দেওবাৰে সম্পন্ন হৈ গ’ল উত্তৰ প্ৰদেশৰ তৃতীয় পৰ্যায়ৰ ভোটগ্ৰহণ ৷ এইদৰে এতিয়ালৈকে মুঠ ১৭২ টা বিধানসভা সমষ্টিৰ ভোটগ্ৰহণ অনুষ্ঠিত হৈ যায় ৷ বিগত ২০১৭ চনৰ বিধানসভা নিৰ্বাচনত এই ১৭২ টা সমষ্টিৰ ১৪০ টাতে বিজেপিয়ে বিজয় সাব্যস্ত কৰিছিল ৷ বিৰোধীৰ হাতত আছিল মাত্ৰ ৩২ টা সমষ্টি ৷ কিন্তু এইবাৰৰ উত্তৰ প্ৰদেশৰ নিৰ্বাচনত কোনো একপক্ষীয় ঢৌ নাই ৷ এনে পৰিস্থিতিত তৃতীয় পৰ্যায়ৰ ভোটগ্ৰহণৰ সামৰণিত কোন আগত আছে , মুখ্যমন্ত্ৰীত্বৰ দৌৰত কোন আগবাঢ়ি আছে ,
উত্তৰ প্ৰদেশত মুঠ ৭ টা পৰ্যায়ত অনুষ্ঠিত হ’ব ভোটগ্ৰহণ প্ৰক্ৰিয়া ৷ ইয়াৰে তিনিটা পৰ্যায়ৰ ভোটগ্ৰহণৰ ইতিমধ্যে সামৰণি পৰিছে ৷ দেওবাৰে ৫৯ টা বিধানসভা সমষ্টিৰ ভোটগ্ৰহণ অনুষ্ঠিত হৈ যায় ৷ ইয়াকে লৈ মুঠ ১৭২ টা সমষ্টিৰ ভোটগ্ৰহণ এতিয়ালৈকে হৈ গৈছে ৷ কিন্তু নিৰ্বাচনী ছবিখন এতিয়াও পৰিষ্কাৰ হৈ পৰা নাই ৷ ভোটগ্ৰহণৰ হাৰ আৰু বিশেষজ্ঞৰ অভিমতে দুটা পৃথক আলোচনাৰ বাট মুকলি কৰিছে ৷ গতিকে এইবাৰ অখিলেশ যাদৱ আৰু যোগী আদিত্যনাথৰ মাজত কাৰ ভাগ্য মুকলি হয় , সেয়া এতিয়াও অনিশ্চয়তাৰ মাজতে আছে ৷
সামগ্ৰিকভাৱে যদি ভোটদানৰ হাৰলৈ লক্ষ্য কৰা যায় , তেনেহ’লে দেখিবলৈ পোৱা যায় যে বিগত নিৰ্বাচনতকৈ এইবাৰ ভোটদানৰ হাৰ হ্ৰাস পাইছে ৷ দেওবাৰে ৫৯ টা সমষ্টিত ভোটদানৰ হাৰ আছিল ৬১ শতাংশ ৷ কিন্তু ২০১৭ চনত এই সমষ্টিকেইটাত ভোটদানৰ হাৰ আছিল ৬২.২১ শতাংশ ৷ অৰ্থাৎ যোৱাবাৰতকৈ এইবাৰ হ্ৰাস পালে ভোটদানৰ হাৰ ৷ তাৰ পূৰ্বৰ ২০১২ চনত একেকেইটা সমষ্টিত ভোটদানৰ হাৰ আছিল ৫৯.৭৯ শতাংশ ৷ এই পৰিসংখ্যাৰ পৰা দেখা যায় যে ২০১৭ ৰ পাছত সমষ্টিকেইতাত ভোটদান হ্ৰাস পাইছে ৷ পৰিসংখ্যাৰ পৰা আন এটা কথাও দেখা যায় যে তৃতীয় পৰ্যায়ৰ ভোটগ্ৰহন অনুষ্ঠিত হোৱা ৫৯ টা সমষ্টিৰ ৪১ টাতে বিজয় সাব্যস্ত কৰিছিল বিজেপিয়ে ৷ ২০১২ চনত এই ৫৯ টা সমষ্টিৰ ৩৭ টাই দখল কৰিছিল সমাজবাদী পাৰ্টীয়ে ৷ ২০১৭ চনত ভোটদানৰ হাৰ বৃদ্ধি পোৱাৰ লগে লগে সেই সময়ৰ বিৰোধী দল বিজেপি পোনপটীয়াকৈ লাভান্বিত হোৱা দেখা গ’ল ৷ দ্বিতীয় পৰ্যায়ৰ ভোটগ্ৰহণ হোৱা ৫৫ টা সমষ্টিত এইবাৰ ভোটদানৰ হাৰ আছিল ৬৪.৫৩ শতাংশ ৷ ২০১৭ চনত এই সমষ্টিকেইটাত ভোটদান হৈছিল ৬৫.৫৩ শতাংশ ৷ ২০১২ ত একেকেইটা সমষ্টিত ভোটদানৰ হাৰ আছিল ৬৫.১৭ শতাংশ ৷ তাৰ পাছৰ বছৰ ভোটদানৰ হাৰ বৃদ্ধি পোৱাৰ লগে লগে বিজেপি লাভান্বিত হ’ল ৷ এই ট্ৰেণ্ড লক্ষ্য কৰিলে ক’ব পাৰি যে ভোটদানৰ হাৰ হ্রাস পোৱাটো স্থিতাৱস্থা বাহাল থকাৰ লক্ষণ ৷ সমাজবাদী পাৰ্টীৰ পক্ষত বা চৰকাৰৰ বিপক্ষত প্ৰতিষ্ঠানবিৰোধী ভোট নাছিল যেনেই লাগে ৷ কিন্তু নিৰ্বাচন বিশেষজ্ঞসকলে এইক্ষেত্ৰত আগবঢ়াইছে ভিন্ন অভিমত ৷
