কংগ্ৰেছ দলৰ একক নেতৃত্ব আন বিৰোধী দলসমুহে মানি নলয় ৷ অন্যান্য দলসমূহৰ দৰেই কংগ্ৰেছেও বিৰোধী ঐক্যজোটত অংশ গ্ৰহণ কৰিব লাগিব ৷ শুকুৰবাৰে ছোনিয়া গান্ধীয়ে আহ্বান জনোৱা ১৯ বিৰোধী দলৰ বৈঠকৰ পাছত বহু নেতাৰ মুখত এনে সুৰেই শুনা গ’ল ৷ বৈঠকত অংশগ্ৰহণ কৰা বহুকেইগৰাকী নেতাই এইটোৱে বিচাৰিলে যে বিৰোধী জোটৰ প্ৰক্ৰিয়াত কোনো দল বা কোনো ব্যক্তিবিশেষৰ প্ৰাধান্য থকা উচিত নহয় ৷ সকলোৰে সন্মিলিত নেতৃত্বত এই জোট তৈয়াৰ হোৱা উচিত ৷
সংসদৰ শেহতীয়া অধিৱেশনত বিৰোধীয়ে ৰূপায়ণ কৰা কাৰ্যসূচীসমূহত কংগ্ৰেছ বা ৰাহুল গান্ধীৰ নেতৃত্ব প্ৰায় স্পষ্ট হৈ উঠিছিল ৷ কিন্তু ৰাহুল গান্ধীৰ নেতৃত্বত দিল্লীত ৰূপায়ণ হোৱা একাধিক কাৰ্যসূচীত উপস্থিত নাছিল তৃণমূল কংগ্ৰেছ ৷এই লৈ দেশৰ ৰাজনীতিত ব্যাপক চৰ্চাও আৰম্ভ হৈছিল ৷
শুকুৰবাৰে ছোনিয়া গান্ধীৰ আহ্বানত অনুষ্ঠিত বিৰোধীৰ বৈঠকত মমতা বেনাৰ্জীয়ে প্ৰস্তাৱ দিলে- বিৰোধী জোটৰ কাৰ্যপন্থা ঠিক কৰিবলৈ এখন কোৰ কমিটী গঠন কৰা হওক ৷ তেতিয়া কোন বিষয়ত বিৰোধীয়ে সন্মিলিতভাৱে কি কি পদক্ষেপ ল’ব পাৰে , সেই বিষয়ত কোৰ কমিটীয়ে নিৰ্দেশনা দিব পাৰিব ৷ মমতাৰ এই প্ৰস্তাৱত সহাৰি জনায় ঝাৰখণ্ডৰ মুখ্যমন্ত্ৰী হেমন্ত ছোৰেনসহ অন্যান্য বিৰোধী নেতাসকলেও ৷
মমতা বেনাৰ্জীয়ে কয়-‘পাহৰি যাওক কোন নেতা ৷ আমাৰ কোনো নেতা নাই ৷ ব্যক্তিগত হিচাপ আঁতৰাই ৰাখক ৷ আচল লক্ষ্য হ’ল বিজেপিৰ বিৰুদ্ধে জনগনৰ স্বাৰ্থৰক্ষাৰ যুদ্ধ ৷ তাতে সকলোৱে একেলগে খোজ দিব লাগিব ৷ ইগো ধৰি থাকিলে নচলিব ৷’
শুকুৰবাৰৰ ভাৰ্ছুয়েল বৈঠক অনুষ্ঠিত হৈছিল বিয়লি ৪ বজাৰ পৰা ৷ ছোনিয়া গান্ধীয়ে প্ৰথম বক্তৃতা দিয়াৰ পাছত ক্ৰমে শাৰদ পাৱাৰ আৰু মমতা বেনাৰ্জীয়ে নিজৰ মন্তব্য দাঙি ধৰে ৷ বিজেপি বিৰোধী যুদ্ধত কোনো বিৰোধী দলকে বাহিৰত ৰখা উচিত নহয় বুলি তেওলোকে মতামত প্ৰকাশ কৰে ৷ লগতে কোৰ কমিটী গঠন কৰি মাহেকত কমেও এবাৰ বৈঠক অনুষ্ঠিত কৰাৰ পৰামৰ্শ দিয়ে ৷
এই বৈঠকৰ পৰা এটা কথা স্পষ্ট হৈছে যে বিৰোধী জোট তৈয়াৰ হ’লেও কংগ্ৰেছে এইবাৰ বিগব্ৰাডাৰৰ আসন লাভ নকৰিব ৷