বিশ্ববাসীয়ে দিলীপ কুমাৰ নামেৰে চিনি পোৱা , দুৰন্ত অভিনয়েৰে প্ৰতিগৰাকী দৰ্শকৰ মনত নিগাজী হৈ ৰোৱা এইগৰাকী যুগজয়ী অভিনেতাই কাহানিও ভবা নাছিল যে এদিন তেও পাহৰি যাব লাগিব পিতৃ – মাতৃয়ে দিয়া আচল নামটোও ৷১৯২২ চনত জন্ম হোৱা দিলীপ কুমাৰৰ দেউতাক আছিল মুম্বাইৰ এজন ফলৰ ব্যৱসায়ী ৷ ঘৰুৱা ব্যৱসায়ত সহায় কৰিবৰ বাবে তেও সৰুৰে পৰা দেউতাকৰ কাম – কাজৰ লগত জড়িত হৈ পৰিছিল ৷ সেই সময়ত তেওৰ পৰিচয় আছিল মহম্মদ চৰবৰ খানৰ পুত্ৰ ইউছুফ চৰবৰ খান ৷
এদিন দেউতাকৰ লগত কাজিয়া লাগি ইউছুফ খান গুছি গ’ল পুণেলৈ ৷ নিজৰ ভৰিত নিজে থিয় দিয়াৰ লক্ষ্যৰে তেও কামৰ সন্ধান কৰিবলৈ আৰম্ভ কৰিলে ৷ তেনেসময়তে লাভ কৰিলে পুণেত থকা ব্ৰিটিছ আৰ্মিৰ কেন্টিনত সহায়কাৰীৰ চাকৰি ৷ তাতেই তেও নিজাববীয়াকৈ চেন্দুইছ বিক্ৰী কৰিবলৈ আৰম্ভ কৰিলে ৷ ব্ৰিটিছ সেনাৰ মাজত জনপ্ৰিয় হৈ পৰিল ইউছুফ খানৰ ছেন্দুইছ ৷ কিন্তু সেই কেন্টিনতে এদিন ভাৰতৰ স্বাধীনতাৰ দাবীত সভা অনুষ্ঠিত কৰি ইউছুফ খানে চাকৰি হেৰুৱাবলগীয়াটো হ’লেই গ্ৰেপ্তাৰো হ’ল ৷
চাকৰি হেৰুৱাই ইউছুফ খান পুণৰ উভতি আহিল মুম্বাইলৈ ৷ পুণৰ দেউতাকৰ হাতত ধৰি ব্যৱসায়ত মন দিলে ৷এদিন দেউতাকে ফলৰ বাগিচা এখন কিনিবলৈ নাইনিতাললৈ পঠিয়ালে ৷ ইউছুফ তালৈ গৈ এক টকা অগ্ৰিম ধন দি বাগিচাৰ বন্দবস্ত কৰি আহিলগৈ ৷ দেউতাক সন্তুষ্ট হ’ল ইউছুফৰ কামত ৷লাহে লাহে আন ডাঙৰ কামবোৰৰ দায়িত্বও দিয়া আৰম্ভ কৰিলে ৷এদিন ব্যৱসায়ৰ কামত এঠাইলৈ যাবলৈ লওতেই ৰেলৱে ষ্টেচনত সাক্ষাৎ হ’ল মানসিক ৰোগৰ চিকিৎসক ডাক্তৰ মাছানীৰ লগত ৷ তেও বোম্বে টকীজৰ স্বত্বাধিকাৰী দেবিকা ৰাণীৰ ওচৰলৈ যাবলৈ ৰে’লৰ বাবে অপেক্ষা কৰি আছিল ৷ডাক্তৰ মাছানীয়ে লগ ধৰিলে – ব’লা , বোম্বে টকীজ চাই আহিবা ৷ কিজানি তাতেই কিবা কাম পায়েই যোৱা ৷ চিনেমাৰ ষ্টুডিও চোৱাৰ উৎকণ্ঠাত ইউছুফ খান বোম্বে টকীজলৈ ৰাওণা হ’ল ৷
সেই যাত্ৰাই আছিল ইউছুফ খানৰ ভাগ্য সলনিৰ যাত্ৰা ৷ জীৱন সলনিৰ যাত্ৰা ৷
বোম্বে টকীজ সেই সময়ৰ আটাইতকৈ সফল প্ৰডাকশ্যন হাউচ বিলাকৰ ভিতৰত অন্যতম আছিল ৷ তাৰ স্বত্বাধিকাৰী দেবিকা ৰাণী নিজে অভিনেত্ৰী হোৱা উপৰিও এগৰাকী দূৰদৰ্শী মহিলা আছিল ৷ ডাক্তৰ মাছানীয়ে ইউছুফ খানক পৰিচয় কৰাই দিয়াৰ লগতে তাতেই কিবা কামত নিয়োজিত কৰাৰ বাবে অনুৰোধ কৰিলে ৷ দেবিকা ৰাণীয়ে ইউছুফ খানক উৰ্দু ভাষা জানেনে নাই সুধিলে ৷ তেও কিবা উত্তৰ দিয়াৰ আগতেই ডাক্তৰ মাছানীয়ে ইউছুফৰ পৰিয়াল আৰু তেওলোকৰ ফলৰ ব্যৱসায়ৰ কথা ক’বলৈ আৰম্ভ কৰিলে ৷ সকলো মনোযোগেৰে শুনাৰ পাছত দেবিকা ৰাণীয়ে ইউছুফক সুধিলে – অভিনেতা হ’ব বিচাৰা নেকি ? এই প্ৰশ্নৰ লগে লগে ১২৫০ টকা দৰমহাৰ চাকৰি এটাও অফাৰ কৰিলে ৷ ইউছুফ খানে বিনয়েৰে