কণমানি ল’ৰাজনৰ নাম ময়ূখ উৎপল শৰ্মা ৷ বয়স ২ বছৰ ৯ মাহ ৷ ব্ৰেইন টিউমাৰ ৰোগত আক্ৰান্ত হৈ এক্সেল কেয়াৰ হাস্পতালত চিকিৎসাধীন হৈ আছে ৷ চিকিৎসাৰ বাবে বহু ধনৰ প্ৰয়োজন ৷ সহায় বিচাৰি যোৱা ৩০ মে’ত জুবিন গাৰ্গে ফেচবুকযোগে ৰাজহুৱা আহ্বান জনাইছে ৷
তাৰ দুদিন পাছত জুবিন গাৰ্গৰ আন এটা ফেচবুক পোষ্ট ৷ ডিব্ৰুগড় বিশ্ববিদ্যালয়ৰ বি ফাৰ্মৰ দ্বিতীয় ষান্মাসিকৰ ছাত্ৰ ৷ যকৃতৰ গুৰুতৰ ৰোগত আক্ৰান্ত ৷ গুৱাহাটীৰ নেমকেয়াৰ হাস্পতালত চিকিৎসাধীন ৷ পৰিয়ালে বহন কৰিব পৰা নাই চিকিৎসা ব্যয় ৷ আকৌ ৰাইজৰ সহায় বিচাৰি ফেচবুকযোগে আহ্বান জনাইছে জনপ্ৰিয় শিল্পী গৰাকীয়ে ৷
দুটা মাত্ৰ পৰিয়ালৰ দুৰ্দশাৰ কাহিনী এয়া ৷ আপুনি চাগে নিতৌ এনে বহু পৰিয়ালৰ কাতৰ আহ্বান শুনিবলৈ পায় , পঢ়িবলৈ পায় ৷ ফেচবুকৰ টাইমলাইনত ভাঁহি আহে ৰোগাক্ৰান্ত কোনো শিশুৰ ম্লান পৰি যোৱা মুখায়ব ৷ শীৰ্ণকায় মৰণকাতৰ মানুহৰ ফটো বাতৰিকাতত দেখি কঁপি উঠে আপুনি ৷ এখন্তেক অন্যমনষ্ক হৈ পৰে ৷ ভাবিবলৈ লয় – এই দেশত সাধাৰণ মানুহৰ জীয়াই থকাৰ অধিকাৰ ক্ৰমাৎ নোহোৱা হৈ আহিছে নেকি ? চিকিৎসাৰ জড়িয়তে আৰোগ্য হোৱাৰ অধিকাৰ সাধাৰণ জনগণৰ নাই নেকি ? আপুনি এক মুহূৰ্তৰ বাবে শংকিত হৈ উঠে – আপোনাৰ নিজৰ পৰিয়াল যদি এনে অভাবনীয় দুৰ্যোগৰ মুখামুখি হ’বলগীয়া হয় , কি হ’ব আপোনাৰ সৰু আটোমটোকাৰি পৰিয়ালটোৰ ভৱিষ্যত ৷ কেৱল আপুনি নহয় , প্ৰতিগৰাকী দুখীয়া – মধ্যবিত্ত নাগৰিকৰ বাবে দু:স্বপ্ন হৈ পৰিছে ৰোগ আৰু চিকিৎসাৰ বিষয়টো ৷ পেট্ৰ’ল – ডিজেলতকৈও দ্ৰুতগতিত উৰ্ধগামী হৈছে চিকিৎসালয়ৰ খৰচ ৷ চৰকাৰে চিকিৎসাৰ সুবিধা দিয়াৰ পৰা হাত এৰাই চলিছে ৷ তাৰ সলনি বীমাৰ পলিচী বিকিবলৈহে আগ্ৰহী ৷ কিন্তু বীমাই জানো সঠিক চিকিৎসা সুনিশ্চিত কৰিব পাৰে ৷ ভাৰতত চৰকাৰী চিকিৎসা আৰু স্বাস্থ্যবীমাৰ দুৰাৱস্থা সন্দৰ্ভত বহু উদ্বেগজনক তথ্য পোহৰলৈ আহিছে ৷
বিশ্ববেংকৰ তথ্য অনুসৰি যিসমূহ দেশে স্বাস্থ্যখণ্ডত আটাইতকৈ কম ব্যয় কৰে তাৰ ভিতৰত অন্যতম হ’ল ভাৰত ৷ দেশৰ মুঠ ঘৰুৱা উৎপাদনৰ মাত্ৰ ৩.৫৪ শতাংশহে স্বাস্থ্যখণ্ডত ব্যয় কৰা হয় ৷ইয়াৰ ভিতৰত চৰকাৰী খৰচ জিডিপিৰ মাত্ৰ ১.২৮ শতাংশ ৷ ইয়াৰ পৰা দেখদেখকৈ ওলাই পৰে যে ভাৰতৰ স্বাস্থ্যখণ্ড ব্যাপকভাৱে ব্যক্তিগত খণ্ডৰ দখলত আছে ৷ নাগৰিকসকলে নিজৰ চিকিৎসাৰ ৬২ শতাংশ ধনেই নিজৰ জেপৰ পৰা ব্যয় কৰিব লাগে ৷ এয়া বিশ্বৰ ভিতৰত অন্যতম সৰ্বাধিক ব্যয় ৷ এনে পৰিস্থিতিত এক সহজ স্বাস্থ্যবীমাই সকলোৰে চিকিৎসাৰ ক্ষেত্ৰত ভালেখিনি সহায় আগবঢ়াব পাৰে৷ এই উদ্দেশ্যেৰেই ২০০০ চনত বীমাৰ বজাৰ ব্যক্তিগত খণ্ডৰ বাবেও মুকলি