উপ- নিৰ্বাচনৰ প্ৰাকক্ষণত শিৱসাগৰত এক ৰুদ্ধদ্বাৰ বৈঠকত মিলিত হয় অসম প্ৰদেশ কংগ্ৰেছৰ সভাপতি ভূপেন বৰা আৰু ৰাইজৰ দলৰ সভাপতি অখিল গগৈ ৷সোমবাৰে নিশা শিৱসাগৰৰ এখন হোটেলত দুয়োটা দলৰ নেতা দুগৰাকীয়ে প্ৰায় দুঘন্টা সময় ধৰি আলোচনা কৰে ৷ এই আলোচনাত বিশেষকৈ মৰিয়ণি আৰু থাওৰা সমষ্টিৰ উপ –নিৰ্বাচনৰ প্ৰসংগই স্থান পায় ৷
আলোচনাৰ শেষত ৰাইজৰ দলৰ সভাপতি অখিল গগৈয়ে সংবাদমাধ্যমৰ আগত কয় যে নিৰ্বাচন সন্দৰ্ভত কোনো আনুষ্ঠানিক আলোচনা হোৱা নাই ৷ এক সৌজন্যমূলক সাক্ষাতহে আছিল এয়া ৷ ভূপেন বৰা সভাপতি হোৱাৰ পাছত এয়া প্ৰথম সাক্ষাৎ ৷ বিজেপিৰ সাম্প্ৰদায়িক ৰাজনীতি ওফৰাই দিবলৈ দুয়োটা দলে ঐক্যবদ্ধভাৱে কাম কৰাক লৈ আলোচনা কৰা হৈছে ৷ সেয়া উপ নিৰ্বাচনেই হওক বা বিধানসভা – লোকসভা নিৰ্বাচনেই হওক ৷ ইপিনে , প্ৰদেশ কংগ্ৰেছৰ সভাপতি ভূপেন বৰাই সোমবাৰৰ নিশাৰ আলোচনা সন্দৰ্ভত কয় যে অখিল গগৈ অসমৰ এক সংগ্ৰামী সত্তা ৷ বিধানসভাৰ ভিতৰতো এজ সৰৱ কণ্ঠ ৷নদীবান্ধ বিৰুদ্ধে তেও ৰাজপথত আন্দোলন কৰাৰ সময়ত বিধায়ক হিচাপে বৰাই সদনত বান্ধৰ বিৰোধিতা কৰিছিল ৷ থাওৰাৰ এখন দলীয় সভাত অংশগ্ৰহণ কৰিবলৈ অহা বৰাই শিৱসাগৰৰ নৱনিৰ্বাচিত বিধায়কগৰাকীক সৌজন্যমূলক সাক্ষাৎ কৰিছে বুলি জানিবলৈ দিয়ে ৷
বিগত কিছুদিন ধৰি শিৱসাগৰৰ লগতে থাওৰা , মৰিয়ণিতো সক্ৰিয় ৰূপত দেখিবলৈ পোৱা গৈছে ৰাইজৰ দলৰ সভাপতি অখিল গগৈক ৷ তাৰ মাজত ভূপেন বৰাৰ লগত সোমবাৰৰ নিশাৰ বৈঠকে ৰাজনীতিৰ নতুন সমীকৰণৰ ইংগিত বহন কৰিছে ৷
