কিয় ‘ভাৰত জোড়ো’ত সংগ নিদিয়ে অখিলেশ যাদৱে?

নিজৰ ৰাজ্যতে নিঃসংগ হ’ব ৰাহুল গান্ধী !
উত্তৰ প্ৰদেশত ৰাহুল গান্ধীক সংগ নিদিয়ে কোনেও !
উপস্থিত নাথাকে অখিলেশ যাদৱ !’ভাৰত জোড়ো’ যাত্ৰাৰ দ্বিতীয় পৰ্যায় আৰম্ভ হ’ব অহা ৩ জানুৱাৰীত৷ইতিমধ্যে প্ৰথম পৰ্যায়ৰ যাত্ৰা বিগত ৭ ছেপ্তেম্বৰত আৰম্ভ হৈছিল আৰু লালকিল্লাত বিগত ২৪ ডিচেম্বৰত অন্ত পৰিছে৷নববৰ্ষ উদযাপনৰ বাবে দলৰ কৰ্মকৰ্তাক সময় দিয়াৰ বাবে যাত্ৰা ৯ দিনৰ বাবে স্থগিত ৰখা হয়৷অহা ৩ জানুৱাৰীত আৰম্ভ হ’বলগীয়া পদযাত্ৰালৈ কংগ্ৰেছ দলে উত্তৰ প্ৰদেশৰ সকলো বিজেপি বিৰোধী শক্তিৰ প্ৰতিনিধিক আমন্ত্ৰণ জনাইছিল৷
উত্তৰ প্ৰদেশৰ গাজিয়াবাদৰ লনী অঞ্চলৰ পৰা অহা ৩ জানুৱাৰীত যাত্ৰা পুনৰ আৰম্ভ হ’ব৷

সমাজবাদী পাৰ্টিৰ ৰাষ্ট্ৰীয় সাধাৰণ সম্পাদক ৰাজেন্দ্ৰ চৌধুৰীয়ে কয় “সমাজবাদী পাৰ্টিৰ ৰাষ্ট্ৰীয় সভাপতি অখিলেশ যাদৱে অকলেই চৰকাৰৰ বিৰুদ্ধে যুঁজ দি গৈছে৷কিন্তু তেওঁ সেই দিন কেইটাত নিজৰ কিছুমান কাৰ্যসূচীত ব্যস্ত থাকিব৷সেয়ে হয়তো তেওঁ যাত্ৰাত সহযোগিতা কৰাৰ আশা কম৷”

অৱশ্যে সমাজবাদী পাৰ্টিৰ নেতা অখিলেশ যাদৱে এই যাত্ৰাত সহযোগিতা আগবঢ়োৱাৰ আশা কম যদিও দলটোৰ ৰাষ্ট্ৰীয় সাধাৰণ সম্পাদক প্ৰফেচৰ ৰামগোপাল যাদৱে ‘ভাৰত জোড়ো ‘ যাত্ৰাত ক’ভিড প্ৰ’টকলৰ বিষয়টো উত্থাপন কৰি কয় “ দেশৰ ক’তো ক’ভিড হোৱা নাই অথচ ক’ভিডৰ দোহাই দি কেন্দ্ৰীয় চৰকাৰে যাত্ৰা বন্ধ কৰিব খুজিছে৷”

আনহাতে,ৰাষ্ট্ৰীয় লোক দলৰ ৰাষ্ট্ৰীয় আহ্বায়ক অনুপম মিশ্ৰই কয় “ আমি কংগ্ৰেছ দলৰ পৰা আমন্ত্ৰণ লাভ কৰিছোঁ৷কিন্তু আমাৰ দলৰ সভাপতি জয়ন্ত চৌধুৰীয়ে আগৰেপৰা তেওঁৰ নিৰ্দিষ্ট হৈ থকা অনুষ্ঠানত ব্যস্ত থাকিবলগীয়া হোৱাৰ বাবে অনুষ্ঠানত উপস্থিত থাকিব নোৱাৰিব৷”

কিন্তু দুয়োগৰাকী নেতা ক্ৰমে সমাজবাদী দলৰ অখিলেশ যাদৱ আৰু ৰাষ্ট্ৰীয় লোকদলৰ জয়ন্ত চৌধুৰীয়ে ৰাহুল গান্ধীৰ নেতৃত্বত অনুষ্ঠিত হৈ থকা ভাৰত জোড়ো যাত্ৰালৈ শুভেচ্ছা জনাইছে৷