উত্তৰ প্ৰদেশ বিধানসভাৰ বৰ্ষাকালীন অধিৱেশন আৰম্ভ হোৱাৰ আগমুহূৰ্তত সমাজবাদী দলে লৈছে বিধান ভৱনলৈ প্ৰতিবাদী যাত্ৰাৰ কাৰ্যসূচী৷
সোমবাৰে সমাজবাদী নেতা অখিলেশ যাদৱৰ নেতৃত্বত এই প্ৰতিবাদী যাত্ৰা উলিওৱা হয়৷
সোমবাৰৰ পৰা আৰম্ভ হৈছে ৰাজ্যখনৰ বিধানসভা অধিৱেশন৷
শোভাযাত্ৰাটো ১০০ মিটাৰ মান আগবঢ়াৰ পিছতে আৰক্ষীৰ বাধাৰ সন্মুখীন হয়৷
ইতিমধ্যে সমগ্ৰ লক্ষ্ণৌ চহৰত নিৰাপত্তা ব্যৱস্থা কটকটীয়া কৰা হৈছে৷
ৰাজ্যত ক্ৰমান্বয়ে বৃদ্ধি পোৱা নিবনুৱা সমস্যা,মূল্যবৃদ্ধি,নাৰীজনিত অপৰাধ বৃদ্ধি,,আইন শৃংখলাজনিত সমস্যা আদিৰ প্ৰতিবাদত সমাজবাদী দলে এই প্ৰতিবাদী কাৰ্যসূচী গ্ৰহণ কৰিছিল৷
মুখ্যমন্ত্ৰী যোগী আদিতনাথে সমাজবাদীৰ এই প্ৰতিবাদী কাৰ্যসূচীক সমালোচনা কৰি কয় “ তেওঁলোকে গণতান্ত্ৰিক পন্থাৰেও প্ৰশ্ন সুধিব পাৰিলেহেঁতেন৷”
“কোনো দলে যদি গণতান্ত্ৰিকভাৱে প্ৰশ্ন কৰে তেন্তে কোনো সমস্যাৰ সৃষ্টি নহয়, তেওঁলোকে এই কাৰ্যসূচীৰ বাবে আগতীয়াকৈ অনুমতি ল’ব লাগিছিল৷আচলতে সমাজবাদী পাৰ্টিৰ পৰা আইন শৃংখলা পৰিস্থিতি আশা কৰাটো ভুল”-এনেদৰে কয় মুখ্যমন্ত্ৰী যোগী আদিত্যনাথে৷
ইতিমধ্যে সমাজবাদী দলে আৰক্ষীৰ বাধাৰ পিছত দলৰ কাৰ্যালয়লৈ উভতি গৈছে৷সমাজবাদী দলে বিজেপিয়ে গণতন্ত্ৰক হত্যা কৰা বুলি টুইটাৰত প্ৰকাশ কৰিছে৷
“দলটোৱে কোনো আগতীয়া অনুমতি লোৱা নাছিল৷তথাপিও তেওঁলোকক এটা নতুন পথ নিৰ্দেশনা দিয়া হৈছিল কিন্তু তেওঁলোকে মানি নল’লে”- এনেদৰে মন্তব্য কৰে যুটীয়া আৰক্ষী আয়ুক্ত পীয়ুষ মৰদিয়াই৷
সমাজবাদী দলৰ বিধায়কে বৰ্ষাকালীন অধিৱেশনত নিবনুৱা সমস্যা,মূল্যবৃদ্ধি,নাৰীজনিত অপৰাধ আদিৰ ওপৰত প্ৰশ্ন কৰি ব্যতিব্যস্ত কৰিব শাসক দলক ৷
সোমবাৰৰ এই প্ৰতিবাদ তাৰে এক ইংগিত হে আছিল৷
সমাজবাদী দলৰ মুখপাত্ৰ ৰাজেন্দ্ৰ চৌধুৰীয়ে কয় “ বিজেপিয়ে আক্ৰোশমূলক ভাৱে কামবোৰ কৰে৷বিজেপিয়ে ঘৃণাৰ ৰাজনীতি কৰে ”