Investigative reporting with dedication.
এতিয়া প্ৰৱল বৃষ্টিপাতে বুৰাই পেলাইছে দিল্লীৰ বিস্তীৰ্ণ অঞ্চল। আন অঞ্চলৰ কথাটো বাদেই ইন্দিৰা গান্ধী আন্তর্জাতিক বিমানবন্দৰটো কার্যতঃ ছুইমিং পুললৈ পর্যবসিত হৈছে৷ শনিবাৰে পুৱাৰ ভাগত অহা প্রবল বৰষুণজাকে বিমানবন্দৰটোৰ বৃহৎ এলেকা প্লাৱিত কৰাৰ পাছত বেয়া বতৰৰ বাবে কর্তৃপক্ষই পাঁচখনকৈ বিমানৰ উৰণ ডাইভার্ট কৰে৷ ইয়াৰ সমান্তৰালভাৱে পানীয়ে বুৰাই পেলোৱা এলেকাসমূহলৈ স্বাভাৱিক অৱস্থা ঘূৰাই আনিবলৈ যুদ্ধকালীনভাৱে চেষ্টা অব্যাহত ৰাখিছে বিমানবন্দৰৰ সংশ্লিষ্ট কর্মচাৰীৰ দলে৷ সংবাদ প্রতিষ্ঠানৰ বাতৰি অনুসৰি দিল্লীৰ আৰ কে পুৰম, মধু বিহাৰ, হৰি নগৰ, বিকাশ মার্গ, মুনির্কা, বদৰপুৰকে ধৰি বহু অভিজাত অঞ্চল সন্ধিয়া পর্যন্ত বৰষুণৰ পানীত বুৰ গৈ আছে৷ প্রবল বৃষ্টিপাতে ব্যাহত কৰিছে ৰাজধানী মহানগৰখনৰ স্বাভাৱিক জীৱনযাত্রা৷ আনকি ৰাজপথত আবদ্ধ একাংশ যান-বাহন আধা অংশ পর্যন্ত পানীয়ে বুৰাই পেলায়৷ উত্তৰ প্রদেশৰ মথুৰা অভিমুখী এনে এখন বাছ পালম উৰণীয়া সেতুৰ সমীপত আবদ্ধ হৈ পৰাত তাত থকা ৪০জন যাত্রীক উদ্ধাৰ কৰাৰ বাবে দিল্লী অগ্ণিসেৱা বাহিনীৰ দল নিয়োজিত কৰিবলগীয়া হয়৷ দেশৰ ৰাজধানী মহানগৰখনত সৃষ্টি হোৱা এনে অভাৱনীয় পৰিস্থিতিৰ মূলতে প্রবল বৃষ্টিপাত বুলি সদৰী কৰিছে ভাৰতীয় বতৰ বিজ্ঞান বিভাগে৷ দিল্লীত সাধাৰণতে ১ জুনত বর্ষকাল আৰম্ভ হৈ ২৫ ছেপ্ঢেম্বৰত ইয়াৰ অন্ত পৰে৷