ৰাজনৈতিক বিশ্লেষক অভয় কুমাৰ ডুবে বিবিচি হিন্দীৰ আগত সদৰী কৰা অনুসৰি এইবাৰ উত্তৰ প্ৰদেশত ডাবল ইঞ্জিনৰ চৰকাৰ প্ৰতিষ্ঠানবিৰোধী ঢৌৰ সন্মুখীন হৈছে ৷ কোনো দ্বিমত নাই যে প্ৰধানমন্ত্ৰী মোদীৰ ভাৱমূৰ্তি লাহে লাহে আদানী – আম্বানীৰ সমৰ্থকৰ দৰে হৈ পৰিছে ৷ তেওৰ আগৰদৰে দুখীয়া – পাছপৰা শ্ৰেণীৰ লোকৰ বাবে ভগৱানৰ ভাৱমূৰ্তি নাই ৷ লগতে গুজৰাট মডেলৰ আকৰ্ষণো এতিয়া নাই ৷মোদী সমৰ্থসকলে মাত্ৰ এটা কথাতে সন্তুষ্টি ব্যক্ত কৰিব পাৰে যে যোগীৰ শাসনকালত উত্তৰ প্ৰদেশৰ মুছলমানসকল শাসনৰ পৰা নিলগত অৱদমিত হৈ আছে ৷ আন আন বিশ্লেষকসকলৰ মতেও বিগত ছটা মাহত উত্তৰ প্ৰদেশৰ ৰাজনৈতিক দৃশ্যপট সম্পূৰ্ণৰূপে সলনি হৈ গৈছে ৷ পশ্চিম উত্তৰ প্ৰদেশত ৰাকেশ টিকেইটৰ নেতৃত্বত হোৱা কৃষক বিদ্ৰোহ আৰু পূৱ উত্তৰ প্ৰদেশত সুহলদেৱ ভাৰতীয় সমাজ পাৰ্টীয়ে বিজেপিৰ বিৰিদ্ধে গ্ৰহণ কৰা স্থিতিয়ে উত্তৰ প্ৰদেশৰ নিৰ্বাচনী ৰাজনীতিক নতুন মাত্ৰা দিছে ৷ ইয়াৰ বাহিৰেও বহুজন সমাজ পাৰ্টীৰ কেবাগৰাকীও দলিত নেতাই এইবাৰ সমাজবাদী পাৰ্টীত যোগদান কৰিছে ৷ সাতে পাঁচে মিলি ২০১৭ ৰ তুলনাত এইবাৰ সমাজবাদী পাৰ্টীৰ জোটবন্ধন বহু পৰিমানে শক্তিশালী ৷ কিন্তু যাদৱ সম্প্ৰদায়ৰ বাহিৰে আন অ’ বি চি সম্প্ৰদায়ৰ ভোট সমাজবাদী পাৰ্টীয়ে কিমান পৰিমানে লাভ কৰে , তাৰ ওপৰত অখিলেশ যাদৱৰ ভাগ্য বহুগুণে নিৰ্ভৰ কৰিব ৷ লগতে দলিত সমাজৰ ভোট বিজেপিয়ে আকৰ্ষিত কৰিব পৰাৰ ওপৰতে যোগী আদিত্যনাথৰ ভৱিষ্যত নিৰ্ভৰ কৰিছে ৷ কাৰণ জাট আৰু মুছলমান সমাজে এইবাৰ সমাজবাদী পাৰ্টী আৰু ৰাষ্ট্ৰীয় লোকদলৰ পক্ষ গ্ৰহণ কৰাটো প্ৰায় নিশ্চিত হৈছে ৷ তৃতীয় পৰ্যায়ৰ পাছৰ পৰা যাদৱ বহিৰ্ভূত ভোট আৰু দলিত ভোটৰ ওপৰতে নিৰ্ভৰ কৰিব যে এইবাৰ উত্তৰ প্ৰদেশত শাসনলৈ কোন আহিব ৷
Crosscurrent is an independent newsroom that produces investigative and analytical reporting with dedication. Crosscurrent is founded to uncover the truth behind the important issues. Crosscurrent is founded to cover the issues that matter.