মুখ্যমন্ত্ৰী হিমন্ত বিশ্ব শৰ্মাৰ পত্নী ৰিণিকি ভূঞা শৰ্মা, মুখ্যমন্ত্ৰীৰ পৰিয়ালৰ ব্যৱসায়িক সহযোগী ঘনশ্যাম ধানুকাই নহয় , কোভিডকালত ঠিকা লাভ কৰা বিশেষ ব্যক্তিসকলৰ তালিকাত আছে মুখ্যমন্ত্ৰীৰ পৰিয়ালৰ আৰু এজন পুৰণি ব্যৱসায়িক অংশীদাৰ ৷ তাতেই তেওঁৰ পৰিচয় শেষ নহয় ৷ প্ৰাক্তন মুখ্যমন্ত্ৰী সৰ্বানন্দ সোণোৱালৰ আমোলত পোহৰলৈ অহা ৩৩ কৌটি টকীয়া জনসংযোগ কেলেংকাৰিৰো অন্যতম অভিযুক্ত তেওঁ ৷ নাম- ৰাজীৱ কুমাৰ বৰা ৷ মুখ্যমন্ত্ৰীৰ পৰিয়ালৰ এইগৰাকী প্ৰাক্তন ব্যৱসায়িক সহযোগীকো কোভিডকালত অত্যাধিক দৰত পি পি ই কীট যোগানৰ ঠিকা দিয়াৰ তথ্য দ্য ক্ৰছকাৰেন্ট আৰু দ্য ৱায়াৰৰ অনুসন্ধানত পোহৰলৈ আহিছে ৷ একেটা দিনত আন প্ৰতিষ্ঠানতকৈ ৪০৮ টকা বেছি দৰত পি পি ই কীট যোগানৰ ঠিকা লাভ কৰিছিল জনসংযোগ কেলেংকাৰিত অভিযুক্ত ৰাজীৱ কুমাৰ বৰাৰ প্ৰতিষ্ঠানে ৷ কোভিডকালত দ্বিতীয় সৰ্বাধিক দৰত পি পি ই কীট যোগানৰ ঠিকা লাভ কৰা ব্যক্তিগৰাকীয়েই হ’ল ৰাজীৱ কুমাৰ বৰা ৷ গুৰুত্বপূৰ্ণ কথাটো হ’ল – মুখ্যমন্ত্ৰীৰ পত্নী , ঘনশ্যাম ধানুকা আৰু ৰাজীৱ কুমাৰ বৰাৰ কোম্পেনীত কলকাতাৰ একে স্থানৰ পৰা ধন বিনিয়োগ হোৱাৰ তথ্যও আমাৰ অনুসন্ধানত পোহৰলৈ আহিছে ৷
দ্বিতীয় সৰ্বাধিক দৰত পি পি ই কীটৰ ঠিকা মুখ্যমন্ত্ৰীৰ পৰিয়ালৰ পুৰণি ব্যৱসায়িক সহযোগীক
দ্য ক্ৰছকাৰেন্ট আৰু দ্য ৱায়াৰৰ হাতত থকা তথ্য অনুসৰি, এজাইল এছোছিয়েট নামৰ এটা প্ৰতিষ্ঠানক ১০ এপ্ৰিল , ২০২০ত NHM-18012/3/2020/PROC-NHM/ECF/137250/SPO-12670 নং আৰজেন্ট চাপ্লাই অৰ্ডাৰ যোগে ১০ হাজাৰ পি পি ই কীট ২২০০ টকা দামত যোগানৰ নিৰ্দেশ দিয়া হয় ৷ প্ৰতিষ্ঠানটোৰ স্বত্বাধিকাৰী হ’ল ৰাজীৱ কুমাৰ বৰা।
