কাজিৰঙাত কিয় চৰকাৰী মাটি লৈছিল ৰিণিকি ভূঞা শৰ্মাই ?

মুখ্যমন্ত্ৰীৰ পত্নী ৰিণিকি ভূঞা শৰ্মাৰ কোম্পেনীৰ বৃহৎ ভূমি কেলেংকাৰিয়ে  ৰাজ্যৰ ৰাজনীতিত চাঞ্চল্যৰ সৃষ্টি কৰিছে ৷ ৰাষ্ট্ৰীয় পৰ্যায়তো বিষয়টো লৈ সৰৱ চৰ্চা চলিছে ৷নিখিল ভাৰত কংগ্ৰেছ কমিটীয়ে এই কেলেংকাৰিৰ তদন্তৰ বাবে এছ আই টি গঠনৰ দাবী উত্থাপণ কৰিছে ৷ তদন্ত সম্পূৰ্ণ নোহোৱালৈ মুখ্যমন্ত্ৰী হিমন্ত বিশ্ব শৰ্মাক মুখ্যমন্ত্ৰীৰ পদৰ পৰা বৰ্খাস্ত কৰাৰ বাবেও দাবী জনাইছে এ আই চি চিয়ে  ৷ ইতিমধ্যে অনিয়মেৰে চৰকাৰী ভূমি ক্ৰয়-বিক্ৰয়ৰ ঘটনাৰ সঠিক তদন্তৰ দাবীত সৰৱ হৈ উঠিছে  ৰাজ্যৰ প্ৰধান বিৰোধী দল কংগ্ৰেছকে ধৰি অসম জাতীয় পৰিষদ আৰু ৰাইজৰ দল ৷ মুখ্যমন্ত্ৰীৰ পত্নী ৰিণিকি ভূঞা শৰ্মাই প্ৰতিষ্ঠা কৰা কোম্পেনী আৰ বি এছ ৰিয়েল্টৰ্ছ প্ৰাইভেট লিমিটেডে চৰকাৰী আৰু চিলিঙ চৰকাৰী মুঠ ২৯ বিঘা ৯ লেচা ভূমি হস্তগত কৰাৰ তথ্য পোহৰলৈ আহিছিল ‘দ্য ক্ৰছকাৰেন্ট’ আৰু ‘দ্য ৱায়াৰ’ৰ অনুসন্ধানত ৷ কিন্তু মুখ্যমন্ত্ৰীৰ পৰিয়ালে চৰকাৰী মাটি হস্তগত কৰাৰ এইটোৱে প্ৰথম ঘটনা নহয় ৷ ইয়াৰ পূৰ্বেও চৰকাৰী মাটিৰ আৱন্টন নিজৰ নামত লৈ ঘূৰাই দিবলগীয়া হৈছিল মুখ্যমন্ত্ৰীৰ পৰিয়ালে ৷
এই ঘটনাৰ সময় ২০০৭ চন ৷ৰিণিকি ভূঞা শৰ্মা আৰু ৰঞ্জিত ভট্টাচাৰ্যই প্ৰতিষ্ঠা কৰা আৰ বি এছ ৰিয়েল্টৰ্ছ প্ৰাইভেট লিমিটেডে ৰাজহুৱা অনুষ্ঠানৰ ভূমি ক্ৰয় অভিযান আৰম্ভ কৰিছে ৷ উত্তৰ গুৱাহাটীত ইতিমধ্যে ক্ৰয় কৰিছে ফিচাৰীৰ নামত অসম চৰকাৰে আৱন্টন দিয়া ৭ বিঘা ৪ কঠা ৫ লেচা মাটি ৷ সেই সময়তে কাজিৰঙাত আন এডোখৰ বহুমূলীয়া ভূমি আৱন্টন দিয়া হয় হিমন্ত বিশ্ব শৰ্মাৰ পত্নী ৰিণিকি ভূঞা শৰ্মাক ৷কাজিৰঙাৰ হালোৱা ননকে গাঁৱত প্ৰত্যক্ষভাৱে ৰিণিকি ভূঞা শৰ্মাক ৭ বিঘা ৪ কঠা ৫ লেচা চৰকাৰী মাটি আৱন্টন দিয়া হয় ৷ মাটি আৱন্টনৰ নথিত স্পষ্টভাৱে উল্লেখ আছে যে হোটেল আৰু ৰিজ’ৰ্ট খুলিবৰ বাবে এই মাটি আৱন্টন দিয়া হৈছে ৷