কৰি দিয়া হৈছিল ৷ স্বাস্থ্যবীমাৰ এখন বৃহৎ বজাৰ মুকলি কৰাটো আছিল চৰকাৰৰ অন্যতম লক্ষ্য ৷ কিন্তু বিগত দুটা দশকত স্বাস্থ্যবীমাৰ ৰিপোৰ্ট কাৰ্ড অত্যন্ত দুখলগা অৱস্থাত উপনীত হৈছে ৷ ২০০০ চনৰ পৰা ২০২০ চনলৈ বিশ্বৰ দ্বিতীয় বৃহত্তম দেশ ভাৰতৰ মাত্ৰ ১৩ কৌটি ৭০ লাখ লোককহে স্বাস্থ্যবীমাই সামৰি লৈছে ৷ বীমা পলিচীৰ জটিল নিয়ম , কম কভাৰেজৰ বাবেই ভাৰতৰ নাগৰিকসকলে বীমাৰ প্ৰতি উদাসীনতা দেখুৱাইছে ৷ তেওলোকে বীমাৰ সুবিধাৰে ভাল চিকিৎসা কৰাৰ সলনি কম ব্যয় হোৱা চিকিৎসালয়তহে ভৰ্তি হ’বলৈ অধিক আগ্ৰহ দেখুওৱা পৰিলক্ষিত হৈছে ৷ বিগত বছৰসমূহত স্বাস্থ্যবীমাৰ দ্বাৰা উপকৃত হোৱা লোকৰ সংখ্যাও আঙুলিৰ মূৰত লেখিব পৰা ৷ সেইবাবেই বীমা কোম্পেনী সমূহৰ ওপৰত অভিযোগো বছৰি বৃদ্ধি পাবলৈ ধৰিছে ৷
২০১৬ – ১৭ত স্বাস্থ্যবীমা সম্পৰ্কীয় মুঠ ২৬,৯৩৭ টা অভিযোগ দাখিল হৈছে ৷ ইয়াৰ ভিতৰত ৫৩.৮৩ শতাংশ বীমাৰ ক্লেইম আৰু ২২.৪৩ শতাংশ বীমা পলিচী সম্পৰ্কীয় ৷ ২০১৭ – ১৮ত স্বাস্থ্যবীমা সম্পৰ্কে দাখিল হোৱা ২৫, ৫১৬ টা অভিযোগৰ ৫৮.৬৭ শতাংশ ক্লেইম আৰু ১৮.০৬ শতাংশ পলিচী সম্পৰ্কীয় ৷ একেদৰে স্বাস্থ্যবীমাৰ বিৰুদ্ধে ২০১৮- ১৯ বৰ্ষত দাখিল হৈছে ২৫ , ৩৬৯ টা অভিযোগ ৷ ইয়াৰে ৬৪.১৫ শতাংশ ক্লেইম আৰু ১৩.৯৫ শতাংশ পলিচী সম্পৰ্কীয় ৷ ২০১৯- ২০ ত অভিযোগৰ সংখ্যা বাঢ়ি হৈছেগৈ ৩০,৮২৫ টা হৈছেগৈ ৷ ৭০.৫৫ শতাংশ অভিযোগেই হ’ল ক্লেইম সম্পৰ্কীয় ৷ অৰ্থাৎ বীমাৰ প্ৰিমিয়াম আদায় দিও বীমাকাৰীয়ে নিজৰ প্ৰয়োজনৰ সময়ত উচিত ক্ষতিপূৰণ পোৱা নাই ৷ সেয়ে স্বাস্থ্যবীমা সম্পৰ্কীয় ওজৰ আপত্তি দিনে দিনে বৃদ্ধি পাইছে আৰু বীমাৰ ওপৰত মানুহৰ আস্থাও কমি আহিছে ৷ ইয়াৰ কাৰণ বাখ্যা কৰি দ্য ইনচুৰেন্স অম্বাদছমেনে কৈছে যে বীমা পলিচীৰ ভুল বিক্ৰী , অসাৱধানভাৱে ফৰ্ম পূৰোৱা আৰু চৰ্তাৱলী সঠিকভাৱে অৱগত নকৰোৱাটোৱে ইয়াৰ মূল কাৰণ ৷ তদুপৰি বীমাকাৰীৰ স্বাস্থ্য সম্পৰ্কীয় তথ্যক আওকান কৰাটোও পৰৱৰ্তী সময়ত জটিলতাৰ কাৰণ হৈ পৰিছে ৷ সি যি কি নহওক , স্বাস্থ্যবীমা আৰম্ভ হোৱাৰ দুই দশক পাছতো ভাৰতত স্বাস্থ্যবীমা অতি চালুকীয়া অৱস্থাতে আছে ৷ যিখন দেশত চিকিৎসাৰ ৬২ শতাংশ ধনেই ৰোগীয়ে নিজৰ জেপৰ পৰা ব্যয় কৰিব লাগে , সেই দেশখনত সহজ – সাৱলীল এক স্বাস্থ্যবীমা বহুতৰে বাবে সকাহৰ কাৰণ হ’ব পাৰে ৷ কিন্তু আমাৰ দেশত চৰকাৰী স্বাস্থ্যখণ্ডৰ পুতৌজনক অৱস্থাৰ সমান্তৰালভাৱে স্বাস্থ্যবীমাৰ দুৰাৱস্থাৰ বাবেও চিকিৎসা এতিয়া সৰ্বসাধাৰণৰ বাবে দু:সাধ্য হৈ পৰিছে ৷ যাৰ বাবে প্ৰতিদিনে আমি অসহায়ভাৱে শুনি থাকিবলগীয়া হৈছে মৃত্যমুখী মানুহৰ যন্ত্ৰণাকাতৰ চিৎকাৰ ৷