ইফালে ,১০ এপ্ৰিল ২০২০ত এজাইল এছোছিয়েটছে ২২০০ টকা দৰত পি পি ই কীটৰ ঠিকা লাভ কৰাৰ উপৰিও অন্য দুটা প্ৰতিষ্ঠানক পি পি ই কীট যোগানৰ ঠিকা দিয়া হৈছিল ৷ ইয়াৰে দাৰ্জিলিং গাৰ্ডেনছ প্ৰাইভেট লিমিটেডক ১,৭৯২ টকা দৰত ২০ হাজাৰ পি পি ই কীট যোগানৰ ঠিকা দিয়া হৈছিল ৷ অৰ্থাৎ একেটা দিনতে ৰাজীৱ বৰাই আন প্ৰতিষ্ঠানতকৈ ৪০৮ টকাকৈ বেছি দৰত পি পি ই কীট যোগানৰ ঠিকা লাভ কৰিছিল ৷ ৰাজীৱ বৰাৰ এজাইল এছোচিয়েট হ’ল দ্বিতীয় সৰ্বাধিক দৰত পিপি ই কীট যোগান ধৰা প্ৰতিষ্ঠান ৷
ৰিণিকি ভূঞা শৰ্মা-ৰাজীৱ বৰাৰ পৰিয়ালৰ ব্যৱসায়িক সম্পৰ্ক
জি এছ টি পোৰ্টেলৰ তথ্য অনুসৰি, এজাইল এছোচিয়েটছৰ স্বত্বাধিকাৰী হ’ল ৰাজীৱ কুমাৰ বৰা ৷ ঠিকনা -বৰা ভৱন , প্ৰথম মহলা, টি আৰ ফুকন পথ, ভৰলুমুখ , গুৱাহাটী-৭৮১০০৯৷
একেটা ঠিকনাৰ পৰাই এসময়ত পৰিচালনা হৈছিল ৰিণিকি ভূঞা শৰ্মা সঞ্চালক হিচাপে থকা আন এটা কোম্পেনী ৷ কোম্পেনীটো গঠন হৈছিল ২০০৮ চনৰ ২৯ ছেপ্তেম্বৰত ৷ নাম আছিল – ডিজিটেক মেডিয়া এণ্ড এন্টাৰটেইনমেন্টছ প্ৰাইভেট লিমিটেড ৷ কোম্পেনীটোৰ প্ৰতিষ্ঠাপক সঞ্চালক অছিল ৰিণিকি ভূঞা শৰ্মা আৰু অঞ্জনা বৰা ৷ অঞ্জনা বৰা হ’ল ৰাজীৱ কুমাৰ বৰাৰ পত্নী ৷ ৰিণিকি ভূঞা শৰ্মা আৰু অঞ্জনা বৰাই প্ৰতিষ্ঠা কৰা ডিজিটেক মেডিয়া এণ্ড এন্টাৰটেইনমেন্টছ প্ৰাইভেট লিমিটেডৰো ঠিকনা আছিল- বৰা ভৱন , প্ৰথম মহলা , টি আৰ ফুকন পথ , ভৰলুমুখ , গুৱাহাটী-৭৮১০০৯ ৷ ভাৰত চৰকাৰৰ জি এছ টি পোৰ্টেলৰ তথ্য অনুসৰি , ৰাজীৱ কুমাৰ বৰাৰ নামত থকা এজাইল এছোছিয়েটছৰ ঠিকনাও এইটোৱেই ৷
জনসংযোগ কেলেংকাৰিত অভিযুক্ত ৰাজীৱ বৰা
