Investigative reporting with dedication.
মাওবাদী ৷ বহু চৰ্চিত , বহু বিতৰ্কিত এটি শব্দ ৷ চৰকাৰৰ সজোৰ বিৰোধিতা কৰাসকলক মাওবাদী সজোৱাৰ অভিযোগো দীৰ্ঘদিন ধৰি উত্থাপণ হৈ আহিছে ৷ মাওবাদী মানেই যেন দুৰ্ধৰ্ষ গেৰিলা , দেশৰ প্ৰতি ভাবুকি ৷ কিন্তু এজন মাওবাদী নেতাৰ কাহিনীয়ে এতিয়া সংবাদমাধ্যমৰ শিৰোণাম দখল কৰিছে ৷ এইজন মাওবাদী নেতাৰ বিৰুদ্ধে দলীয় পুঁজিৰ ৪০ লাখ টকা হৰলুকি কৰি প্ৰেমিকাক পলুৱাই নিয়াৰ অভিযোগ উত্থাপণ হৈছে ৷কিন্তু কোন এই মাওবাদী নেতা?
মহাৰাজ প্ৰামাণিক ৷ মাওবাদীৰ এজন শীৰ্ষস্থানীয় নেতা ৷ কিন্তু তেও শেহতীয়াকৈ প্ৰেমিকাৰ সৈতে দলীয় স্কোৱাড এৰি পলায়ণ কৰাৰ অভিযোগ উত্থাপণ হৈছে ৷ লগত লৈ গৈছে দলৰ ৪০ লাখ টকাৰ পুঁজি , একাধিক বন্দুক , বেছ কিছু কাৰ্টিজ , ৱাকীটকী , মোবাইল ফোন আৰু বিভিন্ন সামগ্ৰী ৷ এই অপৰাধৰ বাবে মহাৰাজ প্ৰামাণিকক গণ আদালতত শাস্তি দিয়াৰ কথা ঘোষণা কৰিছে চি পি আই- মাওবাদীয়ে ৷মাওবাদী সংগঠনটোৰ দক্ষিণ সংমণ্ডল সমিতিৰ মুখপাত্ৰ অশোকত প্ৰকাশিত এক বিবৃতিত এই কথা ঘোষণা কৰা হৈছে ৷
ধন আৰু প্ৰেমিকাসহ শিবিৰৰ পৰা পলায়ণ কৰা মাওবাদী নেতা মহাৰাজৰ ঘৰ হ’ল ঝাৰখণ্ডৰ খৰছোৱা জিলাৰ দাৰুদা গাঁৱত ৷ এসময়ত চাকৰি কৰিছিল ঝাৰখণ্ড আৰক্ষীৰ গাড়ীচালক হিচাপে ৷ কিন্তু পুলিচৰ চাকৰি কৰি থাকোতেই ২০০৮ চনত একাধিক চুৰিৰ গোচৰত তেও দুবাৰকৈ জেললৈ যাবলগীয়া হয় ৷
জেলৰ পৰা ওলায়েই মাওবাদীৰ সম্পৰ্কলৈ আহে মহাৰাজ ৷ সাংগঠনিক ক্ষমতাত দক্ষ হোৱা বাবেই অতি সহজতে তেও আঞ্চলিক আৰু জ’নেল কমিটীত স্থান লাভ কৰে ৷২০১১ চনত তেও প্ৰথমবাৰ সাধাৰণ স্কোৱাডৰ সদস্য পদ লাভ কৰে ৷ তাৰ পাছত ২০১৫ চনত জোনেল কমিটীৰ সদস্য হিচাপে নিৰ্বাচিত হয় ৷ কিছুদিন পূৰ্বে মহাৰাজক দিয়া হয় দক্ষিণ জোনেল কমিটীৰ তত্বাবধায়কৰ দায়িত্ব ৷
২০১১ চনত এৰিয়া কমিটীৰ সদস্য হোৱাৰ পাছতে মাৰাজৰ প্ৰেমৰ সম্পৰ্ক গঢ়ি উঠে দলৰ আন এগৰাকী সদস্য বেলুন চৰ্দাৰৰ সৈতে ৷ বেলুনৰ ঘৰ ঝাৰখণ্ডৰে খৰছোৱা জিলাত ৷ দুয়োৰে প্ৰেমৰ সম্পৰ্কৰ কথা আগৰে পৰা জানিছিল মাওবাদীৰ শীৰ্ষ নেতৃত্বই ৷ কিন্তু সেয়া ব্যক্তিগত বিষয় বুলি কোনো হস্তক্ষেপ কৰা নাছিল ৷সেই প্ৰেমিকাক লৈয়ে স্বাধীনতা দিৱসৰ পূৰ্বে পলায়ন কৰে মহাৰাজ প্ৰামাণিকে ৷
মহাৰাজ প্ৰামাণিক কোনো এলা পেচা মাওবাদী কেডাৰ নাছিল ৷ তেওৰ বিৰুদ্ধে পশ্চিমবংগ আৰু ঝাৰখণ্ডৰ বিভিন্ন থানাত ৰুজু হৈ আছে একাধিক গোচৰ ৷ঝাৰখণ্ডৰ খৰছোৱা জিলাৰ তিৰুলডিহি থানা এলেকা , পুৰুলিয়া জিলাৰ বাঘমুণ্ডি এলেকাত ভয়ানক সংঘৰ্ষ আৰু লুটপাতৰ প্ৰধান অভিযুক্ত আছিল মাওবাদী নেতা মহাৰাজ ৷ কেৱল ঝাৰখণ্ডতে মহাৰাজৰ বিৰুদ্ধে ৰুজু হৈ আছে ২৫ টা গোচৰ ৷ সম্প্ৰতি ঝাৰখণ্ডতে এইগৰাকী মাওবাদী নেতাৰ মূৰৰ দাম নিৰ্ধাৰণ কৰা হৈছে ১০ লাখ টকা ৷কিন্তু এইগৰাকী দুৰ্ধৰ্ষ মাওবাদী নেতাই প্ৰেমিকাক লৈ ৪০ লাখ টকাসহ পলায়ন কৰাৰ ঘটনা এতিয়া পোহৰলৈ আহিছে ৷ এই কথা চি পি আই- মাওবাদীয়ে নিজৰ মুখপত্ৰত নিজে ঘোষণা কৰিছে ৷ মাওবাদীৰ নেতৃত্বই জনোৱা মতে , বিগত ২২ জুনত মাওবাদীৰ শিবিৰ এৰি গৈছিল মহাৰাজ প্ৰামাণিকে ৷ এমাহ ধৰি পুলিচৰে যোগাযোগ কৰাৰ পাছত ২৬ জুলাইত পুণৰ উভতি আহে শিবিৰলৈ ৷ পুলিচৰ লগত চক্ৰান্ত কৰি স্কোৱাডৰ সকলো সদস্যকে গ্ৰেপ্তাৰ কৰোৱাৰ পৰিকল্পনা কৰিছিল মহাৰাজে ৷ কিন্তু আন সদস্যসকলৰ তেওৰ ওপৰত সন্দেহ হয় ৷ এই কথা জানিব পাৰিয়েই মহাৰাজে দলীয় পুঁজিৰ ৪০ লাখ টকা , বন্দুক বাৰুদসহ নিজৰ প্ৰেমিকাক লৈ পলায়ন কৰে ৷ এইগৰাকী মাওবাদী নেতাক গণ আদালতত শাস্তি দিয়া হ’ব বুলি ঘোষণা কৰিছে মাওবাদী সংগঠনটোৱে ৷
