তৃণমূল কংগ্ৰেছৰ নেতৃত্বৰে ইতিমধ্যে তিনি লানি আলোচনাত মিলিত হৈছে ৰাইজৰ দলৰ সভাপতি তথা শিৱসাগৰৰ বিধায়ক অখিল গগৈ ৷প্ৰতিবাৰেই তেওক ৰাজ আতিথ্যৰে লৈ যোৱা হৈছে কলকাতালৈ ৷ পশ্চিমবংগৰ কালীঘাটত থকা কাৰ্যালয়ত তৃণমূলৰ শীৰ্ষ নেতৃত্বৰে কেবাখনো বৈঠকত মিলিত হৈছে ৰাইজৰ দলৰ নেতৃত্ব ৷ এই বৈঠকতে অখিল গগৈক দিয়া হৈছে অসমত তৃণমূল কংগ্ৰেছৰ সভাপতিৰ দায়িত্ব গ্ৰহণৰ প্ৰস্তাৱ ৷ কিন্তু তৃণমূলৰ এই প্ৰস্তাৱত সৈমান নহ’ল অখিল গগৈ ৷ ইয়াৰ পাছতে অসমক লৈ প্ৰস্তুত কৰা হৈছে নতুন পৰিকল্পনা ৷
বিজেপিক প্ৰতিৰোধৰ সামগ্ৰিক পৰিকল্পনাত কি আছে ?
- Donation -
পশ্চিমবংগত একেৰাহে তৃতীয়বাৰ শাসনলৈ অহাৰ পাছত মমতা বেনাৰ্জীৰ লক্ষ্য এইবাৰ নতুন দিল্লী ৷ কিন্তু নতুন দিল্লীলৈ যোৱাৰ পথ মমতা বেনাৰ্জীৰ বাবে বহু বেছি কঠিন ৷ সেইবাবেই লোকসভা নিৰ্বাচনত অধিক আসন লাভ কৰাৰ পৰিকল্পনাত এতিয়াৰে পৰা ব্যস্ত হৈ পৰিছে তৃণমূল কংগ্ৰেছ ৷ মমতা বেনাৰ্জীক প্ৰধানমন্ত্ৰী পদৰ ঘোষিত বা অঘোষিত প্ৰাৰ্থীৰূপে প্ৰক্ষেপ কৰাৰ ব্লু প্ৰিন্ট সাজু কৰাৰ দায়িত্ব দিয়া হৈছে নিৰ্বাচনী ৰণনীতিকাৰ প্ৰশান্ত কিশোৰক ৷ সেয়ে পশ্চিববংগৰ নিৰ্বাচনৰ পাছৰে পৰা তেও ব্যস্ত হৈ পৰিছে বিৰোধী দলসমূহক একগোট কৰাৰ কামত ৷ এন চি পি , কংগ্ৰেছ দলৰ শীৰ্ষ নেতৃত্বৰে আলোচনাত মিলিত হৈ তেও এটা কথাত সকলোৰে সহমত আদায় কৰাত সক্ষম হৈছে যে এইবাৰৰ লোকসভা নিৰ্বাচন হ’ব প্ৰতিটো বিৰোধী দলৰ বাবে জীৱন মৰণৰ যুঁজ ৷ ৰাজনীতিত অস্তিত্ব বজাই ৰাখিবলৈ হ’লে ১০ বছৰৰ বিৰতিত শাসনলৈ আহিবই লাগিব ৷ প্ৰশান্ত কিশোৰৰ আন এটা প্ৰস্তাৱ হ’ল- প্ৰতিটো লোকসভা সমষ্টিতে বিৰোধীৰ এজনকৈ প্ৰাৰ্থী প্ৰক্ষেপ ৷ দেশৰ ২৪৪ টা লোকসভা সমষ্টিত কংগ্ৰেছ আৰু বিজেপিৰ মাজত পোনপটীয়া প্ৰতিদ্বন্দিতা হোৱাটো নিশ্চিত ৷ সেইবাবেই এই সমষ্টিসমূহত আন দলক প্ৰতিদ্বন্দিতা নকৰিবলৈ কোৱা হৈছে ৷ইয়াৰ বিনিময়ত যিসমূহ ৰাজ্যত আঞ্চলিক দল অধিক শক্তিশালী অৱস্থানত আছে , তাত কংগ্ৰেছক প্ৰতিদ্বন্দিতা নকৰাৰ প্ৰস্তাৱ দিয়া হৈছে ৷ গতিকে পশ্চিমবংগত কংগ্ৰেছে মমতা বেণাৰ্জীৰ পথ সুগম কৰি দিব ৷
মমতা বেনাৰ্জীৰ বাবে অখিল গগৈ জৰুৰী কিয় ?