প্ৰয়াত মুখ্যমন্ত্ৰী তৰুণ গগৈৰ শাসনকালত জনসংযোগ বিভাগত সংঘটিত ৩৩ কৌটি টকীয়া জনসংযোগ কেলেংকাৰিৰ অন্যতম অভিযুক্ত আছিল ৰাজীৱ বৰা আৰু তেওৰ পত্নী অঞ্জনা বৰা ৷ ভিজন আছাম , মিছন আছাম প্ৰকল্প ৰূপায়নৰ নামত সংঘটিত এই কেলেংকাৰিৰ তদন্ত আৰম্ভ কৰিছিল প্ৰাক্তন মুখ্যমন্ত্ৰী সৰ্বানন্দ সোণোৱালে ৷ ২০১৬ চনত প্ৰয়াত মুখ্যমন্ত্ৰী তৰুণ গগৈ চৰকাৰৰ কাম কাজৰ প্ৰচাৰৰ বাবে গ্ৰহণ কৰা ‘ভিজন আছাম , মিছন আছাম’ প্ৰকল্পৰ ৰূপায়নত এই কেলেংকাৰি সংঘটিত হৈছিল ৷ ২০১৭ চনত মুখ্যমন্ত্ৰীৰ বিশেষ তদাৰকী কোষে জনসংযোগ কেলেংকাৰিৰ তদন্ত কৰি বিভাগটোৰ সঞ্চালকৰ লগতে কেবাজনো অভিযুক্তক গ্ৰেপ্তাৰ কৰিছিল ৷ চমন লাভ কৰিছিল ব্ৰক্ষ্মপুত্ৰ টেলিভিছন নেটৱৰ্কৰ স্বত্বাধিকাৰী ৰাজীৱ বৰা আৰু অঞ্জনা বৰাইও ৷ কিন্তু দীৰ্ঘদিন পলাতক হৈ থাকি তেওলোকে ২০১৭ চনৰ নৱেম্বৰ মাহত উচ্চতম ন্যায়ালয়ৰ পৰা অগ্ৰিম জামিন জামিন লাভ কৰিবলৈ সক্ষম হয় ৷ ২০২০ ৰ ছেপ্তেম্বৰ মাহত তদন্তকাৰী সংস্থাই দাখিল কৰা অতিৰিক্ত অভিযোগনামাত ৰাজীৱ বৰা আৰু অঞ্জনা বৰাৰ নাম অভিযুক্ত হিচাপে উল্লেখ কৰে ৷ বৰ্তমান তেওলোক উচ্চতম ন্যায়ালয়ৰ জামিনত আছে ৷ এটা বৃহৎ কেলেংকাৰিত অভিযুক্ত ৰাজীৱ বৰাক ২২০০ টকা দৰত পি পি ই কীট যোগানৰ ঠিকা দিছিল এন এইচ এম অসমে ৷
মুখ্যমন্ত্ৰীৰ পত্নী-ধানুকা-ৰাজীৱ বৰাৰ কোম্পেনীত কলকাতাৰ পৰা ৬.১১ কৌটি বিনিয়োগ
ভূমি কেলেংকাৰিত জড়িত ৰিণিকি ভূঞা শৰ্মাই প্ৰতিষ্ঠা কৰা কোম্পেনী আৰ বি এছ ৰিয়েল্টৰ্ছ , ৰিণিকি ভূঞা শৰ্মা আৰু কৈলাশ নাথ শৰ্মা সঞ্চালক হিচাপে থকা পদমাৱতী ট্ৰেডাৰ্ছ আৰু ৰিণিকি ভূঞা শৰ্মা , অঞ্জনা বৰা সঞ্চালক হিচাপে থকা ডিজিটেক মেডিয়াৰ মাজত আছে এটা অতি গুৰুত্বপূৰ্ণ সম্পৰ্ক ৷ সম্পৰ্কটো হ’ল এই আটাইকেইটা কোম্পেনীত কলকাতাৰ নিৰ্দিষ্ট স্থানৰ পৰা ধন বিনিয়োগ হৈছিল ৷
