আমেৰিকাৰ ভয়ত নতুন চৰকাৰৰ শপত গ্ৰহণ অনুষ্ঠান বাতিল কৰিলে নেকি তালিবানে?

পাশ্চাত্য দেশৰ হেঁচাত সেও মানি আফগানিস্তানৰ নতুন অন্তর্ৱর্তীকালীন চৰকাৰৰ শপতগ্রহণ কার্যসূচী বাতিল কৰিলে তালিবানে৷ নিষিদ্ধ সংগঠন তালিবানে আফগানিস্তান দখল কৰা এপষেক পিছত অন্তর্ৱর্তীকালীন চৰকাৰ ঘোষণা কৰি ১১ ছেপ্টেম্বৰৰ দিনা চৰকাৰৰ শপতগ্রহণ কৰাৰ সিদ্ধান্ত গ্রহণ কৰিছিল৷ ২০০১ চনৰ ১১ ছেপ্টেম্বৰত আমেৰিকা যুক্তৰাষ্ট্রত জেহাদী সংগঠন আল–কায়দাই ভয়াৱহ আক্রমণেৰে ধ্বংসলীলা চলোৱাৰ দিনাই তালিবান চৰকাৰৰ শপতগ্রহণ কার্যসূচী অনুষ্ঠিত কৰাৰ ক্ষেত্রত পাশ্চাত্য দেশসমূহে তালিবানৰ সমর্থনকাৰী দেশসমূহৰ ওপৰত হেঁচা প্রয়োগ কৰে৷ আমেৰিকা যুক্তৰাষ্ট্র আৰু নাটোৰ দেশসমূহৰ হেঁচাত সেও মানি যোৱাকালি নির্ধাৰিত শপতগ্রহণ অনুষ্ঠান বাতিল কৰে তালিবানে৷ উল্লেখ্য যে শপতগ্রহণ কার্যসূচীত তালিবানে ৰাছিয়া, ইৰান, চীন, কাটাৰ আৰু পাকিস্তানক আমন্ত্ৰণ জনাইছিল৷ অৱশ্যে ৰাছিয়াই পূৰ্বেই এই কার্যসূচীত অংশগ্রহণ নকৰোঁ বুলি স্পষ্ট কৰি দিছিল৷ মন কৰিবলগীয়া যে কাটাৰত আমেৰিকা যুক্তৰাষ্ট্র আৰু তালিবান নেতৃত্বৰ মাজত অনুষ্ঠিত হোৱা শান্তি আলোচনাৰ পিছতেই চুক্তি অনুসৰি তালিবানে আফগানিস্তান দখল কৰিবলৈ সক্ষম হয়৷ কাটাৰৰ সহযোগত তালিবানে বিশ্ব সমুদায়ৰ সমর্থন লাভ কৰিবলৈ চেষ্টা চলাই আছে যদিও কাটাৰে প্রত্যক্ষভাৱে এইক্ষেত্রত সহযোগ কৰা নাই৷ উল্লেখযোগ্য যে আমেৰিকা যুক্তৰাষ্ট্রই কাটাৰক তালিবানৰ শপতগ্রহণ অনুষ্ঠান ১১ ছেপ্তেম্বৰৰ দিনটোত অনুষ্ঠিত নকৰিবলৈ হেঁচা প্রয়োগ কৰিছিল৷