১৩০ কোটি জনসংখ্যাৰে বিশ্বৰ দ্বিতীয় সৰ্বাধিক জনসংখ্যাৰ দেশ ভাৰতত প্ৰতিভাৰ অভাৱ হৈছে নেকি? দেশৰ খালী হৈ থকা উচ্চ স্তৰীয় পদবী সমূহৰ তালিকা ৰাজহুৱা হোৱাৰ পিছতে সচেতন মহলৰ মাজত উদয় হৈছে এই প্ৰশ্নৰ।
প্ৰাপ্ত তথ্য অনুযায়ী বিশ্বৰ পঞ্চম সৰ্ববৃহৎ অৰ্থনীতি হোৱাৰ পিছতো দেশৰ ন্যায়পালিকা আৰু আমোলাতন্ত্ৰত খালী হৈ থকা পদবোৰ পূৰণ কৰিবলৈ পৰ্যাপ্ত যোগ্য লোক বিচাৰি পোৱা নাই চৰকাৰে। ইয়াৰ উপৰিও বিজেপি সংসদীয় ব’ৰ্ড, সতৰ্কতা আয়োগ, ন্যায়পালিকা, নিৰাপত্তা সম্পৰ্কীয় সেৱা, এই সকলো বিভাগতে বহু পদ খালী হৈ আছে। ১.৩ বিলিয়ন জনসংখ্যাৰ এখন দেশত যেন প্ৰতিভাৰ দুৰ্ভিক্ষ হৈছে।
বিজেপি সংসদীয় ব’ৰ্ডতে কেইবাটাও পদ খালী হৈ আছে। বিগত বৰ্ষাকালীন অধিৱেশনত বিজেপিৰ নেতা-কৰ্মী সকলে আশা কৰিছিল যে বিজেপিৰ সভাপতি জে পি নাড্ডাই তেওঁৰ ক্ষমতা প্ৰয়োগ কৰি ১১ জনীয়া ব’ৰ্ডৰ পাঁচটা খালী পদ পূৰণ কৰিব। কিন্তু কাৰ্যকালৰ আধা কাল সম্পূৰ্ণ কৰাৰ পিছতো নাড্ডাই এতিয়ালৈকে এই বিষয়টোত কোনো আগ্ৰহ প্ৰকাশ কৰা নাই। সংসদীয় ব’ৰ্ডৰ সদস্য হৈছে সাতজন- জেপি নাড্ডা, প্ৰধানমন্ত্ৰী নৰেন্দ্ৰ মোডী, অমিত শ্বাহ, ৰাজনাথ সিং, নীতিন গাডকাৰী, শিৱৰাজ সিং চৌহান আৰু সাধাৰণ সম্পাদক বি এল সন্তোষ । বিজেপিৰ এইকেইজন ৰাষ্ট্ৰীয় নেতা মূলতঃ RSSৰ সদস্য আৰু বিজেপিলৈ ডেপুটেশনতহে প্ৰেৰণ কৰা হৈছে।
২০১৪ চনত অমিত শ্বাহে ৰাজনাথ সিঙৰ হাতৰ পৰা অধ্যক্ষৰ দায়িত্ব গ্ৰহণ কৰাৰ সময়ত বিজেপি সংসদীয় ব’ৰ্ড অন্তিমবাৰৰ বাবে গঠন কৰা হৈছিল। অমিত শ্বাহে অটল বিহাৰী বাজপেয়ী, এল কে আদৱানী আৰু মুৰলী মনোহৰ যোশীৰ দৰে পুৰণি আৰু অভিজ্ঞ সদস্যসকলক বহিষ্কাৰ কৰি শিৱৰাজ সিং চৌহান আৰু জে পি নাড্ডাৰ দৰে নেতাক নতুনকৈ বোৰ্ডত অন্তৰ্ভুক্ত কৰিছিল।
এম ভেংকায়া নাইডু দেশৰ উপ-ৰাষ্ট্ৰপতি হোৱাৰ পিছত বোৰ্ডৰ আন এখন চকী খালী হৈছিল। তাৰ পিছতে অনন্ত কুমাৰ, সুষমা স্বৰাজ আৰু অৰুণ জেটলীৰ দেহাৱসান ঘটিছিল। আনকি ৰাজ্যসভাৰ আন এজন পুৰণি বিজেপি নেতা থাৱাৰ চান্দ গেহলটক কৰ্ণাটকৰ ৰাজ্যপাল হিচাপে নিযুক্তি দিয়া হৈছিল। কিন্তু ইমানৰ পিছতো গৃহমন্ত্ৰী অমিত শ্বাহে এই পদসমূহ পূৰণ নকৰাৰহে সিদ্ধান্ত লৈছিল।
