কট্টৰপন্থী ইছলামিক সংগঠন তালিবানৰ যুঁজাৰু বাহিনীয়ে শুকুৰবাৰে কান্দাহাৰ দখল কৰা পাছত উপস্থিত হৈছে লোগাৰৰ ৰাজধানী ফুল- এ -আলমত ৷ আফগান চৰকাৰৰ বাবে এয়া অতি বিপজ্জনক ৷ কিয়নো ফুল_এ- আলম দেশখনৰ ৰাজধানী কাবুলৰ পৰা মাত্ৰ ৫০ কিলোমিটাৰ দূৰত্বত অৱস্থিত ৷ মূল পথেৰে মাত্ৰ দুঘন্টাৰ ভিতৰত তালিবান গৈ উপস্থিত হ’ব পাৰিব ৰাজধানী চহৰখনত ৷ ইতিমধ্যে ১৮ খন ৰাজ্যৰ ৰাজধানীত তালিবানে নিজৰ আধিপত্য বিস্তাৰ কৰিছে ৷ ইফালে , আমেৰিকাৰ চোৰাংছোৱাই সদৰী কৰিছিল যে মাত্ৰ ৩০ দিনৰ ভিতৰত তালিবানে কাবুলক দেশৰ আন প্ৰান্তৰ পৰা বিচ্ছিন্ন কৰি ৯০ দিনত নিৰ্বাচিত চৰকাৰ ওফৰাই দিব পাৰে ৷ চোৰাংছোৱাৰ এই ভৱিষ্যতবাণী সঁচা হোৱাৰ দিশত আগবাঢ়িছে ৷
ৰাষ্ট্ৰসংঘই কি কয় ?
আফগান সেনা আৰু তালিবানৰ যুদ্ধত শংকিত হৈ পৰিছে দেশখনৰ নাগৰিক ৷ নিজৰ নিজৰ ঘৰ এৰি বহু মানুহ সুৰক্ষাৰ বাবে কাবুল অভিমুখে ৰাওণা হৈছে ৷ অনেকক দেখা গৈছে পথৰ ওপৰতে মুকলি আকাশৰ তলত নিশা কটোৱাৰ অৱস্থাত ৷ এনে পৰিস্থিতিত ৰাষ্ট্ৰসংঘই চুবুৰীয়া দেশসমূহক নিজৰ নিজৰ সীমান্ত মুকলি কৰি ৰাখিবলৈ আহ্বান জনাইছে ৷ এক গভীৰ মানবীয় সংকটৰো আশংকা ব্যক্ত কৰা হৈছে ৷ কিয়নো , নিজৰ ঘৰ এৰি কাবুলত আশ্ৰয় লোৱা লোকসকলৰ ভিতৰত ৭২ হাজাৰ শিশুও আছে ৷
আন দেশৰ প্ৰতিক্ৰিয়া কি ?
ব্ৰিটেইনৰ প্ৰতিৰক্ষা মন্ত্ৰী বেন বালেছে সকীয়ণি প্ৰদান কৰি কৈছে যে তালিবানৰ আগ্ৰাসনৰ লগে লগে আফগানিস্তান গৃহযুদ্ধৰ অভিমুখে আগবাঢ়িছে ৷ ব্ৰিটেইনৰ লগতে আমেৰিকাইও দেশখনত থকা দূতাবাসত কৰ্মচাৰীৰ সংখ্যা কম কৰাৰ কথা ঘোষণা কৰিছে ৷কিন্তু ৰাছিয়াই এতিয়াও এনে কোনো সিদ্ধান্ত লোৱা নাই বুলি সদৰী কৰিছে ৷
