Investigative reporting with dedication.
মধ্যপ্ৰদেশৰ ৩৪ জনীয়া মন্ত্ৰীসভাত দুটা ফৈদৰ বিভাজন স্পষ্ট৷ভয়ংকৰ বিসম্বাদে গা কৰি উঠিছে মধ্য প্ৰদেশত।নগৰ উন্নয়ন দপ্তৰৰ মন্ত্ৰী ভূপেন্দ্ৰ সিং কেন্দ্ৰীয় মন্ত্ৰী জ্যোতিৰাদিত্য সিন্ধিয়াৰ ঘনিষ্ঠ।তেওঁৰ বিৰুদ্ধেই তীব্ৰ ক্ষোভ উজাৰিছে মুখ্যমন্ত্ৰী শিৱৰাজ সিং মন্ত্ৰীসভাৰ কেইগৰাকীমান মন্ত্ৰীয়ে ! শিৱৰাজ সিঙৰ মন্ত্ৰীসভাৰ এই খামখেয়ালিৰ বুজ ল’বলৈ বুধবাৰে অসমৰ মুখ্যমন্ত্ৰী ড° হিমন্ত বিশ্ব শৰ্মা উপস্থিত হয়গৈ মধ্য প্ৰদেশৰ ভূপালত।ভূপালত তেওঁ মুখ্যমন্ত্ৰী শিৱৰাজ সিং চৌহানক সাক্ষাৎ কৰে।উল্লেখ্য যে মধ্য প্ৰদেশত বিসম্বাদে ইমানেই চূড়ান্ত ৰূপ লৈছেগৈ যে বিজেপিৰ কেন্দ্ৰীয় নেতৃত্বই ইয়াক লৈ বাৰুকৈয়ে অস্বস্তিত পৰিছে।কেন্দ্ৰীয় নেতৃত্বক কিছু পৰিমাণে সকাহ দিবলৈকে অসমৰ মুখ্যমন্ত্ৰী ড° হিমন্ত বিশ্ব শৰ্মা ভূপালত উপস্থিত হৈছেগৈ বুলি এক বিশেষ সূত্ৰই প্ৰকাশ কৰিছে। কিন্তু গুৰুত্বপূৰ্ণ বিষয়টো হৈছে বিগত ৩ মে’ৰ পৰা জ্বলি আছে অসমৰ গাতে লাগি থকা মণিপুৰ৷প্ৰায় শতাধিক লোকে বিগত এটা মাহত সংঘটিত সংঘৰ্ষত প্ৰাণ হেৰুওৱাৰ লগতে প্ৰায় হাজাৰ লোক আহত হৈছে।গৃহহীন হৈছে হাজাৰ হাজাৰ লোক৷ইতিমধ্যে দুজন বিজেপি আৰু এজন কংগ্ৰেছৰ বিধায়কৰ বাসগৃহটো অগ্নিসংযোগ কৰিছে দুস্কৃতিকাৰীয়ে।অসমৰ প্ৰতিবেশী ৰাজ্য মণিপুৰত সংঘৰ্ষৰ এই সময়চোৱাত NEDA ৰ অধ্যক্ষৰ দায়িত্বতো থকা অসমৰ মুখ্যমন্ত্ৰী ড° হিমন্ত বিশ্ব শৰ্মাই মাত দিবলৈ সময় উলিয়াব পৰা নাই মণিপুৰ চৰকাৰ তথা মণিপুৰবাসীক।তাৰ বিপৰীতে মধ্য প্ৰদেশৰ বিসম্বাদৰ জুই প্ৰশমনৰ বাবে বুধবাৰে ভূপাল পাইছেগৈ ড° শৰ্মা।
মধ্য প্ৰদেশত বিধানসভাৰ নিৰ্বাচন সমাগত।অহা নবেম্বৰ মাহত নিৰ্বাচন অনুষ্ঠিত হ’ব মধ্য প্ৰদেশত৷কিন্তু আগন্তুক নিৰ্বাচনৰ আগলৈকে মুখ্যমন্ত্ৰী শিৱৰাজ চৌহানৰ চৰকাৰ যে তিস্তি থাকিব পাৰিব,সেই বিষয়ত সন্দেহ প্ৰকাশ কৰিছে ৰাজনৈতিক বিশ্লেষকে।আনকি মধ্যপ্ৰদেশ মন্ত্ৰীসভাত দেখা দিয়া শেহতীয়া খাম খেয়ালিয়ে অস্বস্তিত পেলাইছে প্ৰধানমন্ত্ৰী আৰু গৃহমন্ত্ৰী অমিত শ্বাহকো।কেনেবাকৈ যদি তিনিজন মন্ত্ৰীয়ে ভাবুকি দিয়াৰ দৰে একেলগে মন্ত্ৰীসভাৰ পৰা পদত্যাগ কৰে,তেন্তে মধ্যপ্ৰদেশত ২০১৯ চনত প্ৰাক্তন মুখ্যমন্ত্ৰী কমল নাথৰ মন্ত্ৰীসভাৰ দৰে তাচপাতৰ দৰে খহিব শিৱৰাজ চৌহানৰ বিজেপি চৰকাৰ !
