উদ্বেগজনক হৈ পৰিছে উত্তৰ- পূৱৰ কোভিড পৰিস্থিতি ৷ ক’ৰোণাৰ ডেল্টা ভেৰিয়েন্টৰ সংক্ৰমণৰ বাবে উত্তৰ পূৱত কোভিড আক্ৰান্তৰ সংখ্যা দ্ৰুতগতিত বৃদ্ধি পাবলৈ ধৰিছে ৷ পৰিস্থিতিৰ ইমানেই অৱনতি ঘটিছে যে মণিপুৰত ১০ দিনীয়া সম্পূৰ্ণ লকডাউন ঘোষণা কৰা হৈছে ৷ ত্ৰিপুৰাত জাৰি কৰা হৈছে এসপ্তাহৰ বাবে সান্ধ্য আইন ৷ ৰাজ্যখনৰ ৰাজধানী আগৰতলাত দিনৰ ভাগতো সান্ধ্য আইন জাৰি কৰা হৈছে ৷ মিজোৰামত অহা ২৪ জুলাইৰ পৰা লকডাউন ঘোষণাৰ পূৰ্ণ সম্ভাৱনা আছে ৷ অসম আৰু ছিকিমতো কঠোৰ কৰি তোলা হৈছে কোভিড সম্পৰ্কীয় বাধা নিষেধ ৷ ছিকিমৰ সকলো ৰাজহুৱা স্থানত ৩০ দিনলৈ জনসমাগম নিষিদ্ধ কৰা হৈছে ৷ এনেদৰেই সমগ্ৰ উত্তৰ – পূৱ এতিয়া যেন অঘোষিত লকডাউনৰ দিশে আগবাঢ়িছে ৷