উচ্চতম ন্যায়ালয়ে খাৰিজ কৰা ধাৰাত ‘দ্য ক্ৰছকাৰেন্ট’ৰ বিৰুদ্ধে গোচৰ কিয় ?

অসমীয়া ডিজিটেল সংবাদ মাধ্যম ‘দ্য ক্ৰছকাৰেন্ট’ৰ বিৰুদ্ধে শুকুৰবাৰে দিছপুৰ থানাত এখন এজাহাৰ দাখিল কৰিছে অসম চৰকাৰৰ তথ্য আৰু জনসংযোগ বিভাগৰ সঞ্চালকে ৷ অতি আশ্চৰ্যজনকভাৱে সঞ্চালকগৰাকীয়ে উচ্চতম ন্যায়ালয়ে ইতিমধ্যে খাৰিজ কৰা তথ্য – প্ৰযুক্তি আইনৰ ৬৬(এ) ধাৰাৰ অধীনত গোচৰ ৰুজু কৰাৰ বাবে আবেদন জনাইছে ৷ এজাহাৰখনত এইবুলিও কোৱা হৈছে যে ‘দ্য ক্ৰছকাৰেন্টে’ উদ্দেশ্যপ্ৰণোদিতভাৱে জনসংযোগ বিভাগৰ মন্ত্ৰী পীয়ূষ হাজৰিকা আৰু তথ্য আৰু জনসংযোগ বিভাগৰ ভাবমূৰ্তি ম্লান কৰিব বিচাৰিছে ৷ চৰকাৰী বিভাগটোৰ এই অভিযোগ সন্দৰ্ভত ‘দ্য ক্ৰছকাৰেন্ট’ৰ তৰফৰ পৰা স্পষ্ট কৰি দিয়া হয় যে কোনো মন্ত্ৰী , কোনো বিভাগৰ ভাবমূৰ্তি ম্লান কৰিবৰ বাবে ‘দ্য ক্ৰছকাৰেন্টে’ বাতৰি পৰিৱেশন কৰা নাই ৷ ‘দ্য ক্ৰছকাৰেন্টে ‘প্ৰশ্ন উত্থাপন কৰিছিল শেহতীয়াকৈ বিতৰ্কৰ আওতাত সোমাই পৰা মুখ্যমন্ত্ৰীৰ ফটো সম্বলিত দুখন হোৰ্ডিঙক লৈ ৷ অলিম্পিকৰ পদক বিজয়ী বক্সাৰ লাভলীনা বৰগোহাঁইক শুভেচ্ছা জ্ঞাপন আৰু লোকপ্ৰিয় গোপীনাথ বৰদলৈৰ প্ৰতি শ্ৰদ্ধাঞ্জলি তৰ্পনেৰে বাটে পথে লগোৱা মুখ্যমন্ত্ৰীৰ ফটো সম্বলিত দুখন হোৰ্ডিঙ শেহতীয়াকৈ ব্যাপক সমালোচনাৰ সন্মুখীন হৈছিল ৷ যাৰ বাবে মুখ্যমন্ত্ৰীগৰাকীয়ে তেওৰ কাৰ্যালয়ৰ অনুমতি নোলোৱাকৈ ফটো ব্যৱহাৰ নকৰিবলৈ সকীয়ণি পৰ্যন্ত দিবলগীয়া হৈছিল ৷ মুখ্যমন্ত্ৰীৰ এই নিৰ্দেশনাৰ আধাৰতে শুকুৰবাৰে প্ৰচাৰিত এটা বাতৰিত ‘দ্য ক্ৰছকাৰেন্টে’ প্ৰশ্ন উত্থাপন কৰিছিল যে অসম চৰকাৰৰ জনসংযোগ বিভাগৰ জড়িয়তে যদি এই হোৰ্ডিঙসমূহ প্ৰচাৰ কৰা হৈছিল , তেনেহ’লে মুখ্যমন্ত্ৰীৰ এই সকীয়ণি মন্ত্ৰী পীয়ূষ হাজৰিকালৈ নেকি ? কিন্তু জনসংযোগ বিভাগে আজিও ৰাজহুৱা নকৰিলে যে মুখ্যমন্ত্ৰীৰ ভাবমূৰ্তিত আঘাত হানিব পৰা হোৰ্ডিঙ প্ৰকৃততে কোনে প্ৰচাৰ কৰিছিল ৷তাৰ সলনি উচ্চতম ন্যায়ালয়ে বাতিল কৰা ধাৰাত গোচৰ ৰুজু কৰাৰ আৰ্জিৰে ‘দ্য ক্ৰছকাৰেন্ট’ৰ বিৰুদ্ধে এজাহাৰ দাখিল কৰিলে ৷ আশ্চৰ্যজনক কথাটো হ’ল , তথ্য আৰু জনসংযোগ বিভাগে তথ্য – প্ৰযুক্তি আইন , ২০০০ ৰ ৬৬ (এ) ধাৰাৰ অধীনত ‘দ্য ক্ৰছকাৰেন্ট’ৰ বিৰুদ্ধে গোচৰ ৰুজু কৰিবলৈ কৈছে ৷ কিন্তু তথ্য প্ৰযুক্তি আইনৰ উক্ত ধাৰাৰ ব্যাপক অপপ্ৰয়োগ প্ৰত্যক্ষ কৰি উচ্চতম ন্যায়ালয়ে ২০১৫ চনতে এই ধাৰা খাৰিজ কৰি থৈছে ৷তাৰ পাছতো উক্ত ধাৰাৰ অধীনত গোচৰ ৰুজু হৈ থকা দেখি চলিত বৰ্ষৰ ৫ জুলাইত ন্যায়াধীশ আৰ এফ নাৰিমনৰ বিচাৰপীঠে আশ্চৰ্য প্ৰকাশ কৰিছিল ৷ ইয়াৰ পাছত ১৪ জুলাইত ভাৰত চৰকাৰৰ গৃহমন্ত্ৰালয়ে সকলো ৰাজ্যৰ মুখ্য সচিব আৰু আৰক্ষী সঞ্চালক প্ৰধানলৈ এক পত্ৰ প্ৰেৰণ কৰি তথ্য – প্ৰযুক্তি আইনৰ ৬৬(এ) ধাৰাৰ অধীনত কোনো গোচৰ ৰুজু নকৰিবলৈ নিৰ্দেশ দিয়ে ৷ ২ আগষ্টত উচ্চতম ন্যায়ালয়ে এইক্ষেত্ৰত পুণৰ কঠোৰ স্থিতি গ্ৰহণ কৰি সকলো ৰাজ্যলৈ জাননী প্ৰেৰণ কৰে৷ ইয়াৰ পাছতো অসম চৰকাৰৰ তথ্য আৰু জনসংযোগ বিভাগে উচ্চতম ন্যায়ালয়ে খাৰিজ কৰা ধাৰাত’ দ্য ক্ৰছকাৰেন্ট’ৰ বিৰুদ্ধে গোচৰ ৰুজু কৰিবলৈ কোৱাটো কেৱল ভীতি প্ৰদৰ্শনেই নহয় , উচ্চতম ন্যায়ালয়ৰ নিৰ্দেশৰ মুকলি উলংঘনো ৷ আইনৰ এনে অপপ্ৰয়োগৰ বিৰুদ্ধে গণতন্ত্ৰ আৰু ন্যায় ব্যৱস্থাৰ প্ৰতি শ্ৰদ্ধাশীল সকলো লোককে থিয় হ’বলৈ ‘দ্য ক্ৰছকাৰেন্টে’ আহ্বান জনায় ৷