বিশ্বকাপ ক্ৰিকেটত জয়লাভ কৰা এইগৰাকী ভাৰতীয় ক্ৰিকেটাৰ এতিয়া দৈনিক হাজিৰা কৰা শ্ৰমিক

ক’ৰ’ণা ভাইৰাছৰ সংক্ৰমণ আৰু ইয়াক ৰোধ কৰিবলৈ প্ৰযোজ্য কৰা লকডাউনৰ ফলত বহু লোকৰ অৱস্থা পানীত হাঁহ নচৰাৰ লেখীয়া হৈছে৷ দেশত হাজাৰ হাজাৰ লোক মৃত্যুমুখত পৰাৰ উপৰি বহু হাজাৰ লোকে কৰ্মসংস্থাপন হেৰুৱাই দুৰ্বিষহ জীৱন অতিবাহিত কৰিছে৷ ক্ৰমে ক্ৰমে দেশত ক’ৰ’ণা ভাইৰাছৰ সংক্ৰমণ হ্ৰাস হৈ আহিছে যদিও কৰ্মহীন লোকৰ তালিকা দৈনিক বৃদ্ধি হৈ গৈ আছে৷

অৰ্থনৈতিকভাৱে সমস্যাৰ সন্মুখীন হোৱা তেনে এগৰাকী নাগৰিক হৈছে এসময়ত ভাৰতীয় ক্ৰিকেট দলক বিশ্বকাপত প্ৰতিনিধিত্ব কৰা ক্ৰিকেটাৰ নৰেশ টুমডা৷ ২০১৮ চনত অনুষ্ঠিত দৃষ্টিহীন ক্ৰিকেট বিশ্বকাপত ভাৰতীয় দলক প্ৰতিনিধিত্ব কৰিছিল গুজৰাটৰ নিৱাসী নৰেশ টুমডেই৷ এতিয়া দিন হাজিৰা কৰি পেট প্ৰৱৰ্তাব লগীয়া হৈছে দৃষ্টিহীন ক্ৰিকেটাৰ গৰাকীয়ে৷ ২০১৮ চনত পাকিস্তানক পৰাস্ত কৰি ভাৰতীয় দলে দৃষ্টিহীন বিশ্বকাপত জয়লাভ কৰাৰ পিছত দলটোৰ অন্যতম সদস্য নৰেশ টুমডেই চৰকাৰী চাকৰিৰ বাবে আবেদন-নিবেদন কৰিছিল যদিও তেওঁ কোনো সুবিধা লাভ নকৰিলে৷

উল্লেখযোগ্য যে, ২০২০ চনত লকডাউন ঘোষণা হোৱাৰ পিছত নৰেশ টুমডেই পাচলি বিক্ৰী কৰি পেট প্ৰৱৰ্তাব লগীয়া হৈছিল৷ তেওঁ কয় যে পাচলি বিক্ৰী কৰি তেওঁ পৰিয়াল চলাবলৈ অসুবিধাৰ সন্মুখীন হৈছে আৰু সেইবাবে দিন হাজিৰা কৰিবলৈ বাধ্য হৈছে৷