অসম চৰকাৰৰ ভূমি আৰু ৰাজহ বিভাগৰ ধৰিত্ৰী পোৰ্টেলৰ তথ্য অনুসৰি ,২০০৭ চনৰ ১৩ মাৰ্চত অসম চৰকাৰৰ ৰাজহ বিভাগে দিয়া পত্ৰ নং আৰ এছ এছ ১৫৭৩/২০০৬/১৪ , গোলাঘাট জিলাৰ উপায়ুক্তৰ ১৬ মাৰ্চৰ পত্ৰ নং জি আৰ এছ ৫৩/২০০৬ /১৮ আৰু বোকাখাত মহকুমাধিপতিৰ ১৭ মাৰ্চৰ পত্ৰ নং পত্ৰ বি আৰ এছ ১৪/২০০৬ /১৩ অনুসৰি কাজিৰঙাত ৰিণিকি ভূঞা শৰ্মাক এই মাটি আৱন্টন দিয়া হৈছিল ৷ কাজিৰঙাৰ হালোৱা ননকে গাঁৱত ৰিণিকি ভূঞা শৰ্মাক ৭ বিঘা ৪ কঠা ৫ লেচা চৰকাৰী মাটি আৱন্টন দিয়া হয় ৷ আৱন্টিত মাটিৰ পট্টা নং ২৫ আৰু দাগ নম্বৰ হ’ল ১৯৩,২২৪ আৰু ২২৫  (হালোৱা এন. চি. গাঁৱৰ পট্টা নং ২৫ত এই আৱন্টনৰ সবিশেষ উল্লেখ আছে) ৷ হোটেল আৰু ৰিজোৰ্ট নিৰ্মানৰ বাবে আৱন্টিত মাটিৰ বাবদ ৰিণিকি ভূঞা শৰ্মাই ১৬ মাৰ্চত ৫ লাখ ৪৪ হাজাৰ ৭৯০ টকা প্ৰিমিয়াম আদায় দিয়ে ৷

মন্ত্ৰী পত্নীলৈ ভূমি আৱন্টনৰ এই তথ্য পোহৰলৈ আহিছিল ২০১১ চনৰ ফেব্ৰুৱাৰী মাহত ৷ সেই বছৰৰ ১৫ ফেব্ৰুৱাৰীত অসম চৰকাৰৰ সকলো মন্ত্ৰীয়ে নিজৰ আৰু পৰিয়ালৰ সম্পত্তিৰ তথ্য ৰাজহুৱা কৰিছিল ৷ কিন্তু তেতিয়াৰ ক্ষমতাশালী মন্ত্ৰী ড: হিমন্ত বিশ্ব শৰ্মাই লুকুৱাই ৰাখিছিল পত্নীৰ নামত কাজিৰঙাত থকা মাটিৰ তথ্য ৷ আৰ টি আইযোগে এই তথ্য পোহৰলৈ আনিছিল তেতিয়াৰ কৃষক মুক্তি সংগ্ৰাম সমিতিৰ সাধাৰণ সম্পাদক অখিল গগৈয়ে ৷ লুকুৱাই ৰখা সম্পত্তিৰ তথ্য উদ্ঘাটন হোৱাৰ পাছতেই ৰিণিকি ভূঞা শৰ্মাই ৰিজ’ৰ্ট খুলিবলৈ লোৱা চৰকাৰী মাটি ওভতাই দিবলৈ বাধ্য হৈছিল ৷ গোলাঘাট জিলাৰ ২০১১ চনৰ ৩ মাৰ্চৰ উপায়ুক্তৰ পত্ৰ নং জি আৰ এছ ১২/২০১১ /১০ আৰু বোকাখাতৰ চক্ৰ বিষয়াৰ ৪মাৰ্চৰ আদেশ মৰ্মে ৰিণিকি ভূঞা শৰ্মাৰ নামত আৱন্টিত ৭ বিঘা ৪ কঠা ৫ লেচা মাটি পুনৰ চৰকাৰী কৰা হয় ৷

ৰিণিকি ভূঞা শৰ্মাৰ কাজিৰঙাত কেৱল চৰকাৰী আৱন্টিত ভূমিয়েই নাছিল , আন কেবাঠাইতো তেওৰ ভূ সম্পত্তি আছিল ৷ হালোৱা ননকে গাঁৱতে আছিল ৪ বিঘা ৪ কঠা ১২ লেচা মাটি ৷ এই মাটিৰ পট্টা নং ১৩ আৰু দাগ নং- ১৮৬ , ১৮৭ ৷ মাটিখিনি পাছত বিক্ৰীৰ জড়িয়তে নামজাৰি হয় ৰঞ্জিত ভট্টাচাৰ্যৰ নামত ৷ নক’লেও হয় যে এইজন ৰঞ্জিত ভট্টাচাৰ্যই আৰ বি এছ ৰিয়েল্টৰ্ছৰ প্ৰতিষ্ঠাপক সঞ্চালক আৰু বৰ্তমানৰ ৰাজ্যিক বিজেপিৰ কিষাণ মৰ্চাৰ উপ- সভাপতি ৷ তেওৰ সঞ্চালকাধীন কোম্পেনী আৰ বি এছে উত্তৰ গুৱাহাটীত ৰাজহুৱা প্ৰতিষ্ঠানৰ নামত আৱন্টিত ভূমি আৰু পলাশবাৰীতো চিলিঙ চৰকাৰী মাটি অবৈধভাৱে ক্ৰয় কৰাৰ তথ্য পোহৰলৈ আহিছিল ‘দ্য ক্ৰছকাৰেন্ট ‘ আৰু ‘দ্য ৱায়াৰ’ৰ যৌথ অনুসন্ধানত ৷অনিয়মেৰে ভূমি ক্ৰয় বিক্ৰয় কৰা আৰ বি এছ ৰিয়েল্টৰ্ছ বৰ্তমান পৰিচিত বশিষ্ঠ ৰিয়েল্টৰ্ছ নামেৰে ৷য’ত বৰ্তমান সৰ্বাধিক ব্যক্তিগত অংশীদাৰীত্ব আছে মুখ্যমন্ত্ৰীৰ পুত্ৰ নন্দিল বিশ্ব শৰ্মাৰ ৷
কাজিৰঙাৰ হালোৱা ননকে গাঁৱত ৰঞ্জিত ভট্টাচাৰ্যৰ নামত নামজাৰি হোৱা ৪ বিঘা ৪ কঠা ১২ লেচা মাটিৰো আছে এক ৰহস্যজনক ইতিহাস ৷ ধৰিত্ৰী পোৰ্টেলৰ তথ্য অনুসৰি ,এই মাটি ২০০৫ চনৰ ২ মে’ত প্ৰিমিয়াম জমা দিয়াত ম্যাদী কৰা হৈছিল ৷ অৰ্থাৎ মাটিখিনি আছিল চৰকাৰী ৷ কিন্তু আৱন্টিত মাটি ২০০৫ চনৰে নৱেম্বৰ মাহত বিক্ৰী কৰি দিয়া হয় ৷ ধৰিত্ৰী পোৰ্টেলত উল্লেখ থকা অনুসৰি এই মাটিখিনি পৰৱৰ্তী সময়ত ৰিণিকি ভূঞা শৰ্মা আৰু ৰিণিকি ভূঞা শৰ্মাৰ পাছত ৰঞ্জিত ভট্টাচাৰ্যৰ নামত নামজাৰি হয় ৷ বৰ্তমান এই মাটিৰ গৰাকী আৰ বি এছ ৰিয়েল্টৰ্ছৰ সঞ্চালক ৰঞ্জিত ভট্টাচাৰ্য ৷