আৰ বি এছ ৰিয়েল্টৰ্ছত কলকাতাৰ ১৭ টা কোম্পেনীয়ে বিনিয়োগ কৰিছিল ২ কৌটি ১৭ লাখ ৪৫ হাজাৰ টকা ৷ এই বিনিয়োগ সম্পূৰ্ণ হোৱাৰ পাছতেই সঞ্চালকৰ পদ ত্যাগ কৰিছিল ৰিণিকি ভূঞা শৰ্মাই ৷ তেওঁৰ পদত্যাগৰ পাছতেই সঞ্চালক হিচাপে নিযুক্ত হয় ঘনশ্যাম ধানুকাৰ পিতৃ অশোক কুমাৰ ধানুকা ৷ এই কোম্পেনীটোত ব্যক্তিগত সৰ্বাধিক শ্বেয়াৰ আছে মুখ্যমন্ত্ৰীৰ পুত্ৰ নন্দিল বিশ্ব শৰ্মাৰ ৷
একেই ঘটনা ঘটিছিল পদমাৱতী ট্ৰেডাৰ্ছৰ ক্ষেত্ৰতো ৷ ১৯৯১ চনত প্ৰতিষ্ঠা হোৱা পদমাৱতী ট্ৰেডাৰ্ছ (ইণ্ডিয়া) প্ৰাইভেট লিমিটেডৰ পঞ্জীয়নভুক্ত ঠিকনা হ’ল মণিপুৰৰ পাওনা বজাৰ ৷ ২০০৫ চনত এই কোম্পেনীটোত সঞ্চালকৰ দায়িত্ব লৈছিল ৰিণিকি ভূঞা শৰ্মা আৰু কৈলাশ নাথ শৰ্মাই ৷ পদমাৱতী ট্ৰেডাৰ্ছতো মুখ্যমন্ত্ৰীৰ পত্নী আৰু পিতৃ সঞ্চালক পদত নিযুক্ত হোৱাৰ পাছতেই কলকাতাৰ ১৪ টা কোম্পেনীয়ে ধন বিনিয়োগ কৰা আৰম্ভ কৰে ৷ কলকাতাৰ পৰা পদমাৱতীত ৩ কৌটি ৫০ লাখ টকা বিনিয়োগ হোৱাৰ তথ্য পোৱা গৈছে ৷ ধন বিনিয়োগৰ পাছতেই আৰ বি এছ ৰিয়েল্টৰ্ছ প্ৰাইভেট লিমিটেডৰ দৰেই পদমাৱতী ট্ৰেডাৰ্ছ প্ৰাইভেট লিমিটেডৰ সঞ্চালকৰ পদৰ পৰা ৰিণিকি ভূঞা শৰ্মা আৰু কৈলাশ নাথ শৰ্মাই পদত্যাগ কৰে ৷ তেওলোকৰ পদত্যাগৰ পাছতেই সঞ্চালক পদত নিযুক্ত হয় অশোক কুমাৰ ধানুকা আৰু তেওঁৰ পুত্ৰ ঘনশ্যাম দাস ধানুকা ৷
আনহাতে , ৰিণিকি ভূঞা শৰ্মা আৰু ৰাজীৱ কুমাৰ বৰাৰ পত্নী অঞ্জনা বৰাই ২০০৮ চনৰ ২৯ ছেপ্তেম্বৰত প্ৰতিষ্ঠা কৰিছিল ডিজিটেক মেডিয়া এণ্ড এন্টাৰটেইনমেন্টছ প্ৰাইভেট লিমিটেড ৷ এই কোম্পেনীটোৰ সঞ্চালক পদৰ পৰা ২০০৯ চনৰ ১৫ জানুৱাৰীত পদত্যাগ কৰিছিল ৰিণিকি ভূঞা শৰ্মাই ৷ তেওঁৰ স্থানত কোম্পেনীটোৰ সঞ্চালক হয় ৰাজীৱ কুমাৰ বৰা ৷ এই কোম্পেনীটোত কলকাতাৰ ৯ টা কোম্পেনীয়ে ৪৩ লাখ ৯০ হাজাৰ টকা বিনিয়োগ কৰে ৷