আনহাতে,
কেন্দ্ৰই আঙুলি ঠাঁৰত নচুৱাব বিচৰাৰ অভিযোগ তুলিছে বিজেপিৰ কেইবাগৰাকীও জ্যেষ্ঠ মন্ত্ৰী তথা নেতাই।সাগৰ জিলাৰ তিনিগৰাকী মন্ত্ৰীৰ মনোমালিন্যই এতিয়া শিৰোনাম দখল কৰিছে।সাগৰ জিলাৰ দুগৰাকী মন্ত্ৰী গোপাল ভাৰ্গৱ,গোবিন্দ সিং ৰাজপুট,বিধায়ক শৈলেন্দ্ৰ জৈনে বিগত মঙলবাৰে মুখ্যমন্ত্ৰী শিৱৰাজ সিং চৌহানক সাক্ষাৎ কৰি এগৰাকী বিশেষ মন্ত্ৰীৰ বিৰুদ্ধে অভিযোগ দিয়ে।নগৰ উন্নয়ন দপ্তৰৰ মন্ত্ৰী ভূপেন্দ্ৰ সিঙৰ বিৰুদ্ধে অভিযোগ দি তিনিওগৰাকী জ্যেষ্ঠ নেতাই কয় যে মন্ত্ৰী ভূপেন্দ্ৰ সিঙক নিয়ন্ত্ৰণ নকৰিলে তেওঁলোকে সমূহীয়াভাৱে পদত্যাগ কৰিব।ভূপেন্দ্ৰ সিঙৰ অনুমতি অবিহনে কোনো কামেই নহয় ৰাজ্যখনত-এই অভিযোগ ক্ষোভিত মন্ত্ৰীসকলৰ।ইতিমধ্যে ভূপেন্দ্ৰ সিং আৰু কেন্দ্ৰীয় মন্ত্ৰী জ্যোতিৰাদিত্য সিন্ধিয়াৰ অতপালিত ক্ষুদ্ধ হৈয়ে প্ৰাক্তন মন্ত্ৰী কৈলাস যোশীৰ পুত্ৰ দীপক যোশীয়ে অলপতে অসংখ্য সমৰ্থকক লগত লৈ কংগ্ৰেছত যোগদান কৰে।ইয়াৰ পিছতে উপায়হীন হৈ মুখ্যমন্ত্ৰী শিৱৰাজ সিং চৌহানে গোপাল ভাৰ্গৱ,গোবিন্দ সিং ৰাজপুট ,শৈলেন্দ্ৰ যাদৱক সাক্ষাৎ কৰে৷প্ৰতিগৰাকী নেতাৰ লগত পৃথকে পৃথকে আলোচনাত বহে আৰু আগন্তুক দিনবোৰত দলৰ বিপক্ষে কোনোধৰণৰ আপত্তি জনক মন্তব্য কৰাৰ পৰা বিৰত থাকিবলৈ আহ্বান জনায়।উল্লেখ্য যে প্ৰায় ১৫ বছৰ
শাসনত থকাৰ পিছত বিজেপিক হৰুৱাই কংগ্ৰেছ ক্ষমতালৈ আহিছিল মধ্যপ্ৰদেশত।কিন্তু জ্যোতিৰাদিত্য সিন্ধিয়াই নিজৰ মুখ্যমন্ত্ৰীত্বৰ স্বাৰ্থত একেটা নিশাতেই একাংশ সাংগোপাংগ লৈ দল ত্যাগ কৰি কমল নাথৰ চৰকাৰৰ পতন ঘটাইছিল৷এইবাৰ সেই একে দশাই হোৱাৰ সম্ভাৱনা প্ৰকট হৈছে মধ্য প্ৰদেশত !জ্যোতিৰাদিত্য সিন্ধিয়া এতিয়া বিজেপিৰ বাবে মূৰৰ কামোৰণি !এৰিবও নোৱাৰে,ধৰিবও নোৱাৰে আৰু এনেদৰেই যদি আগন্তুক ৫ মাহ থাকে তেন্তে মধ্য প্ৰদেশো বিজেপিৰ হাতৰ পৰা যোৱাটো নিশ্চিত !
