Investigative reporting with dedication.
অসম চৰকাৰে ৰাজ্যত ইংৰাজী মাধ্যমৰ বিদ্যালয় স্থাপনৰ সিদ্ধান্ত লোৱাৰ সময়তে এতিয়া বন্ধ হবলৈ আৰম্ভ কৰিছে ইখনৰ পিছত সিখন চৰকাৰী অসমীয়া মাধ্যমৰ বিদ্যালয়৷অসমীয়া প্ৰতিদিন কাকতৰ এক বাতৰি অনুসৰি,আগন্তুক সময়খিনিত ৰাজ্যৰ ১ হাজাৰ ২ খন প্ৰাথমিক বিদ্যালয় একত্ৰিকৰণ হব আন প্ৰাথমিক বিদ্যালয়ৰ সৈতে৷একেদৰে ১ হাজাৰ ১৫ খন বিদ্যালয় একত্ৰিকৰণ হব উচ্চ প্ৰাথমিক বিদ্যালয়ৰ সৈতে৷আনহাতে ৯৭ খন উচ্চ প্ৰাথমিক বিদ্যালয় একত্ৰিকৰণ হব আন উচ্চ প্ৰাথমিক বিদ্যালয়ৰ সৈতে৷সেই অনুসৰি সর্বমুঠ ২ হাজাৰ ১১৪ খন বিদ্যালয় একত্ৰিকৰনৰ প্ৰস্তাব ইতিমধ্যে প্ৰাথমিক শিক্ষা সঞ্চালকালয়ে প্ৰেৰণ কৰিছে আৰু বিষয়টো ৰাজ্য চৰকাৰৰ শীর্ষ পর্যায়ত বিবেচনাধীন হৈ আছে৷ৰাজ্য চৰকাৰৰ অনুমোদন পালেই শীঘ্ৰেই বন্ধ হৈ পৰিব ৰাজ্যৰ এই ২ হাজাৰ ১১৪ খন প্ৰাথমিক আৰু উচ্চ প্ৰাথমিক বিদ্যালয়৷কিন্তু একত্ৰিকৰনৰ ফলত ৰাজ্যত শিক্ষানুষ্ঠানত বন্ধ হৈ পৰাৰ ঘটনা এইয়াই প্ৰথম নহয়৷বিদ্যালয় একত্ৰিকৰণৰ ফলত ২০১৭ চনৰ পৰা ২০১৯ চনলৈ ৰাজ্যত বন্ধ হল ৬ হাজাৰখন চৰকাৰী বিদ্যালয়৷এই সময়ছোৱাত ১ হাজাৰ ৮৮৫ খন প্ৰাথমিক বিদ্যালয় একত্ৰিকৰণ হল উচ্চ প্ৰাথমিক বিদ্যালয়ৰ সৈতে৷আনাহাতে ১ হাজাৰ ২৬৭ খন প্ৰাথমিক বিদ্যালয় আন প্ৰাথমিক বিদ্যালয়ৰ সৈতে,১০ খন উচ্চ প্ৰাথমিক আন উচ্চ প্ৰাথমিকৰ সৈতে,৮৫৩ খন প্ৰাথমিক বিদ্যালয় আৰু ১ হাজাৰ ৯৮৪ খন উচ্চ প্ৰাথমিক বিদ্যালয় উচ্চতৰ মাধ্যমিকৰ সৈতে একত্ৰিকৰণ কৰা হল৷ইয়াৰ ফলত ৰাজ্যত ইতিমধ্যে ৬ হাজাৰ খন বিদ্যালয় বন্ধ হৈ পৰিল৷