ৰিণিকি ভূঞা শৰ্মা জড়িত থকা এই তিনিটা কোম্পেনীত কলকাতাৰ কোম্পেনীয়ে ৬ কৌটি ১১ লাখ ৩৫ হাজাৰ টকা বিনিয়োগ কৰাৰ তথ্য দ্য ৱায়াৰ আৰু দ্য ক্ৰছকাৰেন্টৰ অনুসন্ধানত পোহৰলৈ আহিছে ৷
তাৎপৰ্যপূৰ্ণ কথাটো হ’ল –কলকাতাৰ ৬ টাকৈ কোম্পেনীয়ে আৰ বি এছ ৰিয়েল্টৰ্ছ আৰু পদমাৱতী ট্ৰেডাৰ্ছ উভয়তে ধন বিনিয়োগ কৰিছিল ৷ এই কোম্পেনীকেইটা হ’ল অলিয়েণ্ডাৰ মেনুফেকচাৰ্ছ এণ্ড ক্ৰেডিট প্ৰাইভেট লিমিটেড , ডিংগো কমোডিয়েল প্ৰাইভেট লিমিটেড , ইকোলেক বিনিময় প্ৰাইভেট লিমিটেড , এলিগেন্স ট্ৰেড এণ্ড হোল্ডিঙ প্ৰাইভেট লিমিটেড , ৰেডিয়েন্ট মাৰ্ছেণ্ডাইজ প্ৰাইভেট লিমিটেড আৰু শ্ল’ এণ্ড চাউণ্ড ইলেক্ট্ৰ’নিকছ প্ৰাইভেট লিমিটেড ৷
আৰ বি এছত বিনিয়োগ কৰা কলকাতাৰ ৩ টাকৈ কোম্পেনীয়ে ৰাজীৱ বৰা আৰু অঞ্জনা বৰাৰ কোম্পেনী ডিজেটেক মেডিয়াতো ধন বিনিয়োগ কৰিছিল ৷ এই কোম্পেনীকেইটা হ’ল – ইকোলাক বিনিময় প্ৰাইভেট লিমিটেড , য়ুলান মাৰ্কেটিঙ প্ৰাইভেট লিমিটেড আৰু শুভলক্ষ্মী ক’ল এণ্ড এক্সিম প্ৰাইভেট লিমিটেড ৷
কলকাতাৰ তিনিটাকৈ কোম্পেনীয়ে পদমাৱতী আৰু ডিজিটেক দুয়োটা কোম্পেনীতে ধন বিনিয়োগ কৰিছে ৷ এই কোম্পেনীকেইটা হ’ল – এম এছ ভি ফিচকেল প্ৰাইভেট লিমিটেড , ছিমপ্ৰ’ বাণিজ্য প্ৰাইভেট লিমিটেড , ইকোলাক বিনিময় প্ৰাইভেট লিমিটেড ৷
আৰ বি এছ , পদমাৱতী আৰু ডিজিটেকত সকলোতে ধন বিনিয়োগ কৰা কলকাতাৰ এটা উমৈহতীয়া কোম্পনী হ’ল- ইকোলাক বিনিময় প্ৰাইভেট লিমিটেড ৷ অৰ্থাৎ আটাইকেইটা কোম্পেনীত যে কলকাতাৰ নিৰ্দিষ্ট কেইটামান ঠিকনাৰ পৰা ধন বিনিয়োগ হৈছিল , সেয়া মিনিষ্ট্ৰী অৱ কৰ্পোৰেট এফেয়াৰ্ছৰ তথ্যই প্ৰমাণ কৰে৷
কলকাতাৰ কোম্পেনীৰ ঠিকনাত দ্য ৱায়াৰৰ অনুসন্ধান
