Investigative reporting with dedication.
অসম- মেঘালয়ৰ সীমা বিবাদ নিষ্পত্তিৰ বাবে অসম চৰকাৰে শেহতীয়াকৈ ভুমি হস্তান্তৰৰ এক চুক্তি স্বাক্ষৰ কৰিবলৈ আগবাঢ়িছে ৷ বিৰোধী দলসমূহে এই চুক্তিক একপক্ষীয় বুলি অভিহিত কৰিছে ৷ একেসময়তে অসম সত্ৰ মহাসভাই সদৰী কৰিছে যে এই চুক্তিৰ ফলত দুখন সত্ৰ আৰু ২০ টা নামঘৰ মেঘালয়ৰ অন্তৰ্ভুক্ত হ’ব ৷ সত্ৰ মহাসভাৰ সাধাৰণ সম্পাদক কুসুম কুমাৰ মহন্তই কয় যে তেওলোকে শুনিবলৈ পোৱা মতে অসমৰ দুখন সত্ৰ আৰু ২০ টা নামঘৰ মেঘালয়ক হস্তান্তৰ কৰা হ’ব ৷ এয়া কেতিয়াও গ্ৰহনযোগ্য নহয় আৰু সত্ৰ মহাসভাই কেতিয়াও ইয়াৰ অনুমতি নিদিয়ে ৷ প্ৰয়োজনত সত্ৰ মহাসভা গুৱাহাটী উচ্চ ন্যায়ালয়ৰ দাৰস্থ হ’ব বুলিও মহন্তই সদৰী কৰে ৷
মেঘালয়ত অন্তৰ্ভুক্ত হোৱাৰ আশংকা ব্যক্ত কৰি নেটৱাজাপাৰ সত্ৰাধিকাৰ বিজয় ৰাভাই কয় যে তেওঁৰ সত্ৰখন লঙচাই গাঁৱত অৱস্থিত ৷ সত্ৰত ১০০ ঘৰ লোকে বাস কৰে ৷ তেওঁলোকে ইমানদিনে অসমত ভোটদান কৰি আহিছে আৰু নিজৰ সন্তানকো অসমৰ বিদ্যালয়লৈ প্ৰেৰণ কৰে ৷ এতিয়া যদি সত্ৰখন মেঘালয়ক হস্তান্তৰ কৰা হয় , খ্ৰীষ্টধৰ্মী ৰাজ্যখনত নিজৰ সত্ৰৰ সংস্কৃতি বৰ্তাই ৰখাটো সম্ভৱ নহ’ব বুলি সত্ৰাধিকাৰ ৰাভাই শংকা প্ৰকাশ কৰে ৷ তেওঁ লগতে জানিবলৈ দিয়ে যে এই সত্ৰখন দুই শতিকা আগতে স্থাপন কৰা হৈছিল ৷
