নিয়তিৰ ওচৰত হাৰ মানিলে নন্দিতাই৷ডিব্ৰুগড়ৰ এখন ব্যক্তিগত চিকিৎসালয়ত চিকিৎসাধীন হৈ থকা ধেমাজিৰ নন্দিতা শইকীয়াই আজি শেষ নিশ্বাস ত্যাগ কৰিলে৷কেৱল ধেমাজিতেই নহয়,এই ঘটনাই সমগ্ৰ ৰাজ্যতে শোকৰ ছাঁ পেলাইছে৷ সমান্তৰালভাবে নন্দিতা শইকীয়া আক্ৰমণৰ সন্মুখীন হ’ব লগা ঘটনাৰ কাৰণ সন্দর্ভতো চলিছে চর্চা৷বহুতেই ইয়াক প্ৰেমজনিত কাৰণ বুলি সন্দেহ প্ৰকাশ কৰিছে৷আক্ৰমণৰ কাৰণ যিয়েই নহওক কিয়-এয়া অপৰাধ,হত্যাৰ অপৰাধ৷নাৰীৰ বিৰুদ্ধে অপৰাধৰ ৰম্যভূমি এই ৰাজ্যত এই ঘটনাও নাৰীৰ বিৰুদ্ধে অপৰাধৰে এটা উদাহৰণ৷
নেচনেল ক্ৰাইম ৰেকৰ্ড ব্যুৰ’ৰ তথ্য অনুসৰি,২০১৯ চনত অসমৰ ২৭ গৰাকী মহিলা ধর্ষণ আৰু হত্যাৰ বলি হৈছিল৷যৌতুকজনিত কাৰণত বছৰটোত হত্যাৰ বলি হৈছিল ১৬৪ গৰাকী মহিলা৷আনহাতে বছৰটোত প্ৰৰোচনামূলক আত্মহত্যাৰ বলি হ’ল ৫৩ গৰাকী মহিলা৷নাৰীৰ বিৰুদ্ধে অপৰাধৰ ৰম্যভূমি অসমত সেইবাবেই নন্দিতা শইকীয়া কেৱল মাথো এটা উদাহৰণহে৷
দেশৰ ভিতৰত সর্বাধিক নাৰীৰ বিৰুদ্ধে অপৰাধ সংঘটিত হয় অসমত৷২০১৯ চনত অসমত নাৰীৰ বিৰুদ্ধে অপৰাধৰ হাৰ ১৭৭.৮ ৷দিত্বীয় স্থানৰ দিল্লীত অপৰাধৰ হাৰ ১৪৪৷
২০১৭ চনত অসমত নাৰীৰ বিৰুদ্ধে সংঘটিত হৈছিল ২৩০৮২ টা অপৰাধ৷২০১৮ চনত সংঘটিত হল ২৭৬৮৭ টা অপৰাধ আৰু ২০১৯ চনত সংঘটিত হল ৩০০২৫ টা অপৰাধ ৷
সেইবাবেই এতিয়া প্ৰশ্ন উঠিছে – বছৰি আৰু কিমান নন্দিতাই প্ৰাণ দিব লাগিব এইখন অসমত ?
নাৰীৰ বিৰুদ্ধে চলি অহা এই জিঘাংসাৰ অন্ত পৰিবনে ?