কিডনী সৰবৰাহৰ জড়িত চিকিৎসক গুৱাহাটীত গ্ৰেপ্তাৰ

গুৱাহাটীত অতি নাটকীয়ভাৱে গ্ৰেপ্তাৰ হৈছে মানৱ অংগ সৰবৰাহত জড়িত এজন চিকিৎসক ৷ মহানগৰ আৰক্ষীৰ জালত পৰা চিকিৎসকজন হৈছে ডা: অক্ষয় ৰাও ওৰফে ডা: ৰিচাৰ্ড আব্ৰাহাম লৰেন্স ৷ দিছপুৰ থানাত ৰুজু হৈ থকা এটা গোচৰৰ ভিত্তিত আৰক্ষীয়ে তেওক গ্ৰেপ্তাৰ কৰে ৷ গুৱাহাটীৰ এগৰাকী বিবাহিতা মহিলাক অপহৰণ কৰাৰ অভিযোগ তুলি তেওৰ স্বামীয়ে এই গোচৰটো ৰুজু কৰিছিল ৷ কিন্তু চিকিৎসকজনৰ গ্ৰেপ্তাৰৰ পাছতে পোহৰলৈ আহে আন কেতবোৰ ভয়ানক তথ্য ৷ এইগৰাকী চিকিৎসকৰ বিৰুদ্ধে ডেৰাডুনত ৰুজু হৈ আছে কেবাটাও গোচৰ ৷ মূলত : কিডনী আৰু মানৱ অংগৰ চোৰাং ব্যৱসায়ৰ অভিযোগ আছে চিকিৎসকজনৰ বিৰুদ্ধে ৷ কেবাবাৰো তেও আৰক্ষীৰ চকুত ধূলি দি পলায়ন কৰিবলৈও সক্ষম হৈছে ৷ কিন্তু শেষত তেও নাটকীয়ভাৱে ধৰা পৰিল মহানগৰ আৰক্ষীৰ হাতত ৷