টকিঅ’ পেৰালিম্পিক ২০২০ত ভাৰতৰ হৈ পঞ্চমটো স্বৰ্ণ কৰিলে দুৰ্দান্ত বেডমিণ্টন ষ্টাৰ কৃষ্ণা নাগাৰে। বেডমিণ্টন ছিংগলছৰ (এছএইচ-৬) তীব্ৰ প্ৰতিদ্বন্দিতা মূলক মেচত হংকঙৰ চু মান কাইক পৰাস্ত কৰি স্বৰ্ণ পদক আঁজুৰি আনিলে নাগাৰে। ৪৩ মিনিটৰ খেলত নাগাৰে কাইক ২১-১৭, ১৬-২১ আৰু ২১-১৭ ত পৰাস্ত কৰে।
টকিঅ’ পেৰালিম্পিক ২০২০ত বেডমিণ্টনত এইটো ভাৰতৰ দ্বিতীয় স্বৰ্ণ। প্ৰমোদ ভগতে ইয়াৰ পূৰ্বে বেডমিণ্টন ছিংগলছ(এছএল-৩)ত সোণৰ পদক লাভ কৰিছিল।
উল্লেখযোগ্য যে নাগাৰে প্ৰথম খন খেলত কেইবাটাও ভুল কৰিছিল। যাৰ ফলত হংকঙৰ খেলুৱৈ গৰাকীয়ে ১৬-১১ ত অগ্ৰগতি লাভ কৰিছিল। কিন্তু নাগাৰে ঐতিহাসিক প্ৰত্যাৱৰ্তনেৰে স্ক’ৰ ১৫-১৬ লৈ উভতাই আনিছিল। নাগাৰে খেলখনত আন এটা পইণ্ট হেৰুৱাইছিল আৰু ১৫-১৭ ত পিছ পৰি আছিল। তাৰ পিছত এক আশ্চৰ্যজনক প্ৰত্যাৱৰ্তনেৰে প্ৰতিদ্বন্দীক ধৰাশায়ী কৰি প্ৰথমখন খেলত ২১-১৭ ত জয় লাভ কৰিছিল কৃষ্ণা নাগাৰে।