টেট’ চৰম অৱস্থাত থকা সময়তে গঠন হৈছিল আইছিছ খুৰাছান গোট ৷ পাকিস্তান আৰু আফগানিস্তানত ই অধিক সক্ৰিয় ৷ তালিবানে ধৰ্মীয় গোড়ামি ত্যাগ কৰা বুলি যিসকলে ভাবে তেওলোকে আইছিছ খুৰাছান গোটত যোগ দিয়ে ৷

আইছিছ কুৰাছান ধৰ্মৰ ক্ষেত্ৰত ইমানেই গোড়া যে ছোৱালীয়ে অধ্যয়ণ কৰা বিদ্যালয় , চিকিৎসালয়ৰ মেটাৰ্ণিটী শাখাকো আক্ৰমণৰ লক্ষ্য কৰি লয় ৷

আফগানিস্তানৰ পূৱ প্ৰান্তৰ নগৰহাৰত এই জিহাদী সংগঠনৰ মূল ঠিকনা আছে ৷ পাকিস্তান আৰু আফগানিস্তানৰ মাজত চলা  নিচাজাতীয় সামগ্ৰীৰ সৰবৰাহ আৰু মানৱ সৰবৰাহৰ ব্যৱসায়ৰ পৰা তেওলোকে ধন সংগ্ৰহ কৰে ৷এসময়ত আইছিছ খুৰাছান গোটত ৩০০০ সদস্য আছিল ৷ কিন্তু পৰৱৰ্তী সময়ত আফগান সেনা আৰু নাটো বাহিনীৰ অভিযানৰ ফলত বিস্তৰ ক্ষতিৰ সন্মুখীন হয় ৷

তালিবানৰ লগত আইছিছ খুৰাছান গোটৰ পোনপটীয়ে নেটৱৰ্ক নাই যদিও তৃতীয় এটা গোটৰ জড়িয়তে সম্পৰ্ক ৰক্ষা কৰি আহিছে ৷ তৃতীয় গোটটো হ’ল হক্কানী নেটৱৰ্ক ৷ এই হক্কানী নেটৱৰ্কৰ লগত আইছিছ খুৰাছানৰ ঘণিষ্ঠ সম্পৰ্ক আছে ৷সম্পৰ্ক ৰক্ষা কৰিলেও তালিবান আৰু আইছিছ খুৰাছানৰ মাজত তীব্ৰ মতপাৰ্থক্য আছে ৷ আইছিছ খুৰাছানৰ অভিযোগ যে তালিবানে জিহাদৰ পথ এৰি দোহাৰ বিলাসী হোটেলত বুজাবুজিৰ পথ বাছি ল’লে ৷

আইছিছ খুৰাছান এতিয়া আফগানিস্তানৰ আভ্যন্তৰীণ সুৰক্ষাৰ বাবে আটাইতকৈ ডাঙৰ ভাবুকি ৷