মুখ্যমন্ত্ৰী ড° হিমন্ত বিশ্ব শৰ্মাক আগবঢ়োৱা হৈছে Z+ নিৰাপত্তা। কি এই Z+ নিৰাপত্তা ? কেনেদৰে সুৰক্ষিত হ’ব মুখ্যমন্ত্ৰী ড° হিমন্ত বিশ্ব শৰ্মা?
আমাৰ দেশত ব্যক্তি এজনৰ নিৰাপত্তাৰ দিশটো চোৱাচিতা কৰে আৰক্ষী তথা স্থানীয় চৰকাৰে ।এজন ব্যক্তিৰ নিৰাপত্তাৰ ক্ষেত্ৰত দেশৰ গৃহদপ্তৰৰ ফালৰ পৰা ৬ তৰপীয়া ব্যৱস্থা আছে । SPG,Z+,Z,Y+ আৰু Y আৰু X কেটেগেৰীৰ নিৰাপত্তা আগবঢ়োৱা হয় ব্যক্তি বিশেষে। SPG নিৰাপত্তা কেৱল দেশৰ প্ৰধানমন্ত্ৰীকহে আগবঢ়োৱা হয় । Z + শ্ৰেণীৰ নিৰাপত্তাত মুঠ ১৫০ গৰাকী ব্যক্তি নিয়োজিত হয় । এই ১৫০ জনৰ ভিতৰতেই থাকে ১০ জনতকৈ অধিক NSG কমাণ্ডো আৰু আৰক্ষীৰ লোক। Z শ্ৰেণীৰ নিৰাপত্তাত মুঠ ৫৫ জন নিৰাপত্তাৰ লগত জড়িত ব্যক্তি থাকে।তাৰ ভিতৰত ৪ৰ পৰা ৬ জন NSG কামাণ্ডো আৰু আৰক্ষীৰ লোক থাকে। Y+ শ্ৰেণীৰ নিৰাপত্তাত থাকে ৩৯ জন লোক, তাৰে ২ৰ পৰা ৪ জন কামাণ্ডো আৰু বাকীখিনি আৰক্ষীৰ লোক । Y শ্ৰেণীৰ নিৰাপত্তাত থাকে ২৮ জন লোক তাৰে ১ টা ২ জন কামাণ্ডো। X শ্ৰেণীৰ নিৰাপত্তাত থাকে ১২জন লোক কিন্তু এই শ্ৰেণীত কোনো কামাণ্ডো নাথাকে।
- Donation -
Z+নিৰাপত্তা আগবঢ়াই নেশ্যনেল ছিকিউৰিটি গাৰ্ডৰ কামাণ্ডোৱে । তেওঁলোকক হেকলাৰ এণ্ড কোচ MP 5 ছাবমেছিন গান আৰু যোগাযোগৰ বাবে অত্যাধুনিক সঁজুলি প্ৰদান কৰা হয়। ইয়াৰোপৰি প্ৰতিগৰাকী ব্যক্তিয়েই শৰীৰ কলাত দক্ষ হোৱাতো বাধ্যতামূলক ।বৰ্তমান দেশত মুঠ ৪০ গৰাকী ব্যক্তিয়ে এই z+ শ্ৰেণীৰ নিৰাপত্তাৰ সুবিধা লাভ কৰি আছে ।এই সংখ্যা সদায় একে নাথাকে। শেহতীয়াকৈ অসমৰ মুখ্যমন্ত্ৰী ড° হিমন্ত বিশ্ব শৰ্মালৈ আগবঢ়োৱা হৈছে Z+ কেটেগৰীৰ নিৰাপত্তা । এতিয়াৰ পৰা মুখ্যমন্ত্ৰীগৰাকী ১০ জনতকৈও অধিক নেশ্যনেল ছিকিউৰিটি গাৰ্ডৰ কামাণ্ডোৰ আৱেষ্টনীত থাকিব ।