আৰ বি এছ , পদমাৱতীত আৰু ডিজিটেক মেডিয়া – এই তিনিওটা কোম্পেনীত ধন বিনিয়োগ কৰা কলকাতাৰ এটা কোম্পেনী হ’ল – ইকোলাক বিনিময় প্ৰাইভেট লিমিটেড ৷ একেদৰে আৰ বি এছ ৰিয়েল্টৰ্ছ আৰু পদমাৱতী ট্ৰেডাৰ্ছত ধন বিনিয়োগ কৰা আন এটা কোম্পেনী হ’ল – এলিগেন্স ট্ৰেড এন্ড হোল্ডিঙ প্ৰাইভেট লিমিটেড৷দুয়োটা কোম্পেনীৰ কলকাতাৰ পঞ্জীয়নভুক্ত ঠিকনা পৰিদৰ্শন কৰে দ্য ৱায়াৰে ৷ কিন্তু পঞ্জীয়নভুক্ত ঠিকনাত দেখা পোৱা নগ’ল কোম্পেনীৰ নাম লিখা কোনো চাইনবোৰ্ড ৷ কোম্পেনীৰ কাৰ্যালয়সদৃশ কোনো পৰিৱেশ এই ঠিকনাকেইটাত দেখা পোৱা নগ’ল ৷ দুয়োটা কোম্পেনীয়ে কলকাতাৰ বৰাবাজাৰ অঞ্চলত নিজৰ ঠিকনা দেখুৱাইছে ৷ বৰাবাজাৰৰ দিগম্বৰ জৈন লেনৰ ইকোলেকৰ পঞ্জীয়নভুক্ত ঠিকনাই আকৌ অসমৰ এই তিনিটা কোম্পেনীত ধন বিনিয়োগ কৰা আন কেবাটাও কলকাতাৰ কোম্পেনীৰ ঠিকনা ৷ এলিগেন্সৰ হংসপুকুৰ লেনৰ পঞ্জীয়নভুক্ত ঠিকনা অসমৰ কোম্পেনী তিনিটাত ধন বিনিয়োগ কৰা আন কেবাটাও কোম্পেনীৰ ঠিকনা ৷দুয়োটা ঠিকনাই অতি ঠেক গলি আৰু জনাকীৰ্ণ অঞ্চলত অৱস্থিত ৷ দুয়োটা কাৰ্যালয়ত দ্য ৱায়াৰৰ প্ৰতিনিধি উপস্থিত হৈ দেখিবলৈ পায় যে দৰ্জা সম্পূৰ্ণ খোলা থকা দুটা লেতেৰা কোঠা ৷ তাত চলি আছে কাপোৰৰ ব্যৱসায় ৷ এক আচহুৱা পৰিৱেশ ৷ চৰকাৰী নথিত উল্লেখ থকা অনুসৰি বিল্ডিঙৰ প্ৰথম মহলাত আছে ইকোলাকৰ কাৰ্যালয় ৷ ইয়াৰে এটা ৰুমত এটা মন্দিৰো দেখিবলৈ পোৱা গ’ল ৷ ধাৰণা কৰিব পাৰি যে দুয়োটা কাৰ্যালয় যথেষ্ট নীৰিক্ষণৰ মাজত ৰখা হয় ৷ কাৰণ , দ্য ৱায়াৰৰ প্ৰতিনিধি উপস্থিত হোৱাৰ লগে লগে কাপোৰৰ ব্যৱসায়ৰ লগত জড়িত একাংশ লোকে ‘ইয়ালৈ কিয় আহিছে ‘ বুলি জেৰা কৰিবলৈ আৰম্ভ কৰে ৷ ৰূমৰ ভিতৰৰ ফটো সংগ্ৰহতো তেওঁলোকে বাধা প্ৰদান কৰে ৷
পি পি কীট ক্ৰয়ত দামৰ বৃহৎ তাৰতম্য
