১০ দিনত ৯ বিজেপি নেতাক কিয় খেদিলে ৰাইজে ?

দেশৰ বৃহত্তম ৰাজ্যখনৰ নিৰ্বাচনত সমগ্ৰ দেশবাসীৰ দৃষ্টি নিবদ্ধ হৈ আছে ৷ নিৰ্বাচনৰ দিন চমু চাপি অহাৰ লগে লগে আকৰ্ষনীয় হৈ পৰিছে উত্তৰ প্ৰদেশৰ নিৰ্বাচনী প্ৰেক্ষাপট ৷ ১০ ফেব্ৰুৱাৰীত অনুষ্ঠিত হ’ব প্ৰথম পৰ্যায়ৰ ভোটগ্ৰহণ ৷ কিন্তু তাৰ পূৰ্বে এতিয়া জনতাৰ ৰোষৰ সন্মুখীন হৈছে শাসকীয় বিজেপি দলৰ বিধায়ক তথা প্ৰাৰ্থীসকল ৷ বিগত ১০ টা দিনত ৯ গৰাকী বিজেপি নেতাই জনতাৰ ৰোষত পৰি পলায়ন কৰিবলগীয়া পৰিস্থিতিৰ সৃষ্টি হৈছে ৷
দিল্লীত কৃষক আন্দোলন চলি থকা সময়ৰ পৰাই উত্তৰ প্ৰদেশৰ কৃষকসমাজ বিজেপিৰ বিৰুদ্ধে সোচ্চাৰ হৈ উঠিছিল ৷ বিজেপি নেতাক গাঁৱত প্ৰৱেশ কৰাত বাধা আৰোপ কৰিছিল ৷ কৃষক বিদ্ৰহত সেও মানি কেন্দ্ৰীয় চৰকাৰে বিতৰ্কিত কৃষি আইন প্ৰত্যাহাৰ কৰিলেও যদিও কৃষকৰ ক্ষোভৰ উপশম ঘটা নাই ৷ নিৰ্বাচনৰ সময়তো দেখা গৈছে উত্তৰ প্ৰদেশৰ গাঁৱৰ ৰাইজৰ ক্ষোভৰ প্ৰতিফলন ৷ ইজনৰ পাছত সিজন বিজেপি নেতাক গাঁৱৰ পৰা খেদাই পঠিয়াইছে কৃষক সমাজে ৷ ৰাইজৰ ক্ষোভৰ পৰা সাৰি যোৱা নাই উত্তৰ প্ৰদেশৰ উপ –মুখ্যমন্ত্ৰীও৷ বিগত ২২ জানুৱাৰীত উত্তৰ প্ৰদেশৰ উপ – মুখ্যমন্ত্ৰী কেশৱ প্ৰসাদ মৌৰ্য উপস্থিত হৈছিল নিজৰ বিধানসভা সমষ্টি গুলামীপুৰত ৷ কিন্তু সমষ্টিত উপস্থিত হোৱাৰ লগে লগে মহিলাসকলে কেশৱ প্ৰসাদ মৌৰ্যৰ বিৰুদ্ধে মুকলিকৈ শ্ল’গান দিবলৈ আৰম্ভ কৰে ৷ উপ – মুখ্যমন্ত্ৰী গৰাকীয়ে মহিলাসকলক বুজাবলৈ চেষ্টা কৰে যদিও তেওলোক শান্ত নহ’ল ৷ এই ভিডিও চোছিয়েল মেডিয়াত ব্যাপক হাৰত ভাইৰেল হৈ পৰিছে ৷ তাৰ পাছতে ৰাইজৰ খঙ ক্ষোভৰ মুখামুখি হ’বলগীয়া হ’ল আন এজন বিজেপি এম এল চি সুৰেন্দ্ৰ চৌধুৰী ৷ তেও প্ৰয়াগৰাজ জিলাৰ এম এল চি ৷ কেশৱ প্ৰসাদ মৌৰ্যৰ হৈ প্ৰচাৰ চলাবলৈ ২৯ জানুৱাৰীত উপস্থিত