উপ নিৰ্বাচনত ভৱানীপুৰ সমষ্টিত আকৰ্ষণীয় হ’ব তিনি অধিবক্তাৰ যুঁজ! কোন এই তিনি অধিবক্তা?

আগন্তুক বিধানসভা উপ নিৰ্বাচনত ভৱানীপুৰত আকৰ্ষণীয় হ’ব তিনি অধিবক্তাৰ যুঁজ! বিধানসভাৰ উপ নির্বাচন হ’লেও ভৱানীপুৰ সমষ্টিৰ ওপৰত দেশৰ সংবাদ মাধ্যমৰ দৃষ্টি নিবদ্ধ হৈ পৰিছে৷ আমাৰ চুবুৰীয়া ৰাজ্য পশ্চিমবংগৰ এই সমষ্টিটোত মুখ্যমন্ত্রী মমতা বেনার্জীৰ বিৰুদ্ধে প্রতিদ্বন্দ্বিতাত নামিব বিজেপিৰ প্রার্থী প্রিয়ংকা টিবৰিৱাল৷ ইয়াৰ উপৰি চিপিআই(এম)ৰ শ্রীজীৱ বিশ্বাসে প্রতিদ্বন্দ্বিতা আগবঢ়াইছে এই গুৰুত্বপূর্ণ সমষ্টিটোত৷ লক্ষণীয়ভাৱে তিনিওগৰাকী প্রার্থীয়েই হৈছে আইনজীৱী৷
মমতা বেনার্জীয়ে আদালতত ব্যস্ততাৰ বাবে পেছাগতভাৱে মনোনিৱেশ কৰা নাই৷ কিন্তু প্রিয়ংকা আৰু শ্রীজীৱ হৈছে পেছাগতভাৱে অধিবক্তা৷ গতিকে সমষ্টিটোৰ নিৰ্বাচনী যুঁজ এইবাৰ অধিবক্তাৰ যুঁজ হিচাপে চিহ্ণিত হৈছে৷
উল্লেখযোগ্য যে ১৯৮২ চনত আইনৰ ডিগ্রী লাভ কৰিছিল মমতা বেনার্জীয়ে৷ পূৰ্বে দুই-তিনিবাৰ ক’লা কোট পৰিধান কৰি আদালতত যুক্তি তর্কত লিপ্ত হোৱাও দেখা গৈছিল মমতাক৷
ইফালে চাৰি অক্টোবৰত অনুষ্ঠিত হ’বলগীয়া উপ নির্বাচনৰ বাবে মমতা বেনার্জীয়ে শুকুৰবাৰে মনোনয়ন পত্র দাখিল কৰিছে৷ ভৱানীপুৰ সমষ্টিত প্রতিদ্বন্দ্বিতাত নমা বিজেপিৰ প্রার্থী প্রিয়ংকাই কম দিনৰ ভিতৰতে জনপ্রিয়তা অৰ্জন কৰিবলৈ সক্ষম হৈছে৷ অৱশ্যে প্রার্থী প্রিয়ংকা হ’লেও মমতাৰ বিৰুদ্ধে নির্বাচনী যুঁজখনত বিশেষ ভূমিকা পালন কৰিব বিজেপি নেতা ৰুদ্রনীল ঘোষে৷ ঘোষেই প্রথমতে বিজেপিৰ প্রার্থী হোৱাৰ কথা আছিল যদিও অন্তিম সময়ত এই চিন্তা পৰিহাৰ কৰে নেতাজনে৷