বিগত ১৯ জুলাইৰ পৰা আৰম্ভ হোৱা সংসদৰ বৰ্ষাকালীন অধিৱেশন বিৰোধীৰ প্ৰতিবাদৰ বাবে স্থবিৰ হৈ পৰিছে ৷ পেগাছাছ ছফটৱেৰৰ জড়িয়তে চোৰাংছোৱাগিৰি আৰু কৃষক আন্দোলনক কেন্দ্ৰ কৰি প্ৰতিদিনেই প্ৰতিবাদমুখৰ হৈছে কংগ্ৰেছকে ধৰি আন আন বিৰোধী দলসমূহ ৷ এনে পৰিস্থিতিত বিজেপি চৰকাৰে দোষাৰোপ কৰিছে বিৰোধী দলসমূহক ৷ বুধবাৰে ৰাজ্যসভাত চকুলো টুকিবলগীয়া হ’ল অধ্যক্ষ ভেংকয়া নাইডুয়ে ৷ তেও বিৰোধীৰ আচৰণে ভাৰতীয় গণতন্ত্ৰৰ মন্দিৰক কলুষিত কৰা বুলি মন্তব্য কৰিছে ৷ কিন্তু বিজেপিৰ অভিযোগৰ মাজতে দ্য প্ৰিন্টত প্ৰকাশ পাইছে আন এক প্ৰতিবেদন ৷
কি এই প্ৰতিবেদন ?
- Donation -
গৱেষণাকাৰী স্বেচ্ছাসেৱী সংস্থা পি আৰ এছ লেজিছটেটিভ ৰিচাৰ্ছে শেহতীয়াকৈ কেতবোৰ গুৰুত্বপূৰ্ণ পৰিসংখ্যা প্ৰকাশ কৰিছে ৷য’ত ২০০৯ ৰ পৰা ২০১৩ পৰ্যন্ত ইউ পি এ চৰকাৰৰ দ্বিতীয় আমোলত সদনৰ কাম কাজৰ ওপৰত আলোকপাত কৰা হৈছে ৷ এই পৰিসংখ্যাক লৈ দ্য প্ৰিন্টে প্ৰকাশ কৰিছে এই বিশেষ প্ৰতিবেদন ৷
কি আছে প্ৰতিবেদনত ?
২০০৯ চনত মনমোহন সিঙ দ্বিতীয়বাৰ প্ৰধানমন্ত্ৰী হোৱাৰ সময়ত লোকসভাত ৯৩ শতাংশ সময় বিনা বাধাই সদনৰ কাম কাজ চলিছিল ৷ কিন্তু ২০১৩ চন পোৱাৰ লগে লগে সেয়া ৪৬ শতাংশলৈ হ্ৰাস পায় ৷ ৰাজ্যসভাত এই পৰিসংখ্যা ১০২ শতাংশৰ পৰা ২০১৩ চনত ৫৮ শতাংশলৈ অবনমিত হয় ৷২০১৪ চনত বিপুল সংখ্যাগৰিষ্ঠতাৰে নৰেন্দ্ৰ মোদী ক্ষমতালৈ অহাৰ পাছত পৰিস্থিতি উন্নত হয় ৷ ২০১৪ চনত লোকসভাত ৮৪ শতাংশ সময় বিনা বাধাই কাম কাজ চলিছিল ৷ ২০১৯ চনত সেয়া একেকোবে ১৫৩ শতাংশলৈ বৃদ্ধি পায় ৷ ২০১৪ পৰা ৰাজ্যসভাতো মসৃণ গতিত কাম কাজ চলিবলৈ লয় ৷ ২০১৯ চনত ৰাজ্যসভাত ১০০ শতাংশ সময় বিনা বাধাই কাম চলিছিল ৷ ২০২০ ত সেয়া সামান্য কমি ৯১ শতাংশ হয় ৷
বিৰোধীয়ে কি কয় ?
দ্য প্ৰিন্টৰ প্ৰতিবেদন প্ৰকাশ পোৱাৰ পাছত বিৰোধী শিবিৰে কৈছে যে বিগত কেবা বছৰ ধৰি শাসক পক্ষই সংখ্যাৰ জোৰত এখনৰ পাছত সিখন বিল পাছ কৰি গৈছে ৷ বিৰোধীক আলোচনাৰ সময় পৰ্যন্ত দিয়া নাই ৷ একোখন বিলৰ নামত গড়ে ৭ মিনিটকৈ সময় ব্যয় কৰা হৈছে ৷ ভাৰতীয় সংসদৰ ইতিহাসত এয়া নজিৰবিহীন ঘটনা ৷
কেন্দ্ৰই কি কয় ?
কেন্দ্ৰীয় চৰকাৰৰ মতে বিৰোধীয়ে সংসদ অচল কৰি তোলাৰ পৰিপ্ৰেক্ষিতত ১৩০ কৌটিৰো অধিক ধনৰ অপচয় হৈছে ৷ এয়া চৰকাৰৰ মতে বিৰোধীৰ অনৈতিক আচৰণ ৷
বিৰোধীৰ প্ৰত্যুত্তৰ কি ?
কেন্দ্ৰৰ এনে অভিযোগৰ প্ৰত্যুত্তৰত বিৰোধীয়ে আগবঢ়াইছে প্ৰয়াত বিজেপি চৰকাৰৰ মন্ত্ৰী অৰুণ জেটলীৰ এটা মন্তব্য ৷ ২০১১ চনৰ ৩০ আগষ্টত অৰুণ জেটলীয়ে এইদৰে কৈছিল –“সংসদ সকলো বিষয়ৰ আলোচনাৰ ঠাই ৷কিন্তু অনেক সময়ত বহু গুৰুত্বপূৰ্ণ বিষয় এৰাই চলে সংসদে ৷ এনে পৰিস্থিতিত বিৰোধীয়ে যদি বাধাৰ সৃষ্টি কৰে , সেয়া গণতন্ত্ৰৰ বাবে শুভ লক্ষণ ৷”
