কিয় বিৰোধী মুখ্যমন্ত্ৰীৰে বৈঠকৰ আহ্বান জনাইছে ছোনিয়া গান্ধীয়ে ?

কংগ্ৰেছ আৰু সহযোগী দলৰ মুখ্যমন্ত্ৰীসকলৰ সৈতে শুকুৰবাৰে এক বৈঠকত মিলিত হ’ব কংগ্ৰেছ সভানেত্ৰী ছোনিয়া গান্ধী ৷ বিয়লি ৪ বজাত ভাৰ্ছুয়েল মাধ্যমত অনুষ্ঠিত হ’ব এই বৈঠকখন ৷ বিৰোধী শাসিত ৰাজ্যসমূহক বিভিন্ন ধৰণে বঞ্চিত কৰিছে নৰেন্দ্ৰ মোদীৰ চৰকাৰে ৷ এই ইছ্যুক লৈ কংগ্ৰেছ নেত্ৰীগৰাকীয়ে সৰৱ হোৱাৰ প্ৰস্তুতি চলাইছে ৷ এই লৈয়ে কংগ্ৰেছ আৰু সহযোগী দলৰ মুখ্যমন্ত্ৰীৰে আলোচনাত মিলিত হ’ব ছোনিয়া গান্ধী ৷

ৰাজ্যত কংগ্ৰেছৰ বিৰোধী হোৱা  স্বত্বেও বৈঠকলৈ আমন্ত্ৰণ জনোৱা হৈছে পশ্চিমবংগৰ মুখ্যমন্ত্ৰী মমতা বেনাৰ্জীক ৷ মমতা বেনাৰ্জীয়ে শেহতীয়া দিল্লী ভ্ৰমণত ছোনিয়া গান্ধীকো সাক্ষাৎ কৰিছিল ৷ তাৰ পাছৰে পৰা দেশৰ বিৰোধী ৰাজনীতিত আৰম্ভ হৈছিল নতুন ৰসায়ন ৷ কংগ্ৰেছ সভানেত্ৰীয়ে আহ্বান জনোৱা বৈঠকত পশ্চিমবংগৰ মুখ্যমন্ত্ৰীগৰাকী উপস্থিত থাকিব ৷