কাজিৰঙাৰ হালোৱা ননকে গাঁৱতে নহয় , তাৰ লগতে লাগি থকা চেপেনা কোবোৱা গাঁৱতো আছিল ৰিণিকি ভূঞা শৰ্মাৰ নামত তিনিটাকৈ মাটিৰ প্লট ৷চেপেনা কোবোৱা গাৱত ২১ নং পট্টাৰ ৩৩৯ নং দাগত আছিল ৪ কঠা ১৩ লেচা মাটি ৷ একেখন গাঁৱৰে ১২২ নং পট্টাৰ ৩৩৭ নং দাগত আছিল ১ কঠা ১৪ লেচা মাটি ৷ ইয়াৰ উপৰি ৭৫ নং পট্টাৰ ৪৩৬ নং দাগত আছিল ২ কঠা ৩ লেচা মাটি ৷ এইদৰে ৰিণিকি ভূঞা শৰ্মাৰ নামত চেপেনা কোবোৱা গাঁৱত মুঠ ১ বিঘা ৩ কঠা ১০ লেচা মাটি আছিল ৷এই মাটিও পাছত খৰিদা সূত্ৰে নামজাৰি হয় ৰঞ্জিত ভট্টাচাৰ্যৰ নামত ৷ অৰ্থাৎ কাজিৰঙাত ৰিণিকি ভূঞা শৰ্মাৰ নামত থকা ৬ বিঘা ৩ কঠা ২ লেচা মাটিৰ বৰ্তমানৰ গৰাকী হ’ল ৰঞ্জিত ভট্টাচাৰ্য ৷ তাৎপৰ্যপূৰ্ণভাৱে একেটা দিনতে সমুদায় মাটি নামজাৰি হৈছিল আৰ বি এছ ৰিয়েল্টৰ্ছৰ সঞ্চালক ৰঞ্জিত ভট্টাচাৰ্যৰ নামত ৷ তাৰিখটো আছিল ৩ মাৰ্চ ২০১০ ৷

কাজিৰঙাত আৱন্টিত ৭ বিঘা ৪ কঠা ৫ লেচা চৰকাৰী মাটি ঘূৰাই দিবলৈ বাধ্য হৈছিল ৰিণিকি ভূঞা শৰ্মা ৷ বিষয়টো পোহৰলৈ অহাৰ পাছত সংবাদ মাধ্যমত ব্যাপক চৰ্চা হোৱাৰ বাবেই হয়তো ৰিজ’ৰ্ট খুলিবলৈ লোৱা চৰকাৰী মাটি তেও ঘূৰাই দিবলৈ বাধ্য হৈছিল ৷ তাৰ পাছত কাজিৰঙাত তেওৰ নামত থকা আন ৬ বিঘা ৩ কঠা ২ লেচা মাটিৰ স্বত্বও সলনি কৰা হৈছিল ৷ এতিয়া ‘দ্য ক্ৰছকাৰেন্ট ‘ আৰু ‘দ্য ৱায়াৰ’ৰ অনুসন্ধানত ২৯ বিঘা ৯ লেচা ভূমি অনিয়মেৰে ক্ৰয় কৰাৰ তথ্য পোহৰলৈ অহাৰ পাছত মুখ্যমন্ত্ৰীৰ পৰিয়ালে কি পদক্ষেপ লয় , তাৰ ওপৰত ৰাজ্যবাসীৰ দৃষ্টি নিবদ্ধ হৈ আছে ৷