ক’লে – এই কাম কৰিবলৈ মোৰ কোনো অভিজ্ঞতা নাই ৷ চিনেমাৰ বিষয়ে মই একোৱেই নাজানো ৷ দেবিকা ৰাণীয়ে পুণৰ সুধিলে – তুমি ফলৰ ব্যৱসায়ৰ বিষয়ে কিমান জানা ? ইউছুফৰ উত্তৰ – লাহে লাহে শিকি লম ৷ তেতিয়া দেবিকা ৰাণীয়ে ক’লে –ফলৰ ব্যৱসায় যদি শিকিব পাৰা , তেনেহ’লে চিনেমা আৰু অভিনয়ো শিকি ল’ব পাৰিবা ৷মোক এজন দেখনিয়াৰ , পঢ়া- শুনা থকা আৰু যুৱ অভিনেতাৰ দৰকাৰ ৷ সেইবাবেই তোমাক এই অফাৰ দিছো ৷
সেয়া ১৯৪৩ চনৰ ঘটনা ৷ সেই সময়ত ১২৫০ টকা দৰমহা মানে এটা বিশাল অংকৰ ধন ৷ ইউছুফ খানে প্ৰথমতে সেয়া বছৰেকৰ দৰমহা বুলি ভাবিছিল ৷ কিন্তু যেতিয়া প্ৰতিমাহে ইমান বিশাল পৰিমানৰ দৰমহা লাভ কৰিব বুলি নিশ্চিত হ’ল, লগে লগে চাকৰিৰ অফাৰ স্বীকাৰ কৰি ল’লে আৰু অভিনেতা হ’বলৈ মন বান্ধিলে ৷ বোম্বে টকীজত যোগদান কৰি শশীধৰ মুখাৰ্জী , অশোক কুমাৰৰ পৰা অভিনয়ৰ পাঠ শিকিবলৈ ল’লে ৷
এদিন পুৱা ষ্টুডিওত সোমোৱাৰ লগে লগে দেবিকা ৰাণীয়ে ইউছুফক নিজৰ কেবিনলৈ মাতি পঠিয়ালে ৷ তেও ইংৰাজীৰ স্পষ্টকৈ ক’লে – ইউছুফ , তোমাক অতি সোণকালে এজন অভিনেতা হিচাপে লন্স কৰিব বিচাৰিছো ৷ তুমি সাজু হোৱা ৷ কিন্তু স্ক্ৰীণৰ বাবে তোমাক এটা নাম লাগিব ৷এনেকুৱা এটা নাম হোৱা উচিত যিটো তোমাৰ ৰোমান্টিক ইমেজৰ লগত খাপ খাব ৷ তোমাৰ নামৰ কথা ভাবি থাকোতে দিলীপ কুমাৰ নামটো মোৰ মনলৈ আহিল ৷ কেনেকুৱা হ’ব বুলি ভাবা তুমি ? ইউছুফ খান কথাটো শুনিয়েই হতচকিত হৈ পৰিল ৷ তেও কেতিয়াও আন এটা নাম লোৱাৰ কথা ভবা নাছিল ৷ সেই সময়ত দেশ বিভাজনৰ দাবীও প্ৰবল হৈ উঠা নাছিল ৷ গতিকে হিন্দু – মুছলমানৰ ভেদাভেদো নাছিল ৷ তেনে এটা সময়ত দেবিকা ৰাণীয়ে দিয়া নাম সলনিৰ প্ৰস্তাৱ শুনি স্বাভাবিকতে আচৰিত হৈ পৰিল ইউছুফ ৷ কিন্তু দেবিকা ৰাণীয়ে বজাৰৰ কথা ভাবিছিল ৷ কিয়নো তাৰ আগতে তেও প্ৰযোজনা কৰা “অছুত কথা “ চিনেমাখনত কুমুদলাল গাংগুলীক দৰ্শকৰ আগত পৰিচয় কৰাই দিছিল অশোক কুমাৰ হিচাপে ৷ পৰৱৰ্তী সময়ত অশোক কুমাৰ সেই নামেৰেই চুপাৰষ্টাৰত পৰিণত হ’ল ৷ সেইবাবেই ইউছুফ খানকো দেবিকা ৰাণীয়ে এটা নতুন নামেৰে দৰ্শকৰ মাজলৈ লৈ যাব বিচাৰিলে ৷ ইউছুফ অৱশেষত মান্তি হ’ল ৷ তাৰ পাছত ১৯৪৪ চনত মুক্তি পোৱা “জোৱাৰ ভাটা “ চিনেমাত দিলীপ কুমাৰ নামেৰেই ভুমুকি মাৰিলে ইউছুফ খানে।
এজন ফলৰ ব্যৱসায়ীৰ জীৱনৰ এক নতুন অধ্যায় আৰম্ভ হ’ল ৷ প্ৰথমখন চিনেমা বিশেষ সফল নহ’ল ৷ কিন্তু তাৰ পাছৰে পৰা এখনৰ পাছত আন এখন ছুপাৰহীট চিনেমাৰে আলোড়নৰ সৃষ্টি কৰি গ’ল দিলীপ কুমাৰে ৷ এইগৰাকী যুগজয়ী অভিনেতাৰ প্ৰতিভাৰ বিষয়ে নতুনকৈ পৰিচয় কৰাই দিয়াৰ প্ৰয়োজন নাই ৷ ৬৫ খনৰো অধিক চিনেমাৰে ভাৰতীয় চিনেমাক সমৃদ্ধ কৰি ৯৮ বছৰ বয়সত বুধবাৰে তেও চিৰবিদায় মাগিলে ৷