অৰূপ কলিতাৰ কলমত–
১৯৯৮ চনৰ ৫ মাৰ্চত পৰাজয়ৰ বিশ্লেষণৰ বাবে চি ডব্লিউ চিৰ বৈঠক অনুষ্ঠিত হ’ল ৷ বৈঠকত ছোনিয়া গান্ধীয়ে পোনপটীয়াকৈ দলৰ দায়িত্ব লোৱাৰ দাবী উত্থাপন হ’ল ৷ খঙত জ্বলি পকি উঠিল সীতাৰাম কেশৰী ৷ তেও মুকলিকৈ শাৰদ পাৱাৰ , তাৰিক আনৱাৰৰ বিৰুদ্ধে ষড়যন্ত্ৰৰ অভিযোগ উত্থাপন কৰিলে ৷ বেছি সময় এই অসন্তুষ্টি বাহাল নাথাকিল ৷ সীতাৰাম কেশৰীয়ে সভাপতি পদ ত্যাগ কৰাৰ কথা ঘোষণা কৰিলে ৷ কিন্তু তাৰ আগতে সাধাৰণ পৰিষদৰ অনুমোদন লোৱাৰ অজুহাত দেখুৱালে ৷ ইমান অপেক্ষাৰ ধৈৰ্য নাছিল কাৰো ৷ ১৪ মাৰ্চত পুণৰ চি ডব্লউ চিৰ বৈঠক বহিল ৷ তাতেই সীতাৰাম কেশৰীক পদছ্যুত কৰাৰ লগতে ছোনিয়া গান্ধীক নতুন সভানেত্ৰীৰ দায়িত্ব দিয়াৰ সিদ্ধান্ত লোৱা হ’ল ৷ এজন নিৰ্বাচিত সভাপতিৰ ক্ষমতাচ্যুত কৰি কংগ্ৰেছৰ সৰ্বেসৰ্বা হৈ উঠিল ছোনিয়া গান্ধী ৷ তেওৰ হাতলৈ ক্ষমতা অহাৰ পাছতে দলৰ পৰা বহিষ্কাৰ হ’ল – শাৰদ পাৱাৰ , পি এ চাংমা আৰু তাৰিক আনৱাৰ ৷ এই তিনিওজন নেতাই ছোনিয়া গান্ধীৰ বিদেশী মূলক লৈ ধাৰাবাহিকভাৱে দলৰ মজিয়াত প্ৰশ্ন তুলি আহিছিল ৷ভৱিষ্যতে ছোনিয়াৰ প্ৰতি প্ৰত্যাহ্বান সৃষ্টি কৰিব পৰা নেতাকেইজনক ১৯৯৯ চনৰ ১৯ মে’ত অনুষ্ঠিত চি ডব্লিউ চিৰ বৈঠকত বিদায় দিয়া হ’ল ৷ সেইদিনা অপমানিত হ’ল সীতাৰাম কেশৰীও ৷ক্ষোভে – অপমানে তেও স্বগতোক্তি কৰিছিল- কংগ্ৰেছ নেতৃত্ব উত্তপ্ত সূৰ্যৰ দৰে ৷ ওচৰ চাপিলে জ্বলি যাব , দূৰৈত থাকিলেও ঠাণ্ডাত কপি মৰিব ৷”এইদৰে ৰাজনীতিত আত্মপ্ৰকাশৰ সময়তে ২৪ , আকবৰ ৰোডত নিষ্কন্টক হৈ পৰিল ছোনিয়া গান্ধী৷
- Donation -