সংসদীয় বোৰ্ডেই নীতি প্ৰস্তুত কৰে, মুখ্যমন্ত্ৰী নিৰ্বাচন কৰে, বিধানসভাৰ নেতা, ৰাজ্যসভাৰ সদস্য, বিধানসভা নিৰ্বাচনৰ প্ৰাৰ্থী নিৰ্ধাৰণ কৰে। বিজেপি সংসদীয় পৰিষদ বিগত দুবছৰত এবাৰো মিলিত হোৱা নাই। শেষবাৰৰ বাবে ২০১৯ ৰ লোকসভা নিৰ্বাচনৰ আগতে মিলিত হৈছিল বিজেপিৰ সংসদীয় বোৰ্ড। বিজেপিৰ নেতাসকলৰ মতে অমিত শ্বাহ আৰু মোডীয়ে এতিয়াও নিৰপেক্ষ সিদ্ধান্ত ল’ব পৰা বিশ্বাসযোগ্য নেতাৰ সন্ধানত আছে। বিজেপিয়ে পুৰুষ সত্বা শক্তিশালী কৰাৰ স্বাৰ্থত মহিলা, দলিত আৰু সংখ্যালঘু সম্প্ৰদায়ৰ নেতাও বিচাৰি আছে। বৰ্তমান, সংসদীয় ব’ৰ্ডত এগৰাকীও মহিলা সদস্য নাই। সম্ভৱতঃ ইয়াৰ কাৰণ হৈছে মোডী-শ্বাহ নেতৃত্বাধীন দলটোৱে ইমান দক্ষতাৰে কাম কৰি আছে যে শীৰ্ষস্থানত সহমত নহ’লে দলটোৰ আভ্যন্তৰীণ গণতন্ত্ৰ অতি কঠোৰ হৈ পৰে। অৱশ্যে এয়া কেৱল অনুমানহে কৰিব পাৰি।
মোডী চৰকাৰৰ আমোলাতন্ত্ৰও একে অভাৱৰ ভুক্তভোগী। নীতি আয়োগ আৰু প্ৰতিৰক্ষা প্ৰতিষ্ঠানৰ উচ্চ পদত অধিষ্ঠিত লোকসকলে দুবাৰ বা ততোধিক সেৱা সম্প্ৰসাৰণ লাভ কৰিছে। এনেদৰে বহু যোগ্য বিষয়া পদোন্নতি লাভৰ পৰা বঞ্চিত হৈছে। খালী ঠাইখিনি পূৰণ কৰাত চৰকাৰৰ ব্যৰ্থতা আমোলাতন্ত্ৰৰ দ্বাৰা আটাইতকৈ বেছি বহন কৰা হৈছে। উদাহৰণ স্বৰূপে ভিজিলেন্স কমিছনৰ দৰে এটা গুৰুত্বপূৰ্ণ বিভাগৰ তিনিটাৰ পৰিৱৰ্তে মাত্ৰ এটা পদতহে বিষয়াই কাৰ্যনিৰ্বাহ কৰি আছে।
এই পদসমূহত নিযুক্তিৰ বিজ্ঞাপন জুনত উলিয়াই দিয়া হৈছিল কিন্তু বাচনি পেনেলৰ বৈঠকৰ তাৰিখ নিৰ্ধাৰণ কৰা হোৱা। বেংক, ৰাজহ সেৱা আৰু আইএএছৰ পৰা বহু সংখ্যক অৱসৰপ্ৰাপ্ত বিষয়া আছে যিসকলে এই লাভজনক পদসমূহ দখল কৰিবলৈ লবি সৃষ্টি কৰি আহিছে।
গণতন্ত্ৰৰ তৃতীয় স্তম্ভ ন্যায়পালিকাৰ অৱস্থাও ইমানেই শোচনীয় যে ন্যায়ালয়েও সকলো পদ পূৰণ কৰিব পৰা নাই। উচ্চতম ন্যায়ালয়ে নটা খালী পদ পূৰণ কৰিবলৈ প্ৰায় তিনি বছৰ সময় লৈছিল।
মুখ্য ন্যায়াধীশ এন ভি ৰমনে চৰকাৰক দিয়া তথ্য অনুসৰি দেশৰ ন্যায়িক সদস্যৰ ২৪০ টা পদ খালী হৈ আছে। তেওঁ মুকলিকৈ কৈছে যে বৰ্তমানৰ উচ্চতম ন্যায়ালয়ৰ ন্যায়াধীশসকলৰ নেতৃত্বত বাছনি সমিতিয়ে পৰামৰ্শ দিয়া স্বত্বেও পদসমূহ খালী কৰি ৰখা হৈছে।
