লকডাউনৰ সময়ত খোজকাঢ়ি ঘৰলৈ ওভতাৰ পথত কিমান লোকৰ মৃত্যু হ’ল ? তথ্য নাই চৰকাৰৰ ৷কোভিডৰ দ্বিতীয় ঢৌৰ সময়ত অক্সিজেনৰ অভাৱত কিমানৰ মৃত্যু হ’ল ? চৰকাৰে তাৰ উত্তৰ দিব নোৱাৰে ৷ আনকি কোভিড মহামাৰীৰ সময়ত দেশত দৰিদ্ৰৰ সংখ্যা কিমান , সেয়াও জনাব নোৱাৰিলে কেন্দ্ৰীয় চৰকাৰখনে ৷অথচ প্ৰধানমন্ত্ৰী নৰেন্দ্ৰ মোদীয়ে বাৰম্বাৰ একেটা কথাই ঘোষণা কৰি আহিছে যে কোভিড সংকটৰ মোকাবিলা কৰা সময়ত দৰিদ্ৰ লোকসকলেই হ’ল চৰকাৰৰ প্ৰথম অগ্ৰাধিকাৰ ৷ কিন্তু ক’ৰোণা কালত দেশত দৰিদ্ৰৰ সংখ্যা কিমান তাকেই নাজানে মোদী চৰকাৰে ৷শেহতীয়াকৈ সংসদত এক প্ৰশ্নৰ উত্তৰত বিত্ত মন্ত্ৰালয়ে উল্লেখ কৰিছে যে মহামাৰীৰ সময়ত দেশত গৰীৱৰ সংখ্যা কিমান , তাৰ কোনো চৰকাৰী হিচাপ নাই ৷ চৰকাৰৰ যুক্তি ,” দৰিদ্ৰৰ চৰকাৰী হিচাপ এটা পৰিয়ালৰ ব্যয়ৰ পৰিমাপৰ ওপৰত নিৰ্ভৰশীল ৷ পৰিসংখ্যা বিভাগৰ নেচনেল চেম্প’ল চাৰ্ভে অৰ্গেনাইজেশ্যনে এই কাম কৰে ৷ কিন্তু ২০১১-১২ চনৰ পাছত এই সমীক্ষাৰ কোনো প্ৰতিবেদন প্ৰকাশ পোৱা নাই ৷ বিত্ত মন্ত্ৰালয়ৰ দাবী-যথাসমত সমীক্ষা হ’ব ৷ অতিমাৰী পৰিস্থিতি স্বাভাৱিক হোৱাৰ ওপৰতে সেয়া নিৰ্ভৰ কৰিছে ৷
ধনকুবেৰ কিমান ?
দৰিদ্ৰ লোকৰ হিচাপ নাথাকিলেও ধনকুবেৰৰ হিচাপ ঠিকেই ৰাখিছে কেন্দ্ৰীয় চৰকাৰখনে ৷ বিত্ত মন্ত্ৰালয়ে সদৰী কৰা তথ্য অনুসৰি ২০২০-২১ বৰ্ষত ১৩৬ গৰাকী লোকৰ আয় আছিল বছৰি ১০০ কৌটি টকাৰ অধিক ৷ ২০১৯-২০ বৰ্ষত এই পৰিসংখ্যা আছিল ১৪১ গৰাকী ৷ ২০১৮-১৯ ৰ ৭৭ গৰাকীৰ তুলনাত প্ৰায় দুগুণ ৷
কিয় দৰিদ্ৰৰ সংখ্যা নজনায় চৰকাৰে ?
সাধাৰণতে ৫ বছৰৰ মূৰে মূৰে এন এছ ওৱে দেশৰ জনসাধাৰণৰ মাহিলী ব্যয়ৰ সমীক্ষা চলায় ৷২০১১-১২ চনত এই সমীক্ষাৰ প্ৰতিবেদন প্ৰকাশ পাইছিল ৷ ২০১৬-১৭ বৰ্ষত নিয়ম অনুসৰি আকৌ সমীক্ষা হয় ৷ কিন্তু চৰকাৰে আজিও সেই প্ৰতিবেদন ৰাজহুৱা নকৰিলে ৷ তাৰ পাছত সংবাদমাধ্যমত প্ৰতিবেদনৰ এটা অংশ ফাদিল হয় ৷ যাৰ বাবে ২০১৯ ৰ লোকসভা নিৰ্বাচনৰ পূৰ্বে মোদী চৰকাৰ অস্বস্তিৰ সন্মুখীন হয় ৷ ইয়াৰ পাছতে পৰিসংখ্যা মন্ত্ৰালয়ে ঘোষণা কৰে যে সমীক্ষাত ত্ৰুটি আছিল ৷ সকলো ত্ৰুটি শুধৰাই ২০২০-২১ বা ২০২১-২২ বৰ্ষত প্ৰকাশ কৰা হ’ব ৷ এতিয়া আকৌ একেটা বিভাগেই কৈছে যে এই বছৰ সমীক্ষা হোৱাৰ আশা ক্ষীণ ৷ কোভিডৰ প্ৰকোপ কমিলে অহা বছৰ এন এছ ওৰ সমীক্ষা হোৱাৰ সম্ভাৱণা আছে ৷