কেৱল পশ্চিমবংগৰ আসনেৰে মমতা বেনাৰ্জী প্ৰধানমন্ত্ৰী পদৰ দাবীদাৰ হ’ব নোৱাৰে ৷ তৃণমূল কংগ্ৰেছৰ মতে তেওলোকে পশ্চিমবংগত ৩৫ খন আসন লাভ কৰাটো নিশ্চিত ৷ কিন্তু দিল্লীৰ পথ মসৃণ কৰিবলৈ হ’লে আৰু অধিক আসনৰ দৰকাৰ হ’ব ৷ গতিকে তেওলোকে চকু দিছে উত্তৰ পূৱৰ ২৫ খন আসনত ৷ উত্তৰ পূৱৰ ভিতৰত সৰ্বাধিক লোকসভাৰ আসন আছে অসমত ৷ সেয়ে অসম এই মুহূৰ্তত তৃণমূলৰ প্ৰধান লক্ষ্য ৷ অসমত তৃণমূলে চলোৱা নিজাববীয়া সমীক্ষাত এটা কথা পোহৰলৈ আহিছিল যে অসমত বিজেপিৰ বিকল্প হৈ উঠাৰ প্ৰবল সম্ভাৱণা আছে অখিল গগৈ নেতৃত্বাধীন ৰাইজৰ দলৰ ৷ সেয়ে ৰাইজৰ দলক তৃণমূল কংগ্ৰেছত চামিল হোৱাৰ পোনপটীয়া প্ৰস্তাৱ দিয়া হৈছিল ৷সেই প্ৰস্তাৱ নাকচ হোৱাৰ পাছত এইবাৰ বিষয়টোৰ মিমাংসাৰ দায়িত্ব দিয়া হৈছে প্ৰশান্ত কিশোৰক ৷ সেইমতেই শণিবাৰে কলকাতাত অখিল গগৈৰে আলোচনাত মিলিত হয় ভাৰতৰ ৰাজনীতিৰ চাণক্য হিচাপে পৰিচিত প্ৰশান্ত কিশোৰ ৷
প্ৰশান্ত কিশোৰে কি ক’লে ?
শণিবাৰে কলকাতাত অখিল গগৈৰে প্ৰায় ডেৰ ঘন্টা সময় ধৰি চলা আলোচনাত বিজেপিক প্ৰতিৰোধৰ বাবে প্ৰস্তুত কৰা পৰিকল্পনাৰ সবিশেষ দাঙি ধৰে প্ৰশান্ত কিশোৰে ৷ প্ৰশান্ত কিশোৰৰ মতে যদিহে অসমত তৃণমূল কংগ্ৰেছৰ সৈতে ৰাইজৰ দল চামিল নহয় , তেনহ’লে মমতা বেনাৰ্জীৰ প্ৰধানমন্ত্ৰীত্বৰ প্ৰশ্নত ৰাইজৰ দলৰ আগতীয়া সমৰ্থন নিশ্চিত কৰিব লাগিব ৷ তাৰ পাছতহে ৰাইজৰ দলক তৃণমূলৰ তৰফৰ পৰা প্ৰয়োজনীয় নিৰ্বাচনী সহায় প্ৰদান কৰা হ’ব ৷ এই চৰ্ত মতেই গুৱাহাটীলৈ উভতি আহিয়েই অখিল গগৈয়ে মমতা বেনাৰ্জীক প্ৰধানমন্ত্ৰী হিচাপে চাব বিচাৰে বুলি মন্তব্য কৰিছে ৷ এইদৰে অসমতো মমতা বেনাৰ্জীৰ গ্ৰহণযোগ্যতা ৰাইজৰ দলৰ জড়িয়তে বৃদ্ধি কৰাৰ চেষ্টা চলোৱা হৈছে ৷ ইয়াৰ বিনিময়ত তৃণমূল কংগ্ৰেছৰ পৰা ৰাইজৰ দললৈ আগবঢ়োৱা হ’ব আন কেতবোৰ বিশেষ সহায় ৷ কিন্তু সকলো পৰিকল্পনাত চূড়ান্ত মোহৰ লাগিবলৈ এতিয়াও অলপ বাকী আছে ৷ সেয়ে অচিৰেই আকৌ এবাৰ অখিল গগৈ ৰাওণা হ’ব কলকাতালৈ ৷ এইবাৰ প্ৰশান্ত কিশোৰৰ উপস্থিতিত তৃণমূলৰ শীৰ্ষ নেতৃত্বই সকলো সিদ্ধান্ত চূড়ান্ত কৰিব ৷
