অসম বিধানসভাৰ আগন্তুক অধিৱেশনত উত্থাপন কৰা হ’ব গো সুৰক্ষা বিধেয়ক ৷ ১৯৫০ চনৰ গো সুৰক্ষা আইন বাতিল কৰি নতুন ৰূপত উত্থাপন কৰা হ’ব গো সুৰক্ষা বিধেয়ক ৷ এই বিধেয়কক লৈ ইতিমধ্যে ৰাজ্যত নতুন বিতৰ্কৰ সূচনা হৈছে ৷ কাৰণ , ভাৰতবৰ্ষত গৰু কেৱল এটা চাৰিঠেঙীয়া , ঘৰচীয়া জন্তু নহয় ৷ গৰু এবিধ ৰাজনৈতিক জন্তুও ৷ গো হত্যা , গো সুৰক্ষা স্বাধীনতাৰ পাছৰে পৰা ভাৰতৰ ৰাজনৈতিক ইছ্যু হিচাপে পৰিগণিত হৈ আহিছে ৷ বিশেষকৈ জনসংঘ আৰু তাৰ পাছত ভাৰতীয় জনতা পাৰ্টীয়ে গো সুৰক্ষাৰ বিষয়টোক কেন্দ্ৰীয় ৰাজনৈতিক ইছ্যুৰ মান্যতা দি আহিছে ৷ সেইবাবেই দ্বিতীয়বাৰ অসমত ক্ষমতালৈ অহাৰ পাছতে বিজেপি চৰকাৰে বলবৎ কৰিবলৈ ওলাইছে গো সুৰক্ষা আইন ৷ যোৱা ৮ জুলাইত এই কথা ঘোষণা কৰিছে সংসদীয় পৰিক্ৰমা মন্ত্ৰী পীয়ূষ হাজৰিকাই ৷ একেদিনাই প্ৰকাশ পাইছে আন এটা গুৰুত্বপূৰ্ণ সমীক্ষা ৷ দেশৰ প্ৰায় ৩০ হাজাৰ লোকক সামৰি পিউ ৰিচাৰ্চ চেন্টাৰে প্ৰকাশ কৰিছে এই সমীক্ষাটো ৷ সমীক্ষাটোৰ নাম দিয়া হৈছে ৰিলিজিয়ন ইন ইণ্ডিয়া : ট’লাৰেন্স এণ্ড চেগ্ৰিগেশ্যন অৰ্থাৎ ভাৰতবৰ্ষত ধৰ্ম : সহনশীলতা আৰু বিভাজন ৷ ধৰ্ম সম্পৰ্কীয় কেবাটাও গুৰুত্বপূৰ্ণ দিশ সামৰি লৈছে পি আৰ চিৰ সমীক্ষাটোৱে ৷ আনকি গৰু আৰু গাহৰিৰ প্ৰসংগায়ো আমেৰিকাৰ সংস্থাটোৰ প্ৰতিবেদনত স্থান পাইছে ৷
সমীক্ষাৰ প্ৰথম তালিকাখনত কোৱা হৈছে যে ৯১ শতাংশ ভাৰতীয়ই বিশ্বাস কৰে যে তেওলোকৰ ধৰ্মীয় উপাসনাৰ সম্পূৰ্ণ স্বাধীনতা আছে , ৮৪ শতাংশৰ মতে সচাঁ অৰ্থত ভাৰতীয় হ’বৰ বাবে সকলো ধৰ্মৰ প্ৰতি সন্মান প্ৰদৰ্শন কৰা উচিত ৷ কিন্তু বিবাহৰ ক্ষেত্ৰত হিন্দু , মুছলমানকে ধৰি সকলো ধৰ্মৰ লোকৰ ক্ষেত্ৰত অনেক ৰক্ষণশীলতা আছে ৷ ৬৭ শতাংশ হিন্দু , ৮০ শতাংশ মুছলমান , ৩৭ শতাংশ খ্ৰীষ্টিয়ান , ৫৯ শতাংশ শিখ , ৪৮ শতাংশ বৌদ্ধ আৰু ৬৬ শতাংশ জৈন ধৰ্মালম্বী লোকে তেওলোকৰ ধৰ্মৰ মহিলা আন ধৰ্মৰ লোকলৈ বিয়া হোৱাটো নিবিচাৰে ৷ সমীক্ষাৰ তৃতীয়খন তালিকা অনুসৰি প্ৰতি ৫ জন মুছলমানৰ ১ জনেই যোৱা এবছৰৰ ভিতৰত ধৰ্মীয় বিদ্বেষৰ বলি হৈছে ৷ পি আৰ চিৰ সমীক্ষাৰ আন এটা গুৰুত্বপূৰ্ণ দিশ হৈছে – ৭৪ শতাংশ মুছলমান লোকেই তেওলোকৰ পাৰিবাৰিক সমস্যা নিষ্পত্তিৰ বাবে নিজা ধৰ্মীয় আদালতলৈ যোৱাটো সমৰ্থন কৰে ৷ পি আৰ চিৰ সমীক্ষাত স্থান পাইছে গৰু আৰু গাহৰিৰ প্ৰসংগইও ৷ এই দুবিধ জন্তু ভাৰতৰ নাগৰিকৰ বাবে যে এতিয়াও দুটা ধৰ্মৰ প্ৰতীক স্বৰূপ , সেয়া সমীক্ষাটোত জলজল পটপটকৈ ওলাই পৰিছে ৷ সমীক্ষাৰ মতে , ৭২ শতাংশ হিন্দুৱে ভাবে যে যিসকল লোকে গো মাংস ভক্ষণ কৰে , তেওলোক কেতিয়াও হিন্দু হ’ব নোৱাৰে ৷ আনহাতে , ৭৭ শতাংশ মুছলমানে বিশ্বাস কৰে যে যিসকল লোকে গাহৰি মাংস ভক্ষণ কৰে তেওলোক কেতিয়াও মুছলমান হ’ব নোৱাৰে ৷ স্বাভাৱিকতে এই তথ্যই ভাৰতবৰ্ষত গৰু , গাহৰিৰ নামত চলি থকা ৰাজনীতিৰ এটা দিশ প্ৰতিফলিত কৰিছে ৷ তাতোকৈ ডাঙৰ কথাটো হ’ল , দুয়োটা ধৰ্মৰ বৃহৎ সংখ্যক লোকেই এতিয়াও ভাবে যে এজন মানুহ কেতিয়াও সচাঁ হিন্দু বা মুছলমান হ’ব নোৱাৰে যদিহে তেও আন ধৰ্মৰ ধৰ্মীয় উৎসৱত অংশগ্ৰহণ কৰে ৷ ৬১ শতাংশ মুছলমানে ধৰ্মীয় উপাসনাৰ বাবে মছজিদলৈ যোৱাটো উচিত বুলি বিবেচনা কৰে ৷ ইয়াৰ বিপৰীতে ৪৮ শতাংশ হিন্দুয়েহে উপাসনাৰ বাবে মন্দিৰলৈ যোৱাটো দৰকাৰী বুলি ভাৱে ৷ উল্লেখ্য যে ২০১৯ চনৰ ১৭ নৱেম্বৰৰ পৰা ২০২০ চনৰ ২৩ মাৰ্চলৈ দেশৰ ২৬ খন ৰাজ্য আৰু ৩ খন কেন্দ্ৰীয় শাসিত অঞ্চলত এই সমীক্ষা চলোৱা হৈছিল ৷ সমীক্ষাটোত ৬ টা ধৰ্মৰ প্ৰায় ৩০ হাজাৰ লোকে অংশ লৈছিল ৷