Investigative reporting with dedication.
পঞ্জাৱৰ মুখ্যমন্ত্ৰী অমৰিন্দৰ সিঙৰ প্ৰধান উপদেষ্টা পদৰ পৰা পদত্যাগ কৰিছে ৰাজনৈতিক ৰণনীতিকাৰ প্ৰশান্ত কিশোৰে ৷ আজি এক পত্ৰযোগে নিজৰ পদত্যাগৰ কথা ৰাজহুৱা কৰি প্ৰশান্ত কিশোৰে কয় -“আপোনাৰ প্ৰধান উপদেষ্টা পদৰ পৰা পদত্যাগ কৰিলো ৷ এই দায়িত্বৰ পৰা মই অব্যাহতি বিচাৰিছো ৷”
উল্লেখ্য যে যোৱা মাৰ্চ মাহত প্ৰশান্ত কিশোৰক মুখ্যমন্ত্ৰীৰ প্ৰধান উপদেষ্টা হিচাপে নিযুক্তি দিয়াৰ কথা ঘোষণা কৰিছিল অমৰিন্দৰ সিঙে ৷ কিন্তু তাৰ পাছৰে পৰা পঞ্জাৱ কংগ্ৰেছত বিদ্ৰোহৰ সূচনা হয় ৷ অৱশেষত নৱোজিৎ সিঙ সিদ্ধুক পঞ্জাৱ প্ৰদেশ কংগ্ৰেছৰ সভাপতি হিচাপে নিযুক্তি দিয়ে কংগ্ৰেছ হাইকামাণ্ডে ৷ এই সময়ছোৱাত প্ৰশান্ত কিশোৰে কেবাবাৰো ৰাহুল গান্ধী আৰু প্ৰিয়ংকা গান্ধীক সাক্ষাৎ কৰে ৷ আনকি ৰাজনৈতিক ৰণনীতিকাৰগৰাকীয়ে কংগ্ৰেছ দলত যোগদান কৰাক লৈও চৰ্চা আৰম্ভ হয় ৷ এনে সময়তে পঞ্জাৱৰ মুখ্যমন্ত্ৰীৰ প্ৰধান উপদেষ্টা পদৰ পৰা পদত্যাগ কৰাৰ পাছত তেওৰ পৰৱৰ্তী ভূমিকা লক্ষ্যণীয় হৈ পৰিছে ৷
