Investigative reporting with dedication.
ৰাজনৈতিক দলসমূহে যিমান পৰিমানৰ চান্দা লাভ কৰে , তাৰ অধিকাংশ চন্দাৰ উৎস অজ্ঞাত ৷ অৰ্থাৎ অস্তিত্বহীন লোক আৰু প্ৰতিষ্ঠানৰ পৰা চান্দা সংগ্ৰহ কৰি আছে ৰাজনৈতিক দলসমুহে ৷ এছোছিয়েশ্যন ফৰ ডেম’ক্ৰেটিক ৰিফৰ্ম চমুকৈ এ ডি আৰৰ শেহতীয়া এক প্ৰতিবেদনত এই তথ্য প্ৰকাশ পাইছে ৷ প্ৰতিবেদনত উল্লেখ কৰা তথ্য অনুযায়ী আঞ্চলিক দলসমূহে ২০১৯-২০ বৰ্ষত যিমান পৰিমানৰ চান্দা সংগ্ৰহ কৰিছে , তাৰ ৫৫ শতাংশ ধনৰ দাতাৰ কোনো অস্তিত্ব বিচাৰি পাবলৈ নাই ৷ এনে অজ্ঞাত উৎসৰ পৰা সৰহভাগ ধন দলসমূহে লাভ কৰিছে ইলেক্ট’ৰেল বণ্ডৰ জড়িয়তে ৷ প্ৰতিবেদনত উল্লেখ কৰা অনুযায়ী ২০১৯-২০ বৰ্ষত দেশৰ আঞ্চলিক ৰাজনৈতিক দলসমূহে মুঠ ৮০৩.২৪ কৌটি টকাৰ চান্দালাভ কৰিছে ৷ কিন্তু ইয়াৰে ৪২৬.২৩৩ কৌটি টকা কোনে চান্দা হিচাপে দিছে , তেওলোকৰ কোনো পৰিচয় বা অস্তিত্ব বিচাৰি পাবলৈ নাই ৷আনহাতে , ৰাষ্ট্ৰীয় দলসমূহে অজ্ঞাত উৎসৰ পৰা লাভ কৰা চান্দাৰ জড়িয়তে তেওলোকৰ উপাৰ্জন বছৰটোত ৭০.৯৮ শতাংশ পৰ্যন্ত বৃদ্ধি পাইছে ৷
উল্লেখ্য , ২০১৮ চনৰ পৰা ইলেক্ট’ৰেল বণ্ডৰ জড়িতে চান্দা সংগ্ৰহৰ প্ৰক্ৰিয়া আৰম্ভ হৈছিল ৷ নিৰ্দিষ্ট বেংকত কোনো লোকে এই বণ্ড ক্ৰয় কৰি যিকোনো ৰাজনৈতিক দলক চান্দা হিচাপে আগবঢ়াব পাৰে ৷ এইক্ষেত্ৰত চান্দা দিওতাৰ পৰিচয় সম্পূৰ্ণ গোপন হৈ ৰয় ৷ অজ্ঞাত উৎসৰ পৰা ৰাজনৈতিক দলে চান্দা সংগ্ৰহ কৰাটো ভাৰতীয় গণতন্ত্ৰৰ বাবে বিপজ্জনক হৈ পৰিছে বুলি বিশেষজ্ঞসকলে বিভিন্ন সময়ত মন্তব্য কৰি আহিছে ৷
