শিশুক ফুচুলাই ঘটি আছে ধন
শিশুক পৰ্ণগ্ৰাফীত জড়িত কৰাই গ্ৰেপ্তাৰ ৫০ জন
‘অপাৰেচন মেঘচক্ৰ’ আৰম্ভ কৰিছে চিবিআয়ে৷দেশৰ মুঠ ২১ খন ৰাজ্য আৰু কেন্দ্ৰীয় শাসিত অঞ্চলৰ ৫৯ টা স্থানত সংস্থাটোৰ দ্বাৰা এই অপাৰেচন চলিছে৷অসমৰ গুৱাহাটী আৰু ধেমাজিৰ মুঠ ৬ টা স্থানত চিবিআয়ে এই অভিযান চলাইছে ৷
শিশুক যৌন নিগ্ৰহ চলোৱাৰ লগতে পৰ্ণ’গ্ৰাফিক চিনেমা নিৰ্মাণত তেওঁলোকক জড়িত কৰা সকলৰ বিৰুদ্ধে সংস্থাটোৱে আৰম্ভ কৰিছে এই অভিযান৷
এই অভিযানৰ সময়ত চিবিআয়ে প্ৰায় ৫০ জনৰো অধিক এনে কামৰ লগত জড়িত ব্যক্তিক গ্ৰেপ্তাৰ কৰিছে৷
এই অভিযুক্ত লোক সকলৰ পৰা বিভিন্ন ইলেক্ট্ৰনিক সামগ্ৰী লেপটপ ,ম’বাইল আদি জব্দ কৰিছে চিবিআইয়ে৷
সংস্থাৰ চাইবাৰ অপৰাধ অনুসন্ধান শাখাই ইতিমধ্যে সেই সামগ্ৰীসমূহত আপত্তিজনক তথ্যৰ লগতে ভিজুৱেল থকাটো নিশ্চিত কৰিছে৷
উল্লেখযোগ্য যে চিবিআয়ে আইটি এক্টৰ অধীনত দুটা গোচৰ ৰুজু কৰিছে৷ইণ্টাৰপলৰ পৰা সংগৃহীত তথ্যৰ ভিত্তিত শিশুৰ বিৰুদ্ধে অপৰাধৰ এই গোচৰ ৰুজু কৰিছে চিবিআয়ে৷
ইণ্টাৰপলৰ ছিংগাপুৰত অৱস্থিত শাখাই এই তথ্য নিউজিলেণ্ডৰ পৰা লাভ কৰিছিল৷
গোচৰত এই তথ্যও সন্নিৱিষ্ট কৰা হৈছে যে যথেষ্ট সংখ্যক ভাৰতীয়ই শিশুৰ এনে ভিডিঅ’ ডাউনলোড কৰাৰ লগতে চাৰ্কুলেট কৰে৷
সংস্থাটোৰ সূত্ৰই প্ৰকাশ কৰা অনুসৰি অসমৰ গুৱাহাটী আৰু ধেমাজিত শিশুৰ পৰ্ণগ্ৰাফীৰ দৰে অপৰাধ বহুত দিনৰ পৰাই সংঘটিত হৈ আছিল৷
অসমৰ লগতে উত্তৰ পূবৰ আন দুখন ৰাজ্য ক্ৰমে অৰুণাচল আৰু ত্ৰিপুৰাতো এই অভিযান চলাইছিল সংস্থাটোৱে৷
উত্তৰাখণ্ড,হাৰিয়ানা,মহাৰাষ্ট্ৰ,গুজৰাট,ঝাৰখাণ্ড,পশ্চিমবংগ,তামিলনাাডু ,কেৰালা,ৰাজস্থান,গোৱা আদি ৰাজ্যৰ বিভিন্ন প্ৰান্ততো সংস্থাটোৱে শনিবাৰে তালাচী চলাইছিল৷
গুৰুত্বপূৰ্ণ বিষয় এয়ে যে ভাৰতত শিশুৰ ওপৰত চলি থকা শোষণ,নিৰ্যাতনৰ তথ্য ইণ্টাৰপলৰ জৰিয়তে চিবিআই লৈ প্ৰেৰণ কৰিছিল নিউজিলেণ্ডৰ পৰা৷
শিশুক পৰ্ণগ্ৰাফী ভিডিঅ’ত বলপূৰ্বকভাৱে ব্যৱহাৰ কৰাই আন্তৰ্জাতিক বজাৰত সেই ভিডিঅ’সমূহৰ জৰিয়তে এটা দলে যথেষ্ট ধন উপাৰ্জন কৰি আছে৷
ক্লাউড বেচ ষ্টৰেজত ৰখা এই তথ্য সমূহৰ যোগেদি ভাৰতৰ কোন কোন ঠাইত এনে ধৰণৰ ঘটনা সংঘটিত হৈ আছে তাৰো সবিশেষ তথ্য যোগান ধৰিছিল ইণ্টাৰপলে৷