হৈছিল অফজলপুৰত ৷ কিন্তু ৰাইজে তেওক গাৱত প্ৰৱেশেই কৰিবলৈ নিদিলে ৷ বিজেপি এম এল চি জনে ৰাইজক বুজাবলৈ চেষ্টা কৰে যে বিজেপিয়ে ৰাম মন্দিৰ নিৰ্মান কৰিছে ৷ গতিকে সকলোৱে বিজেপিক সমৰ্থন দিয়া উচিত ৷ কিন্তু তাৰ পাছতো অফজলপুৰৰ ৰাইজে সুৰেন্দ্ৰ চৌধুৰীক গাঁৱত সোমাবলৈ নিদিলে ৷উপ মুখ্যমন্ত্ৰী কেশৱ প্ৰসাদ মৌৰ্যৰ পাছত এজনৰ পাছত আনজন বিধায়কে খেদা খাবলগীয়া পৰিস্থিতিৰ সৃষ্টি হৈছে উত্তৰ প্ৰদেশত ৷ জালোনৰ উৰয় বিধানসভা সমষ্টিৰ বিজেপি বিধায়ক গৌৰী শংকৰ বৰ্মাকো ২৯ জানুৱাৰীৰ দিনা ৰাইজে ওভতাই পঠিয়াই ৷ দলৰ প্ৰাৰ্থিত্ব লাভ কৰাৰ পাছত তেও নিজ বিধানসভা সমষ্টিত উপস্থিত হৈছিল ৷ কিন্তু ভোটাৰ ৰাইজে বিগত পাঁচ বছৰত এটাও পথ নিৰ্মান নকৰাৰ অভিযোগ উত্থাপণ কৰি মুকলিকৈ ক্ষোভ উজাৰে ৷ ২৫ জানুৱাৰীত বুলন্দচহৰ অঞ্চলৰ স্যানা বিধানসভা সমষ্টিৰ বিধায়ক দেবেন্দ্ৰ সিঙ উপস্থিত হৈছিল এখন গাৱত ৷ কিন্তু বিধায়কক দেখাৰ লগে লগে স্থানীয় ৰাইজে শ্ল’গান দি ক্ষোভ প্ৰকাশ কৰিবলৈ আৰম্ভ কৰে ৷ ৰাইজৰ অভিযোগ – বিগত পাঁচ বছৰত না এটা পথ নিৰ্মান কৰিলে , না পানীযোগানৰ ব্যৱস্থা কৰিলে ৷ ৰাইজৰ ক্ষোভ দেখি বিধায়ক দেবেন্দ্ৰ সিঙে হাতযোৰ কৰি ক্ষমা বিচাৰে আৰু গাৱৰ পৰা ওলাই আহে ৷ ৰাইজৰ ভয়ত পলায়ন কৰা বিধায়কে আকৌ নিজ সমষ্টিৰ জনতাৰ ওপৰতে গোচৰ তৰাৰ ঘটনাও সংঘটিত হৈছে উত্তৰ প্ৰদেশত ৷ মুজাফ্ফৰপুৰ অঞ্চলৰ খতোলী সমষ্টিৰ বিজেপি বিধায়ক বিক্ৰম চেইনী ২০ জানুৱাৰীত প্ৰচাৰ চলাবলৈ উপস্থিত হৈছিল মনবৰপুৰ গাৱত ৷ কিন্তু বিধায়কক দেখি গাৱৰ ৰাইজে মুৰ্দাবাদ ধ্বনি দিবলৈ আৰম্ভ কৰে ৷ সেইদিনা বিধায়ক বিক্ৰম চেইনী গাৱখনৰ পৰা উভতি আহে যদিও ২৯ জানুৱাৰীত আকৌ এবাৰ উপস্থিত হয় একেখন গাৱত ৷ এইবাৰ গাৱৰ ৰাইজে তেওক আগভেটি ধৰি প্ৰতিবাদ কৰিবলৈ আৰম্ভ কৰে ৷ স্থানীয় ৰাইজ আৰু বিজেপি কৰ্মীৰ মাজত হতাহতিও লাগে ৷ এই ঘটনাত বিধায়কগৰাকীৰ গাড়ীৰ এখন আইনা চূৰ্ণ বিচূৰ্ণ হৈ যায় ৷ তাৰ পাছত বিধায়কে নিজ সমষ্টিৰ ভোটাৰৰ ওপৰতে গোচৰ তৰে ৷ বিজেপি বিধায়কক খেদি পঠিওৱাৰ ঘটনা ইমানতে শেষ নহয় ৷
মেৰঠৰ চিবলখাছ সমষ্টিৰ বিজেপি প্ৰাৰ্থী মনিন্দৰ পাল ৷ ২১ জানুৱাৰীত তেও নিজ সমষ্টিৰ পথোনী গাৱত উপস্থিত হৈছিল ৷ কিন্তু মনিন্দৰ পালৰ সন্মুখতে ৰাইজে আৰ এল ডি দলৰ মুৰব্বী জয়ন্ত চৌধুৰী জিন্দাবাদ ধ্বনি দিবলৈ আৰম্ভ কৰে ৷ পৰিস্থিতি অনুকূল নেদেখি মনিন্দৰ পাল গাৱখনৰ পৰা উভতি আহে ৷
আছমোলী বিধানসভা সমষ্টিৰ বিজেপি প্ৰাৰ্থী হৰেন্দ্ৰ সিঙো অনুৰূপ বিক্ষোভৰ সন্মুখীন হ’বলগীয়া হৈছে ৷ ২১ জানুৱাৰীত তেও শকৰপুৰ গাৱত উপস্থিত হোৱাৰ লগে লগে গাৱৰ ৰাইজে প্ৰতিবাদ আৰম্ভ কৰে ৷ ভোটাৰসকলে মুকলি ক্ষোভ উজাৰি কয় যে গাজীপুৰ বৰ্ডাৰত বিজেপিয়ে কৃষকৰ বাবে ৰাস্তাত গজাল পুতিছিল ৷ গাৱৰ ৰাইজে সেই কথা এতিয়াও পাহৰি যোৱা নাই ৷ গতিকে এইবাৰ কোনেও বিজেপিক ভোট নিদিয়ে ৷ফিৰোজাবাদৰ জছৰানা সমষ্টিৰ বিজেপি প্ৰাৰ্থী মানবেন্দ্ৰ সিঙৰ পত্নী জ্যোতি কিৰণ নিৰ্বাচনী প্ৰচাৰৰ বাবে সমষ্টিত উপস্থিত হোৱাৰ লগে লগে প্ৰতিবাদৰ সন্মুখীন হয় ৷ যাৰ বাবে বিজেপি প্ৰাৰ্থীৰ পত্নী সমষ্টিৰ পৰা উভতি যাবলগীয়া হয় ৷ প্ৰেমপাল ধনগৰৰ দৰে বিজেপি প্ৰাৰ্থীক আকৌ নিজ দলৰ কৰ্মকৰ্তাই সমষ্টিত প্ৰৱেশত বাধা দিয়াৰ অভিযোগ উঠিছে ৷এনেদৰেই ২০ জানুৱাৰীৰ পৰা ৩০ জানুৱাৰীৰ ভিতৰত মাত্ৰ ১০ দিনত ৯ বিজেপি নেতাই জনতাৰ পৰা খেদা খাবলগীয়া হৈছে ৷ আন দলৰ কোনো প্ৰাৰ্থীৰ ক্ষেত্ৰতে এনে বিৰোধিতা দেখা হোৱা নাই ৷ বিজেপিৰ বিৰুদ্ধে জনতাৰ এই ক্ষোভ ভোটলৈ ৰূপান্তৰ হ;লে বিজেপি যে কঠিন সময়ৰ মুখামুখি হ’ব লাগিব , তাত তিলমানো সন্দেহ নাই ৷