কেনে আছে লাম্পি?

লাম্পিৰ পৰা অৰিন্দম বুঢ়াগোহাঁই আৰু গৌতম প্ৰতীম গগৈঃ ৰাইজে খায় পাহাৰৰ পৰা বৈ অহা নিজৰাৰ পানী৷ ঠাইখনত নাই কোনো ৰাজহুৱা পৰিবহণ ব্যৱস্থা৷ চিকিৎসাৰ কথা ক’বলৈ গ’লে বৃহত্তৰ অঞ্চলটোত আছে কেৱল এটা সৰু স্বাস্থ্যকেন্দ্ৰ৷ সপ্তাহৰ শুক্ৰবাৰৰ দিনটোতহে চিকিৎসালয়লৈ যায় চিকিৎসকৰ দল৷ প্ৰায় ২৫ খনকৈ গাঁও থকা অঞ্চলটোত আছে দুখন প্ৰাথমিক বিদ্যালয় আৰু এখন মধ্য ইংৰাজী বিদ্যালয়৷ অষ্টম শ্ৰেণীৰ পাছত পঢ়িবলৈ অঞ্চলটোত নাই কোনো উচ্চ শিক্ষাৰ অনুষ্ঠান৷ অঞ্চলটোত নাই মোবাইল ইণ্টাৰনেট সেৱাও৷ ঠাইখনৰ নাম লাম্পি৷

কামৰূপ জিলাৰ অন্তৰ্গত লাম্পিলৈ গুৱাহাটীৰ পৰা মাত্ৰ কেইঘণ্টামানৰ বাট৷ বকোৰ পৰা প্ৰায় ৩৫ কিলোমিটাৰৰ দুর্গম আৰু বিপদসংকুল পথেৰে আগুৱালে পায় লাম্পি৷ অসম-মেঘালয় সীমান্তৰ মনোৰম প্ৰাকৃতিক পৰিৱেশৰ মাজত অৱস্থিত লাম্পি বকো-ছয়গাঁও বিধানসভা সমষ্টিৰ অন্তৰ্গত৷ শেহতীয়াকৈ বকো-ছয়গাঁও সমষ্টিৰ বিজেপি বিধায়ক ৰাজু মেছে অসম বিধানসভাৰ মজিয়াতেই উদঙাই দিছিল লাম্পিৰ দুৰ্দশাৰ ছবি৷

বিধায়কগৰাকীৰ মতে, স্বাধীনতাৰ কেইবাদশক পাৰ হোৱাৰ পাছতো লাম্পিৰ জনসধাৰণে আজিৰ দিনতো খাব লাগে নিজৰাৰ পানী৷ লাম্পিত আাজিও চলে 2G ইণ্টাৰনেট সেৱা৷ দুর্গম লাম্পিত উপলব্ধ নহয় বাছ বা ৰাজহুৱা পৰিবহণ ব্যৱস্থা৷ এগৰাকী বিজেপি বিধায়কে অনা এই অভিযোগৰ পাছতেই অসম-মেঘালয় সীমান্তৰ বিবাদমান অঞ্চল লাম্পিত ‘দ্য ক্ৰছকাৰেণ্টে’ চলাইছিল চৰজমিন অনুসন্ধান৷

গুৱাহাটীৰ পৰা মাত্ৰ কেই কিলোমিটাৰমান দূৰত্বৰ লাম্পিত আজিও চলে 2 জি ইণ্টাৰনেট৷ সমীপৱর্তী মেঘালয়ত থকা এটা এয়াৰটেলৰ টাৱাৰৰ নেটৱর্কৰ জৰিয়তেহে মোবাইল ফোন ব্যৱহাৰ কৰিব পাৰে অসমৰ অধীনষ্ঠ লাম্পিৰ ৰাইজে৷ ইতিমধ্যে 4 জি ইণ্টাৰনেটৰ বাবে এটা টাৱাৰ স্থাপনৰ বাবে কেইবাবাৰো আবেদন-নিবেদন কৰিছে লাম্পিবাসীয়ে৷ কিন্তু আজিও লাম্পিত সূলভ হোৱা নাই উন্নত ইণ্টাৰনেট সেৱা৷ আনকি মেঘালয়ৰ টাৱাৰৰ নেটৱর্ক পাবলৈ আজিও ওখ টিলা অথবা গছত উঠি মোবাইল ব্যৱহাৰ কৰিব লাগে লাম্পিৰ ৰাইজে৷

নাই যাতায়াত সেৱা,বাছ বিচাৰি ৰাইজৰ আবেদন:
লাম্পিত নাই ৰাজহুৱা যোগাযোগ ব্যৱস্থা৷ চিকিৎসা,ব্যৱসায়,উচ্চ শিক্ষাকে ধৰি বিভিন্ন অত্যাৱশ্যকীয় কামৰ বাবে লাম্পিৰ ৰাইজ আহিব লাগে বকোলৈ৷ বকো আৰু লাম্পিৰ মাজৰ দূৰত্ব ৩৫ কিলোমিটাৰ৷ কিন্তু পথছোৱা অতি দুর্গম,বিপদসংকুল আৰু ঠেক৷ এনে এক পৰিস্থিতিত বকো আৰু লাম্পিৰ মাজত খুব কমেই যান-বাহনৰ চলাচল হয়৷ আনকি চিকিৎসাজনিকত জৰুৰীকালীন অৱস্থাত লাম্পিৰ পৰা বকোলৈ আহিবলৈ ৰাইজে ব্যক্তিগত এম্বুলেন্স ব্যৱহাৰ কৰিব লাগে৷ তেনেক্ষেত্ৰত লাম্পিৰ পৰা বকোলৈ এখন এম্বুলেন্সৰ ভাড়া প্ৰায় ৪ হাজাৰ টকা হয়৷ দৈনন্দিন কামকাজত সততে বকোলৈ আহিবলৈ বাধ্য হোৱা লাম্পিবাসীয়ে এখন বাছ বিচাৰি কেইবাবাৰো আবেদন জনাইছে৷

