কংগ্ৰেছ অবিহনে নহয় , কংগ্ৰেছৰ নেতৃত্বতো নহয় – বিৰোধী ৰাজনীতিৰ এই সমীকৰণ কাৰ্যত: স্পষ্ট হৈ উঠিছে৷ পশ্চিমবংগৰ মুখ্যমন্ত্ৰী মমতা বেনাৰ্জী আৰু এন চি পিৰ মুৰব্বী শাৰদ পাৱাৰৰ বৈঠকৰ পাছতে দিল্লীৰ ক্ষমতাৰ অলিন্দত এই কথাই প্ৰতিধ্বনিত হৈছে ৷ চৰ্চা চলিছে যে মমতা বেনাৰ্জী আৰু শাৰদ পাৱাৰ এটা কথাত সহমতত উপনীত হৈছে যে কংগ্ৰেছক বাদ দি দেশত বিৰোধী মহাজোঁট গঠন কৰাটো সম্ভৱ নহয় , একেদৰে কংগ্ৰেছৰ নেতৃত্বতো মহাজোঁটত চামিল হ’ব পৰা নাযাব ৷ যদিহে নতুনকৈ বিৰোধী ঐক্য গঠন হয় , তেনেহ’লে আন পাঁচটা আঞ্চলিক দলৰ নিচিনাকৈ কংগ্ৰেছো এই জোঁটৰ অংশীদাৰ হ’ব লাগিব ৷ কংগ্ৰেছ আৰু বিজেপিৰ যিসমূহ আসনত পোনপটীয়া প্ৰতিদ্বন্দিতা আছে , তাত আন দলসমূহে কংগ্ৰেছক সহায় কৰিব ৷ আনহাতে , যিসমূহ ৰাজ্যত বিজেপিৰ মূল প্ৰতিদ্বন্দী হ’ল আঞ্চলিক দল ,তাত কংগ্ৰেছে এৰা ধৰা কৰিব লাগিব ৷ এই নীতিৰেই বিৰোধী দলসমূহৰ মিত্ৰজোট গঠনৰ পোষকতা কৰিছে মমতা বেনাৰ্জী আৰু শাৰদ পাৱাৰে ৷
আৰ্হি হিচাপে তেওলোকে তুলি ধৰিব বিচাৰিছে পশ্চিমবংগ আৰু মহাৰাষ্ট্ৰক ৷ পশ্চিমবংগত লোকসভাৰ আসন আছে ৪২ খন আৰু মহাৰাষ্ট্ৰৰ আসনৰ সংখ্যা হ’ল ৪৮ ৷মুঠ ৯০ খন লোকসভা আসনত তৃণমূল কংগ্ৰেছ , এন চি পি আৰু শিৱসেনাই বিজেপিৰ বিৰুদ্ধে প্ৰতিদ্বন্দিতা কৰিব ৷ একেদৰে ৰাজস্থান , চট্টিছগড় ,হাৰিয়ানা , গুজৰাটৰ দৰে ৰাজ্যৰ ১২০-১৪০ খন আসনত ,য’ত কংগ্ৰেছ –বিজেপিৰ পোনপটীয়া প্ৰতিদ্বন্দিতা হয় , তাত বিজেপিক প্ৰতিদ্বন্দিতাৰ দায়িত্ব ল’ব লাগিব কংগ্ৰেছে ৷ বিগত লোকসভা নিৰ্বাচনত দেখা গৈছিল যে কংগ্ৰেছ – বিজেপিৰ পোনপটীয়া প্ৰতিদ্বন্দিতা হোৱা মুঠ ১৮৬ খন আসনৰ ১৭০ খনতেই বিজয়ী হৈছিল বিজেপি ৷ ২০১৪ চনৰ তুলনাতো ১০ খন আসন কমকৈ লাভ কৰিছিল কংগ্ৰেছে ৷ এনে পৰিস্থিতিত কংগ্ৰেছৰ একছত্ৰী নেতৃত্ব মানি ল’বলৈ অস্বীকাৰ কৰিছে আঞ্চলিক দলসমূহে ৷ নিজৰ নিজৰ অঞ্চলত কোনে বিজেপিক কেনেদৰে প্ৰতিহত কৰিবলৈ সক্ষম হয় , তাৰ ওপৰতে মহাজোটৰ নেতৃত্ব নিৰূপন কৰা হ’ব৷ গতিকে মহাৰাষ্ট্ৰ আৰু পশ্চিমবংগৰ আৰ্হিকে মহাজোটৰ চালিকা শক্তি হিচাপে তুলি ধৰিব বিচাৰিছে মমতা বেনাৰ্জী আৰু শাৰদ পাৱাৰে ৷ তাৰেই ইংগিত পোৱা গৈছে প্ৰশান্ত কিশোৰৰ বৃহস্পতিবাৰৰ চাঞ্চল্যকৰ টুইটতো ৷ য’ত তেও মন্তব্য কৰিছিল যে কংগ্ৰেছে যি ভাৱনা আৰু স্থানক প্ৰতিনিধিত্ব কৰে , সেয়া বিৰোধী ৰাজনীতিৰ বাবে অত্যন্ত গুৰুত্বপূৰ্ণ ৷ কিন্তু কংগ্ৰেছৰ নেতৃত্ব এজন ব্যক্তিৰ ঈশ্বৰপ্ৰদত্ত অধিকাৰ নহয় ৷ বিশেষকৈ দলটোৱে যেতিয়া বিগত ১০ বছৰত ৯০ শতাংশ নিৰ্বাচনত পৰাজিত হৈছে৷গতিকে বিৰোধীৰ নেতৃত্ব কোনে ল’ব , গণতান্ত্ৰিকভাৱে তাৰ সিদ্ধান্ত লোৱা উচিত ৷ এই টুইটৰ জড়িয়তে প্ৰশান্ত কিশোৰেও কংগ্ৰেছৰ উপস্থিতিক স্বীকাৰ কৰি লৈ একছত্ৰী নেতৃত্বৰ ওপৰত প্ৰশ্ন তুলিছে ৷এনেদৰেই বিৰোধী ঐক্যৰ ক্ষেত্ৰত কংগ্ৰেছৰ ওফৰত চাপ সৃষ্টিৰ প্ৰক্ৰিয়া আৰম্ভ কৰিছে এন চি পি আৰু টি এম চিয়ে ৷
