বিশ্ব কাপ ফুটবল —- কোৱাৰ্টাৰ ফাইনেল

এটা দল থাকিল, আনটো আঁতৰিল !!

যেন এপাহ সৰিল, এপাহ ফুলিল ! আমাৰ কালিৰ প্ৰতিবেদনৰ আঁত ধৰি ক’বলৈ গ’লে এটা দল ছেমিলৈ আগবাঢ়িল । আনটোৱে বিদায় ল’লে । আমি ইউৰোপ-লেটিন আমেৰিকাৰ যুঁজৰ কথা কৈছিলো । বিশ্বকাপত এনেকুৱা এখন শীতল যুঁজ চলে বা চলিয়েই থাকে । সেই হিচাপত কালিৰ খেলত ফলাফল ১-১ ! সেয়া ইউৰোপ আৰু লেটিন আমেৰিকা উভয়ৰ সপক্ষে অথবা বিপক্ষে । দুয়োখন খেলেই আছিল একপ্ৰকাৰ যুদ্ধক্ষেত্ৰৰ দৰেই । কোনেও হাৰ মানিব নোখোজে । দুই-একৰ ব্যক্তিগত প্ৰতিভা তাৰ মাজত উদ্ভাসিত হ’লেও প্ৰতিষ্ঠিত হৈছিল দলীয় প্ৰদৰ্শন । গোনা মহৰ যুঁজ, সাপ-নেউল বা গেৰিলা ষ্টাইল, আপুনি যি কোনোৰ সৈতে ৰিজাব পাৰে ! আক্ৰমণ আৰু ৰক্ষণ,—মূলতঃ সেয়াই আচল যুঁজ । তাত গ’ল দিয়াই প্ৰধান লক্ষ্য । এইটো হিচাপত কালি নিশাৰ প্ৰথম দুয়োখন কোৱাৰ্টাৰ ফাইনেল নিৰ্দিষ্ট সময় নালাগে, অতিৰিক্ত সময়তো ফলাফল পোৱা নগ’ল । অৱশেষত টাইব্ৰেকাৰ, য’ত থাকে মাথোঁ দুজন খেলুৱৈ । এজনে শ্বট বা কিক ল’ব আৰু ১১ গজ আঁতৰত থকা প্ৰতিপক্ষগৰাকীয়ে ছেকেণ্ডৰো কম সময়ৰ ভিতৰত সিদ্ধান্ত লৈ ব্যৱস্থা ল’ব লাগে । কিন্তু সেয়াই ফুটবল । তাতেই তাৰ সৌন্দৰ্য আৰু আকৰ্ষণ ।
ক্ৰ’ৱেছিয়াৰ বিৰুদ্ধে অপূৰ্ব এটা গ’ল দি নেইমাৰে ব্ৰাজিলক আগুৱাই নিছিল যদিও শেষৰক্ষা নহ’ল । যোৱাবাৰৰ ৰাণাৰ-আপ ইউৰোপীয়ান প্ৰতিপক্ষই সেই গ’ল পৰিশোধ কৰি খেল টাইব্ৰেকাৰলৈ আগুৱাই নিয়ে । নেইমাৰৰ ট্ৰেজেদী চাওক । মূৰকতগৈ তেওঁ টাইব্ৰেকাৰত কিক ল’বলৈকে নাপালে । পেড্ৰো আৰু কাছেমিৰোৱে গ’ল দিয়াৰ বিপৰীতে মাৰ্কুইনহছৰ কিক পোষ্টত লাগে । আনহাতে ৰড্ৰিগোৰ কিক ক্ৰ’ৱেচিয়াৰ গ’লকীপাৰ লিভাকোভিচে ব্যৰ্থ কৰাত (৪-২ ) পঞ্চমটো কিক লোৱাৰ অৱকাশ নাথাকিল । তেনেদৰেই ৩০ বছৰীয়া প্ৰতিভাৱানগৰাকীয়ে ছেমি ফাইনেলৰ আগেয়েই বিশ্ব কাপত তৃতীয়টো অভিযান সামৰিবলগীয়া হয় । তাৰ আগেয়ে নেইমাৰে অৱশ্যে ব্ৰাজিলৰহৈ কিম্বদন্তী পেলেই দিয়া ৭৭ টা গ’লৰ অভিলেখ স্পৰ্শ কৰে ।

 আজিৰ খেল 
দ্বিতীয় দিনৰ কোৱাৰ্টাৰ ফাইনেলত তিনিটাকৈ ইউৰোপীয় দলৰ লগতে থাকিব আফ্ৰিকাৰ মৰক্কো । ১৯৭৬ চনত কোৱাৰ্টাৰ ফাইনেল খেলা মৰক্কোৱে আফ্ৰিকাৰ প্ৰথমটো দল হিচাপে ছেমিত প্ৰৱেশৰ চেষ্টা চলাব । সেই পথ তেওঁলোকৰ কেনেকুৱা হয়গৈ সেইটো ঠিক হব পৰ্টুগালৰ প্ৰদৰ্শনৰ ভেটিত । তেওঁলোকৰ প্ৰশিক্ষকে আকৌ এবাৰ ক্ৰিষ্টিয়ানো ৰ’নাল্ডোক ১১ জনীয়াৰ তালিকাত ৰাখিব নে, পূৰ্বৰ খেলৰ দৰে তেওঁৰ পৰিৱৰ্তে নামি হেটট্ৰিক কৰা ৰেমছকে বাহাল ৰাখে, সেইটো লক্ষ্য কৰিবলগীয়া হ’ব । কিন্তু বিৰাট অংকৰ সমাহাৰ ঘটিব ইংলেণ্ড-ফ্ৰান্সৰ খেলত । দুয়োটা দলেই সম্ভাব্য বজয়ীৰ তালিকাত । বিশ্বৰ দুখন আগশাৰীৰ লীগৰ ক্লাবত খেলাৰ অভিজ্ঞতা থকা খেলুৱৈৰে পুষ্ট তেওঁলোক । এই পৰ্যন্ত পাঁচটাকৈ গ’ল দিয়া এমবাপেৰ দৰে খেলুৱৈ যদিহে ফৰাচী দলত আছে, তেনেদৰে বোকায়ো ছাকা বা ৰাছফৰ্ডৰ পৰ্যায়ৰ স্ক’ৰাৰ মজুত থাকিব ইংলিছ শিৱিৰত ।