লাম্পিৰ ৰাইজে খায় নিজৰাৰ পানী:

লাম্পিৰ ৰাইজে আজিও পাহাৰৰ নিজৰাৰ পানী সেৱন কৰে৷ পাহাৰৰ পৰা নিজাববীয়া প্ৰচেষ্টাত পাইপ সংযোগ কৰি খোৱাপানীৰ ব্যৱস্থা কৰে লাম্পিবাসীয়ে৷ যদিও আপাৰ লাম্পিত জলজীৱন মিছনৰ এটা প্ৰকল্প স্থাপন কৰা হৈছে, তথাপি ‘দ্য ক্ৰছকাৰেণ্ট’ৰ অনুসন্ধানকালত প্ৰকল্পটো বিকল হৈ পৰি ৰোৱা দেখা গ’ল৷

অষ্টম শ্ৰেণীৰ পাছত পঢ়িবলৈ শিক্ষানুষ্ঠান নাই লাম্পিত:
লাম্পি এটা বৃহৎ অঞ্চল৷ এই সমগ্ৰ অঞ্চলটোত মাত্ৰ দুখন চৰকাৰী প্ৰাথমিক বিদ্যালয় আৰু এখন মধ্য ইংৰাজী বিদ্যালয় আছে৷ অষ্টম শ্ৰেণী উর্ত্তীণ হোৱাৰ পাছত লাম্পিৰ সন্তানে সাধাৰণতে ৩৫ কিলোমিটাৰৰ দুর্গম পথ পাৰ হৈ বকোলৈ আহিবলগীয়া হয়৷ তেনেক্ষেত্ৰত অষ্টম শ্ৰেণীৰ পাছতেই লাম্পিৰ অধিকাংশ ল’ৰা-ছোৱালীয়ে শিক্ষা জীৱন শেষ কৰিবলগীয়া হয়৷ কোনো কোনোৱে নাম ভর্তি কৰে মেঘালয় চৰকাৰে স্থাপন কৰা শিক্ষানুষ্ঠানত৷ উল্লেখ্য যে, লাম্পিত অসমৰ চৰকাৰী বিদ্যালয়ৰ তথৈবচ অৱস্থাৰফ বিপৰীতে কেইবাখনো শিক্ষানুষ্ঠান স্থাপন কৰিছে মেঘালয় চৰকাৰে৷

এটাই মাত্ৰ স্বাস্থ্যকেন্দ্ৰ-শুক্ৰবাৰেহে থাকে চিকিৎসক:
লাম্পিত চিকিৎসাখণ্ডৰ আন্তঃগাঁথনি বুলিবলৈ এটা মাত্ৰই ক্ষুদ্ৰ স্বাস্থকেন্দ্ৰ আছে৷ লৱাৰ লাম্পিত অৱস্থিত লৱাৰ লাম্পি আয়ুষ্মান আৰোগ্য মন্দিৰেই চিকিৎসাৰ বাবে শেষ ভৰষা লাম্পিবাসীৰ বাবে৷ প্ৰসূতিৰ প্ৰাথমিক চিকিৎসাসহ দুই এটা সাধাৰণ চিকিৎসা সেৱাৰ বাদে স্বাস্থ্যকেন্দ্ৰটোত কোনো আধুনিক চিকিৎসা ব্যৱস্থা নাই৷ উল্লেখ্য যে, সপ্তাহটোত মাত্ৰ শুক্ৰবাৰেহে স্বাস্থ্যকেন্দ্ৰটোলৈ আহে চিকিৎসকৰ প্ৰতিনিধি দল৷

এনেদৰেই স্বাধীনতাৰ কেইবাদশক পাৰ হৈ যোৱাৰ পাছতো আজি স্বাস্থ্য আৰু শিক্ষাৰ বাবে হাহাকাৰ কৰিবলগীয়া হৈছে লাম্পিৰ ৰাইজে৷ লাম্পিৰ ৰাইজে খাইছে নিজৰাৰ পানী-টিলা বগাই মেঘালয়ৰ টাৱাৰৰ নেটৱর্কৰ জৰিয়তে ব্যৱহাৰ কৰিছে মোবাইল ফোন৷ অসম-মেঘালয়ৰ এই বিবাদমান অঞ্চলটোত অসম চৰকাৰৰ উন্নয়নমূলক কামকাজৰ সুবিধা লৈছে মেঘালয়ে৷ ইতিমধ্যে মেঘালয় চৰকাৰে অসমৰ অধীনষ্ঠ এই লাম্পিত কেইবাখনো চৰকাৰী বিদ্যালয় স্থাপন কৰিছে৷ উল্লেখ্য যে, অসমৰ ৩৪৪১ হেক্টৰৰো অধিক ভূমি ইতিমধ্যে বেদখল কৰিছে মেঘালয়ে৷ কামৰূপ জিলাতেই মেঘালয়ৰ দখলত আছে ৮০২ হেক্টৰ ভূমি৷ কামৰূপ জিলাত মেঘালয়ে চলোৱা এই বেদখলৰ অন্যতম অঞ্চল হৈছে লাম্পি৷ অসম চৰকাৰৰ আন্ত:গাঁঠনিৰ অভাৱত উন্নয়নৰ মুখ নেদেখা লাম্পিত বিভিন্ন সময়ত অগ্ৰাসন অব্যাহত ৰাখিছে মেঘালয়ে৷