লকডাউন ঘোষণাৰ পূৰ্বে এন এইচ এমে ১৮ মাৰ্চৰ পৰা ২৩ মাৰ্চ, ২০২০ লৈকে ৬ টা প্ৰতিষ্ঠানৰ পৰা পি পি ই কীট ক্ৰয় কৰিছিল ৷ ইয়াৰে আটাইতকৈ কম দাম আছিল নৰ্থ ইষ্ট চাৰ্জিকেল ইণ্ডাষ্ট্ৰীজৰ ৷ প্ৰতিষ্ঠানটোৱে ৬০০ টকা দৰত পি পি ই কীট যোগান ধৰিছিল ৷ সৰ্বোচ্চ দাম আছিল – টি বি এছ টেলিমেটিক এন্ড বায়’মেডিকেল চাৰ্ভিছেছ প্ৰাইভেট লিমিটেডৰ ৷ প্ৰতিষ্ঠানটোৱে ১৯৬০ টকা দৰত পি পি ই কীট যোগান ধৰে৷ এন এইচ এমে দিয়া আৰ টি আই তথ্য অনুসৰি , ইয়াৰে ধানুকাৰ মেডিটাইমৰ ক্ৰয়ৰ নিৰ্দেশ আছিল জৰুৰীকালীন ৷ আনহাতে , এই সময়ছোৱাত আটাইতকৈ কম দামত পি পি ই কীট যোগান ধৰা নৰ্থ ইষ্ট চাৰ্জিকেলে পৰৱৰ্তী সময়ত পি পি ই কীট যোগান ধৰাৰ কোনো তথ্য এন এইচ এমে উল্লেখ কৰা নাই ৷ জি এছ টি পোৰ্টেলৰ তথ্য অনুসৰি , এই প্ৰতিষ্ঠানৰ গৰাকী হ’ল ৰাজেন্দ্ৰ কুমাৰ দেওৰা ৷ এই ৰাজেন্দ্ৰ কুমাৰ দেওৰাৰে অন্য এক প্ৰতিষ্ঠান ইটাছ জি ফাৰ্মাই পৰৱৰ্তী সময়ত মেডিটাইমে যোগান ধৰা দৰত অৰ্থাৎ ১৬৮০ টকাত ১৫ হাজাৰ পি পি ই কীট যোগান ধৰাৰ তথ্য পোৱা যায় ৷
লকডাউনৰ সময়ছোৱাত ৩ এপ্ৰিল ,২০২০ত এন এইচ এমে সৰ্বোচ্চ ২৭৩০ টকা দৰত এছ ডি এছ ইলেক্ট্ৰ’নিকছ প্ৰাইভেট লিমিটেডৰ পৰা ৮০০০ পি পি ই কীট ক্ৰয় কৰিছিল৷ কিন্তু একেটা দিনতে একেটা প্ৰতিষ্ঠান এছ ডি এছ ইলেক্ট্ৰনিকছৰ পৰা ২১০০ টকা দৰত আৰু ৬ হাজাৰ পি পি ই কীট ক্ৰয় কৰিছিল এন এইচ এমে ৷ ৩ এপ্ৰিল ,২০২০ ৰ দিনটোতেই মেডিটাইমৰ পৰা ১,৬৮০ টকা দৰত ১৮,৯৬৫ টা , ইনটাৰেক্টিভৰ ১২ ৰপৰা ১,২৭৫ টকা দৰত ১০ হাজাৰটা, ট্ৰিহাষ্টিৰ পৰা ২৩১০ টকা দৰত ৩ হাজাৰটা পি পি ই কীট ক্ৰয় কৰিছিল ৷
লকডাউনৰ পূৰ্বৰে পৰা ৪ জানুৱাৰী , ২০২২ লৈ কোভিড প্ৰতিৰোধী সামগ্ৰী ক্ৰয়ৰ ক্ষেত্ৰত দামৰ ব্যাপক তাৰতম্য আৰ টি আই তথ্যত স্পষ্ট হৈ পৰিছে ৷
(এই প্ৰতিবেদন কলকাতাৰ স্নিগ্ধেন্দু ভট্টাচাৰ্যৰ সহযোগত প্ৰস্তুত কৰা হৈছে)