১৯৯৮ চনত দলৰ দায়িত্ব লৈয়ে ছোনিয়া গান্ধীয়ে তৎপৰতা দেখুৱালে ৷ সঘন সাংগঠনিক বৈঠকেৰে সংগঠন নিজৰ হাতৰ মুঠিলৈ আনিব বিচাৰিলে ৷ দুটা বছৰ ছোনিয়া গান্ধীক তেনে ৰূপত দেখা গ’ল ৷ ২০০০ ত অনুষ্ঠিত সাংগঠনিক নিৰ্বাচনত জিতেন্দ্ৰ প্ৰসাদক বিপুল ভোটত পৰাজিত কৰি তেও এইবাৰ গণতান্ত্ৰিকভাৱে দলৰ সভানেত্ৰী হিচাপে নিৰ্বাচিত হ’ল ৷ প্ৰণৱ মুখাৰ্জী , আহমদ পেটেল আদিৰ মন্ত্ৰনাৰে দল পৰিচালনা কৰিবলৈ আৰম্ভ কৰিলে ৷ ক্ৰমাগত সফলতা আহিল ২০০৪ আৰু ২০০৯ চনত ৷ ক্ষমতা যিমানেই স্থায়ী হৈ পৰে , স্তাৱক বাহিনীও সিমান বিশাল হৈ পৰে ৷ এক গণবিচ্ছিন্ন অৱস্থাত ২০১৪ চনত শোচনীয় পৰাজয়ৰ মুখ দেখিলে কংগ্ৰেছে ৷ ২০১৯ চনতো একে ফলাফলৰ পুণৰাবৃত্তি ৷ ৫০ খ আসনৰো কাষ চাপিব পৰা নাই প্ৰাচীন দলটো ৷ বৃদ্ধা মাতৃৰ ওপৰত সকলো দায়িত্ব এৰি ৰাহুল গান্ধী এতিয়া এজন ৰাজনৈতিক পৰ্যটক ৷ ২৪ , আকবৰ ৰোডত পুনৰ সৰ্বময় কৰ্তৃত্ব স্থাপন কৰিবলৈ ছোনিয়া গান্ধীৰ শৰীৰে নাটানে ৷ তেওৰ দুই মুখ্য পৰামৰ্শদাতা প্ৰণৱ মুখাৰ্জী আৰু আহমদ পেটেলে চিৰকাললৈ এই ঠিকনা এৰিছে ৷ ২২ বছৰ পূৰ্বে দলৰ খহনীয়া দেখি মন সলাইছিল ছোনিয়া গান্ধীয়ে ৷১০ জনপথৰ পৰা আহি ভৰি দিছিল ২৪ আকবৰ ৰোডত ৷ আজি ছোনিয়া অসুস্থ কিন্তু ৰাহুল সেই দায়িত্ব পালন কৰিবলৈ অসমৰ্থ ৷ দ্বিতীয় পৰ্যায়ৰ বংশবাদে দলটোৰ ভিতৰচ’ৰা অহৰহ জোকাৰি আছে৷ ২২ বছৰ আগতেও দলৰ নেতৃত্বক লৈ বিদ্ৰোহৰ জোকাৰণি উঠিছিল ৷ নিজৰ অনুগত বাহিনী সৃষ্টি কৰি ছোনিয়া গান্ধী সেই প্ৰত্যাহ্বানৰ মুখামুখি হৈছিল ৷ এই কৌশলে দলটোৰ কিমান ক্ষতি কৰিলে , কিমান উপকৃত কৰিলে , তাৰ বিচাৰ সময়ে কৰিব ৷ কিন্তু আজি আসন্ন বিপদৰ মুখামুখি হ’বলৈ কংগ্ৰেছত কোনো নাই ৷ ২৪ , আকবৰ ৰোডৰ চকীবোৰ শূণ্য ৷ টুইটাৰকে সকলোৱে পলায়নৰ পথ হিচাপে বাচি লৈছে ৷ এনে এক মুহূৰ্তত এটা প্ৰাচীন ৰাজনৈতিক দলটোৰ তিল তিল মৃত্যুৰ সাক্ষী হৈ ৰৈছে চ্যু কীৰ পিয়ানোৰ প্ৰতিধ্বনি গুঞ্জৰিত ২৪ আকবৰ ৰোড ৷য’ৰ পৰা কংগ্ৰেছে পুনৰ জনম লৈছিল , যাক দেশৰ ৰাজনৈতিক ক্ষমতাৰ অলিন্দ হিচাপে বিবেচনা কৰা হৈছিল , সেই ঠিকনাটি আজি লাহে লাহে মচ খাই আহিছে , উৱলি গৈছে …৷(সমাপ্ত)
