পশ্চিমবংগত এতিয়া লক্ষ্মী ভাণ্ডাৰ বনাম অৰুণোদয়ৰ যুঁজ ৷ মমতা বেনাৰ্জীৰ ‘লক্ষ্মী ভাণ্ডাৰ’ক এইবাৰ পশ্চিমবংগ বিজেপিয়ে কাউন্টাৰ দিছে হিমন্ত বিশ্ব শৰ্মাৰ ‘অৰুণোদয়’ আঁচনিৰে ৷
তৃতীয়বাৰৰ বাবে পশ্চিমবংগত ক্ষমতালৈ অহা মমতা বেনাৰ্জী নেতৃত্বাধীন তৃণমূল কংগ্ৰেছ চৰকাৰে পশ্চিমবংগত আৰম্ভ কৰিবলৈ লৈছে লক্ষ্মী ভাণ্ডাৰ শীৰ্ষক এখন নতুন আঁচনি ৷ এই আঁচনিখনক লৈ পশ্চিমবংগৰ জনসাধাৰণৰ মাজত ইতিমধ্যে ব্যাপক আগ্ৰহ সৃষ্টি হৈছে ৷বংগৰ বিজেপিয়ে এনে পৰিস্থিতিৰ মোকাবিলা কৰিছে অসমৰ ‘অৰুণোদয়’ আঁচনিৰে ৷বংগ বিজেপিৰ মতে মমতা চৰকাৰতকৈও ভাল আঁচনি অসমত চলাই আছে হিমন্ত বিশ্ব শৰ্মাৰ চৰকাৰে ৷ আঁচনিখন হ’ল ‘অৰুণোদয়’ ৷
শুকুৰবাৰে অসম চৰকাৰৰ ১০০ দিন সম্পূৰ্ণ হোৱা উপলক্ষে মুখ্যমন্ত্ৰী হিমন্ত বিশ্ব শৰ্মাই এলানি নতুন ঘোষণা কৰে ৷ ইয়াৰ ভিতৰত আছে ‘অৰুণোদয়’ আঁচনিৰ মাহিলী ভাট্টা ১০০০ টকালৈ বৃদ্ধি ৷ ইয়াৰ পূৰ্বে এই আঁচনিৰ জড়িয়তে দৰিদ্ৰ মহিলাসকলে মাহে ৮৩০ টকাকৈ লাভ কৰি আহিছিল ৷ ২০২০ চনৰ অক্টোবৰ মাহৰ পৰাই অসমত চলি আহিছে ‘অৰুণোদয়’ আঁচনি ৷ তেতিয়া অসমৰ বিত্তমন্ত্ৰী আছিল ড: হিমন্ত বিশ্ব শৰ্মা ৷
এতিয়া পশ্চিমবংগত মমতা বেনাৰ্জীয়ে লক্ষ্মী ভাণ্ডাৰ আঁচনি ৰূপায়ন কৰিবলৈ ওলোৱাৰ লগে লগে ‘অৰুণোদয়’ আঁচনিৰ উদাহৰণেৰে সোচ্চাৰ হৈ উঠিছে বংগ বিজেপিৰ নেতৃত্ব ৷মমতা বেনাৰ্জীৰ লক্ষ্মী ভাণ্ডাৰ আঁচনি অনুসৰি গৃহিনীসকলে প্ৰতিমাহে ৫০০ টকাকৈ লাভ কৰিব ৷ পিছপৰা জাতি আৰু জনজাতিৰ ক্ষেত্ৰত এই অনুদানৰ পৰিমান হ’ব মাহিলি ১০০০ টকা ৷ তদুপৰি ২৫ ৰপৰা ৬০ বছৰ বয়সৰ মহিলাই আৰ্থিক প্ৰয়োজন হ’লে ধন বিচাৰি এই আঁচনিৰ অধীনত আবেদনো কৰিব পাৰিব ৷ কিন্তু স্থায়ী বেতন বা পেঞ্চন পোৱা ব্যক্তিৰ পত্নীয়ে এই আঁচনিৰ সুবিধা লাভ নকৰিব ৷
মমতা বেনাৰ্জীয়ে এই আঁচনি ঘোষণা কৰাৰ পাছতেই পশ্চিমবংগ বিজেপিয়ে ইয়াৰ মোকাবিলা কৰিবলৈ ৰণকৌশল যুগুতাই উলিয়াইছে ৷ এই কৌশল অনুসৰি লক্ষ্মী ভাণ্ডাৰৰ বিপৰীতে জনসাধাৰণৰ সন্মুখত দাঙি ধৰা হ’ব অসমৰ ‘অৰুণোদয়’ আঁচনিৰ উদাহৰণ ৷ বংগ বিজেপিৰ সাধাৰণ সম্পাদক সায়ন্তন বসুয়ে কয় যে বিজেপি শাসিত কোনো ৰাজ্যৰ প্ৰকল্পৰ লগত লক্ষ্মী ভাণ্ডাৰ আঁচনিৰ তুলনা নহয় ৷ আকাশ আৰু পাতাল পাৰ্থক্য আছে ৷ বংগৰ এই আঁচনি তৃণমূলৰ দলীয় নেতাসকলৰ ধন ঘটাৰ আহিলা বুলিও বিজেপি নেতাগৰাকীয়ে কটাক্ষ কৰে ৷
বিজেপিৰ এনে আক্ৰমণৰ প্ৰত্যুত্তৰ দি তৃণমূলৰ মুখপাত্ৰ তাপস ৰায়ে কৈছে যে বংগত মমতা বেনাৰ্জীয়ে বিভিন্ন আঁচনিৰ মাধ্যমেৰে সাধাৰণ মানুহক যিমানবোৰ সুবিধা দিছে , তাৰ কোনো নজিৰ অতীতত পাবলৈ নাই ৷ কেন্দ্ৰীয় চৰকাৰৰো ইমান প্ৰকল্প নাই ৷গতিকে বিজেপিয়ে কি প্ৰচাৰ কৰে সেয়া বিচাৰ্য বিষয় নহয় ৷
এনেদৰেই এতিয়া পশ্চিমবংগত মমতা বেনাৰ্জীৰ ‘লক্ষ্মী ভাণ্ডাৰ’ বনাম হিমন্ত বিশ্ব শৰ্মাৰ ‘অৰুণোদয়’ হৈ পৰিছে প্ৰধান ৰাজনৈতিক বিতৰ্কৰ কেন্দ্ৰবিন্দু ৷