দেশৰ লোকসভা নিৰ্বাচনৰ ছেমিফাইনেল অনুষ্ঠিত হ’ব ২০২২ ত উত্তৰ প্ৰদেশত ৷ উত্তৰ প্ৰদেশ বিধানসভা নিৰ্বাচনৰ বিকুল এতিয়াই বাজি উঠিছে ৷ দেশৰ বৃহত্তম ৰাজ্যখনত আকৌ এবাৰ শাসনলৈ আহিবৰ বাবে বিজেপি এতিয়াৰে পৰা সৰ্বশক্তিৰে নামি পৰিছে ৷ বহি থকা নাই বিৰোধীও ৷বি এছ পিৰ ব্ৰাক্ষ্মণ সন্মিলন , বিজেপিৰ মন্থন সন্মিলনৰ মাজতে প্ৰাক্তণ মুখ্যমন্ত্ৰী অখিলেশ যাদৱে সমাজবাদী পাৰ্টীৰ নিৰ্বাচনী প্ৰেক্ষাপট তৈয়াৰ কৰাৰ চেষ্টা অব্যাহত ৰাখিছে ৷বৃহস্পতিবাৰে লক্ষ্ণৌত অখিলেশ যাদৱৰ নেতৃত্বত উলিওৱা হয় এটা বৃহৎ চাইকেল সমদল ৷ সমাজবাদী পাৰ্টীৰ পূৰ্বৰ নেতা জনেশ্বৰ সিঙৰ সোঁৱৰণত এই চাইকেল সমদল উলিওৱা হয় ৷ অখিলেশ যাদৱে নেতৃত্ব দিয়া সমদলত দলটোৰ সকলো জিলাৰ জ্যেষ্ঠ নেতাই অংশগ্ৰহণ কৰে ৷ বিগত পঞ্চায়ত নিৰ্বাচনত বিজেপিক পৰাভূত কৰাৰ দাবী কৰা সমাজবাদী পাৰ্টীয়ে এইবাৰ ৰাজ্যখনত চৰকাৰ গঠনত সফল হ’ব বুলিও আশা প্ৰকাশ কৰিছে ৷বৃহস্পতিবাৰৰ চাইকেল সমদলৰ জড়িয়তে সমাজবাদী পাৰ্টীয়ে মূল্যবৃদ্ধি , কৃষি আইন , নিৱনুৱা সমসয়া আদি বিষয়ক লৈ প্ৰতিবাদমুখৰ হোৱা দেখা যায় ৷অখিলেশ যাদৱে ইতিমধ্যে কেবাটাও সৰু সৰু দলৰ সৈতে নিৰ্বাচনী মিত্ৰতাৰ কথা ঘোষণা কৰিছে আৰু নিজ দলৰ কৰ্মকৰ্তাসকলক সক্ৰিয় হোৱাৰ নিৰ্দেশ প্ৰদান কৰিছে ৷
কৃষক আন্দোলনে আনি দিছে সুযোগ
উত্তৰ প্ৰদেশ বিধানসভা নিৰ্বাচনৰ সুযোগ লৈ সকলো বিৰোধী দলেই নিজকে পুণৰুজ্জীৱিত কৰাৰ চেষ্টা চলাই আছে ৷ সকলো দলেই হিচাপ নিকাচ কৰিছে যে যদিহে কৃষক আন্দোলন নিৰ্বাচনৰ সময়লৈকে অব্যাহত থাকে তেনেহ’লে পশ্চিম উত্তৰ –প্ৰদেশত ১২০ খন আসনত ইয়াৰ ব্যাপক প্ৰভাৱ পৰিব ৷ লাহে লাহে ইয়াৰ ৰাজনৈতিক প্ৰভাৱ ৰাজ্যখনৰ আন আন প্ৰান্তলৈও বিয়পি পৰিব ৷ আনাহাতে , কৃষক সংগঠনসমূহে অহা ৫ ছেপ্তেম্বৰত মুজাফ্ফৰনগৰত মহাপঞ্চায়তৰ আ্হ্বান জনাইছে ৷ এই মহাপঞ্চায়ততে তেওলোকে নিৰ্বাচনত ল’ব লগা ভূমিকা সন্দৰ্ভতো সিদ্ধান্ত ল’ব ৷